خەیری یووسف: ل نەخۆشخانەیێ ژەهر كربوو د ناڤ خوینا ئەیازی دا
دلۆڤان هالۆ:
خەیری یوسف، برایێ مەزنێ هونەرمەند (ئەیاز یوسف زاخۆیی) د دیدارەكێ دا بۆ رۆژناما ئەڤرۆ گۆت: دەمێ (ئەیاز) قوتابی ل قوناغا سەرەتای حەزا سترانگۆتنێ ل دەف هەبوو، لەورا هەر ل قوتابخانێ و هندەك جاران ژی ل جڤات و شەهیانان ستران دگۆتن، پشتی دەلیڤە بۆ چێبووی ل سالا 1981 بەرهەمێ خوە یێ ئێكێ ل ستودیۆیا بابێ مێهڤانی تۆماركر و هەتا رۆژا وەغەرێ پتری (150) سترانان هەبوون، هەروەسا گەلەك حەزژ سترانێن فولكلۆری ژی دكر و پتری (500) سترانێن فولكلۆری ژبەركر بوون و جارەكێ ل شەهیانەكێ سپێدێ هەتا ب شەڤ سترانێن فولكلۆری دگۆتن بێ دوبارەكرن.
هەروەسا گۆت: ژبلی سترانگۆتنێ ئەیازی شیانێن زارڤەكرنێ هەبوون و هەر كەسەكێ پێنج خۆلەكان ل دەف روونشتبا دا شێت ب دروستی زارڤەكرنا دەنگ و لڤینێن وی كەت، بۆ زانین من ل بەرە ژیاننا وی بكەمە پرتووكەك.
دەربارەی مرنا وی ژی كو ل 20/1/ 1986 بوو، خەیری گۆت: ژبەر گۆتنا سترانێن نەتەوی ب تایبەت ژی سترانا (نەورۆز) و سترانا (چ بكەم ئەز) رژێما عیراقێ ل نەخۆشخانێ ژەهر كربوو دناڤ خوینا ئەیازی دا، چنكو هەكە ئەیازی بوتلەكێ خوینێ بەخشیبا دا (15) رۆژان مۆلەتێ دەنێ و گەلەك جاران ئەیازی خوین ددا دا مۆلەتێ وەرگریت و بهێت شەهیانا هەڤالەكێ خوە ب رێڤەببەت.
