ئەندازیارێ ئاشتیێ ئدریس بارزانی هەمی هیڤیێن وی ئەو بوون حزب و ئالیێن كوردی د بەرەیەكێ ئێكگرتی دا كۆم بكەت
دیدار، سالار محەمەد دۆسكی:
پێشمەرگەیێ قەهرمان (عەقید عەبدالواحد صالح باكوزی) پسمامێ شەهید (وەحید باكوزی) ل سالا 1964ێ ل گوندێ باكوزێ ل دەڤەرا دۆسكیا ژ دایك بوویە، دسالێن هەشتێان دا دبیتە پێشمەرگەیێ شۆرەشا گولانێ و چەندین شەر و داستانا پشكدار دبیت و چەند جاران دهێتە برینداركرن و نوكە ژی خانەنشینە.
پێشمەرگەێ شۆرەشا گولانا پێشكەفتنخواز عەبدلواحد صالح باكوزی د دیدارەكێ دا ل گەل رۆژناما ئەڤرۆ بەحسێ پەیوەندیێن خوە ل گەل شۆرەشا گولانێ دكەت، و دبێژیت ل سالا 1983ێ ل گەل چەند هەڤالێن خوە ( صادق حسێن زێوكی، قەهار زێوكی، مەمێ عەلی حسێن زێوكی) ل سنورێ لقێ ئێك یا خەباتكەر گەهشتینە ناڤ رێزێن شۆرەشا 26ی گولانا پێشكەفتنخواز و بووینە پێشمەرگە، و ئێكسەر ئەم هاتینە رەوانەكرن بۆ رۆژهەلاتێ كوردستانێ بۆ بارەگایێ مەكتەبا سیاسی، دووڤدا چووینە باژێرێ (شنو) ل گەل شەهیدێ فەرماندە (محەمەد حەسەن سەلیم باجلوری)، پشتی دەمەكی هاتینە ڤەگوهاستن بۆ بارەگایێ شەهیدێ هەردەم ساخ خودێ ژێ رازی (ئدریس بارزانی) ل چیایێ (قەندیل)، وی دەمی گەلەك رێكخراوێن سەر ب لقێ ئێك و دەڤەرا بەهدینان ڤە هاتبوونە چیایێ قەنیل، وی دەمی چەند زێرەڤان ل گەل خودێ ژێ رازی بوون وەك (خورشید خانو، مەلا عەبدوللا، مەلا تەمەر، ئەشقی بارزانی)، گەلەك رێز ل مە دگرتن و جەنابێ رەحمەتی گەلەك حەش پێشمەرگەی دكر، و مرۆڤەكێ گەلەك دلوڤان و ئازا بوو و هەر دەم یێ ئاشتیێ و تەناهیێ و دادپەروەر بوو، و ژ پێشمەرگێن خوە زێدەتر چاڤێ خوە دامە و هاریكاریا مە دكر، گەلەك دلگرانێ شەرێ ناڤخویی بوو و هەردەم بزاڤ دكر ئاشتی و تەناهی یا ناڤخو بەر قەرارببیت، و پاراستنا یەكرێزی و پاراستنا ناڤ مالا كوردی و هەمی بزاڤێن وی ئەو بوون، هەمی هێز و لایەنێن كوردی دبەرەیەكێ ئێكگرتی دا بهێنە كومكرن، و لەوما ژی یێ ب ئەندازیارێ ئاشتیێ بەنیاس بوو.
پێشمەرگەیێ شۆرەشا گولانا پێشكەفتنخواز، عەبدلواحد صالح باكوزی ئەو ژی گۆت: هەتا هەیڤا (9) ئەم مامینە ل گەل جەنابێ خودێ ژێ رازی (ئدریس بارزانی)، دووڤدا ڤەگەریاینە ل گەل خودێ ژێ رازی فەرماندێ پێشمەرگەی(محەمەد حەسەن سەلیم باجلوری)، هەتا يبریارا مە دەركەفتی بۆ سنورێ لقێ ئێك (ل. ن. دهۆك) یا پارتی دیموكراتی كوردستان، رێكخراوا شەهیدێن (گەڤەركێ) كو وی دەمی شەهید (محەمەد حەمدی وەرمێلی) بەرپرسێ وێ رێكخراوێ بوو، و (بەرەڤان دێرگژنیكی) جێگرێ وی بوو و (سەربەست سندوری) كادرێ مەیێ رێكخراوێ بوو.
