نها ژن مال و مولكێ زەلامی د ئێخنە سەر ناڤێ خوە
هەولێر، قائید میرۆ:
سەرۆكێ ئێكەتیا زەلامێن كوردستانێ ئاشكرا كر، سالا بۆری 619 سكالا هاتینە تۆمار كرن و 67 زەلامان ژی ب ئەگەرێن جودا دووماهی ب ژیانا خوە ئینایە و گۆت: دیاردەیەكا مەترسیدار دناڤا ژناندا سەرهەلدایە و بێی وەرگرتنا رەزامەندیا زەلامی سەرەدانا نوشدارێن تایبەتمەند دكەن بۆ هندێ خوە گرێ دەن و رێگریێ ل پەیدابوونا زارۆكان بكەن.
بورهان عەلی، سەرۆكێ ئێكەتیا زەلامێن كوردستانێ بۆ رۆژناما ئەڤرۆ دیار كر سالا بۆری 2023ێ ل سەرانسەری هەرێما كوردستانێ 619 سكالا هاتینە تۆمار كرن ژلایێ زەلامانڤە و مخابن ل سالا بۆری 67 زەلامان خۆ كوشتیە و هەشت زەلام ژی ژلایێ هەڤژینێن وانڤە ب هاریكاریا كەسێن دی هاتینە كوشتن و تنێ ل پارێزگەها دهۆكێ سالا بۆری 9 زەلامان دووماهی ب ژیانا خۆ ئینایە و گۆت: (مخابن دەركرنا زەلامێن دانعەمر ل هەرێما كوردستانێ نێزیكە ببیتە دیاردە و تنێ سالا بۆری 49 زەلامێن دانعەمر ژلایێ خێزانێن وانڤە هاتینە دەركرن ژ مال).
بورهان گۆتژی: (هەروەسا سالا بۆری 51 سكالا ل سەر خیانەتا هەڤژینیێ هاتینە تۆمار كرن و 9 حالەتێن دیژی هەبووینە ژنان دەست ب سەر مووچێ زەلامێ خوە داگرتیە و زەلام هاتیە بێ بەهر كرن ژ مووچێ هەیڤانە، ژلایەكێ دیڤە ژن فێر بووینە مولك و مالێ زەلامی د ئێخنە سەر ناڤێ خوە و دووڤدا داخوازا جودابوونێ دكەن و مولك و مالێ زەلامی ژی بخۆ دبەن).
بورهان عەلی ئاماژە پێ كر ژی، دیاردەیەكا دی سەرهەلدایە و هەر د كەڤندا بەرهەم ئینانا زارۆكان كارەكێ هەڤبەش بوویە دناڤبەرا هەڤژینان و نوكە كار گەهشتیە ئاستەكی ژن بێی وەرگرتنا رەزامەندیا زەلامێ خوە سەرەدانا نۆشدارێن تایبەتمەند دكەن و خوە گرێددەن هەتا زارۆك نەبن، واتە ژن ناهێلن هژمارەكا زۆر یا زاركان بەرهەم بینن و بێی خواستا زەلامی سەرەدانا نۆشداران دكەن هەتا رێگریێ بكەن ل پەیدابوونا زارۆكان ئەڤەژی كارەكێ مەترسیدارە.
سەرۆكێ ئێكەتیا زەلامێن كوردستانێ گۆتژی: (داخوازێ ل هەموو نۆشداران دكەین بێی وەرگرتنا رەزامەندیا زەلامی چو ژنك نەهێنە گرێدان و رێگری ل بەرهەم ئینانا زارۆكان نەهێتە كرن، چونكە بەرهەم ئینانا زارۆكان كارەكێ هەڤبەشە دناڤبەرا هەڤژینان نابیت بڕیارا ئێلایەنە بهێتە دان بۆ قەدەغە كرنا زارۆكان، هەروەسا ئەڤان سالێن دووماهیێ دیاردەكا دی سەرهەلدایە و زۆربەیا ئاریشەیێن ناڤبەرا هەڤژینان بۆ مایتێكرنا كەس و كارێن هەڤژینان ڤەدگەڕیت و مایتێكرنێن زۆر دهێنە كرن ب تایبەتی ددەمێ پەیدابوونا ئاریشەیان دناڤبەرا ژن و زەلامان مایتێكرن دهێتە كرن و ئەڤە ژی بۆیە ئاریشەیەكا دی بۆ زێدەتر پەیدابوونا ئاریشەیان)..