پێشمەرگەیێ ناڤهاتی هەروەسا گۆت: ل سالا 1985ێ بابێ من ل گوندێ پشتا گری ژلایێ رژێما بەعس یا وی سەر دەمی ڤە دهێتە دەستەسەركرن، و دووڤدا هاتە رەوانەكرن بۆ فرقا زاخۆ و پشتی ئەشكەنجەدانەكا زور و قوتانەكا دژوار بابێ منێ خودێ ژێ رازی دهێتە ئازادكرن.
پێشمەرگەیێ شۆرەشا گولانێ عەبدولواحد باكوزی، ئەو ژی ئاشكراكر، ل شۆرەشا گولانێ پشكداری گەلەك شەر و داستانا بووینە و گۆت: بەرسنكگرتنا هەر دو هێرشێن رژێمێ كرینە بۆ سەر بارەگایێ لژنا ناوچا دهۆك یا تێكوشەر ل گەلیێ (هەسناڤاكێ) ل گوندێ (گەلناسكێ) ل سالێن(1984- 1986) ل ئەڤان هەر دو هێرشێن دوژمنی دا دوژمنی شكەستن خوارن و ب دەهان تەرمێن خوە هێلانە ل مەیدانا شەری دا، پشكداریكرن د دانانا بویسەكێدا ل رۆژئاڤا باژێرێ دهۆكێ رێككەفتی 17/11/1984ێ، دڤێ بیسێدا پێشمەرگێن قەهرەمان رێكخراوا شەهید(ئەحمەد حاجی حسێن ) رێكخراوا شەهیدێن گەڤەركێ و شانا سەرەكی یا شەهید (دلوڤان بێسكی) و بارەگایێ لژنا دهۆك یا خەباتكەر، شیان زریپوشەكا دوژمنی ل گەل ئیفایەكا لەشكری تێك بشكێنن و ئاگری تێ بەردەن، و هژمارەكا زور ژ رەشەك و جەلادێن رژێمێ ب كوژن، سۆوتنا وێ زریپوشێ دەنگڤەدانەكا مەزن ل وی سەر دەمی هەبوو، راكرنا رەبیێن (سپی رێزی) ل سالا 1986ێ، پشكداریكرن ژ گرتن و رامالینا ناحیا مانگێشكێ ل مەها شەش سالا 1986ێ، پشكداریكرن دبەرسینكگرتنا دوژمنی بۆ دەڤەرا (سویار وسپیندارێ)، ل سالا 1986ێ دڤێ هێرشێ دا شیاین دوژمنی بشكێنین و زیانەكا مەزن بگەهینێ، راكرنا رەبیێن سەرێ ماسیكێ هەتا زركا ب هەلكەفتا شۆرەشا 26ی گولانێ ل سالا 1987ێ، پشكداریكرن د داستانا دێرەلوكێ دا ل شەڤا 11- 12/1/1988 ێ دڤێ داستانێ دا شیاین كونترۆلێ ل سەر ناحیا دێرەلوكێ بكەین، و جهێ مخابنیێ بوو دڤێ داستانێ دا (13) شەهید مەدان و ئێك ژ ئەوان شەهیدێن قەهرەمان كو ل گەل مە شەهید بوو بناڤێ ( سەید حسێن ئامێدی)، ل سەر دەزگایێ بێتەلێ بوو و ئەڤە و پشكداریكرن د چەندین چالاكیێن جورە و جور.
پێشمەرگەیێ شۆرەشا گولانێ دوپاتكر: ل سالا 1988ێ مالا بابێ من ل نهالێن گوندێ (زێوا شەفیق) بوو و دئەنفالێن رەش دا ل گەل خەلكێ دەڤەرێ و گوندێ ناڤبری بەرە ب سنورێن توركیا چوون، و ئەز جودا ل گەل مالا مامێ خوە چووم چووینە گوندێ (ئاروشێ)، دووڤدا چووینە گوندێ(ئاشیتێ) ل باكورێ كوردستانێ وی گوندی ئەم و بابێ من ئەو گەهشتینە ئێك، پاشی هاتینە رەوانەكرن بۆ (سلوپیا) مە ل وێرێ ناڤێن خوە نڤێسین بۆ ئیرانێ، و بابێ من ل گەل هندەك مالان برنە ئوردیگایێ مێردینێ و ئەڤێن مە ناڤێن خوە نڤێسین ئەم هاتینە رەوانەكرن بۆ ئوردیكایێ گەڤەرێ، پشتی بورینا دەمەكی ئەم ماینە ل دەڤەرێ وەلاتێ ئیرانێ ئەم نە وەرگرتین و جارەكا دی حوكمەتا توركا ئەم ڤەگوهاستینە كەمپا (مێردینێ)، و دووڤدا مە داخازنامەك نڤێسی و ئەم هاتینە ڤەگوهاستن بۆ كەمپا(دیاربكەر)، هەتا سالا 1990ێ ئەم چووینە وەلاتێ ئیرانێ، و ل دەستپێكێ ئەم چووینە ئوردیگایێ (زێوە) ل دەف پسمامێ من شەهید (وەحید باكوزی)، پاشی ئەم چووینە (ئورمیێ) من هەڤژینی ل وێرێ پێكئینا ل مالا (حسێن باجلوری)، رێككەفتی 12/3/1991ێ ل دەمێ سەرهلدانێ ئەم ڤەگەریاینە كوردستانێ رێكا حاجی ئومران گەلەك بەفرێ گرت بوو، و ئەم نەشیاین بهێن رۆژا دووڤدا ئەم هاتینە گوندێ (خازلی) ل نێزیك كەلەكێ ئەەم توشی شەرەكی بووین ل گەل لەشكرێ ئیراقێ، و مە هندەك شەهید و بریندار ل ئەوی گوندی دان و ئێك ژ بریندارا ئەزبووم، كو هەر دو پێن من گولە ڤێ كەفت بوون، و ئەم هاتینە باژێرێ دهۆكێ و مە پشكداری د سەرهلدانا پیرۆز دا كر، و كوچا ملیونی وەك هەمی خەلكێ خوە پشكداربووین.
عەبدلواحد باكوزی گۆت: ل كوچا ملیونی ئەم چووینە ناحیا كانی ماسێ و مە بارەگایەك ڤەكر، و ئەو كەل و پەل و خوارنێن ژلایێ وەلاتێن هەڤپەیمان ڤە بۆ خەلكی دهات، مە سەرپەرشتی ل سەر دكر و سەر خەلكێ خوە بەلاڤەدكر، هەتا كو لدیف پێشنیارا وەلاتێ فەرنسا ل (5)ی نیسانا سالا 1991ێ و ب بریارا (688) ژلایێ جڤاتا ئێمناهیێ و نەتەوێن ئێكگرتی ڤە دەركەفتی، سەبارەت دەڤەرەكا ئارام بۆ باشورێ كوردستانێ جارەكا دی ڤەگەریاینە باژێرێ دهۆكێ، ل سالا 1992ێ بوومە بەرپرسێ رێكخراوا زێرەڤانێن لژنا ناوچا سێمێلێ، و هەر دڤێ سالێدا ئانكو رێككەفتی16/10/1992 ل كەلاسا د شەرەكێ دژوار دا مە هندەك شەهید دان و هەر دو دەستێن من ژی بریندار بوون، و زێدەباری پشكداریكرن ل شەرێ دژی ترۆرستێن داعش، و نوكە ژی ب پلا عەقید هاتیمە خانەنشینكرن.
ل دووماهیێ پێشمەرگەیێ ناڤبری گۆت: هیڤی خوازین ئێكگرتنا نشتیمانی دناڤبەرا هەمی هێز و ئالیێن سیاسی دا دروست بیت، و زێدەتر چاڤدانا خەلكێ مە بهێتەكرن چونكە ڤی خەلكی گەلەك زەحمەت و ئیزا دیتی یە، و زێدەباری وێ چەندێ ئەڤ دەسكەفتێن چەند سالە ب دەست مللەتێ مە كەفتین بەرهەمێ خوینا ب سەدان شەهیدانە ئەڤ دەسكەفتە بهێنە پاراستن.
