قوبخانەكا دهۆكێ ژبلی پەروەردە و فێركرنێ كارێ خێرخوازی ژی نیشا قوتابیان ددەت
هەرهین محەمەد:
ماموستایەكێ قوتابخانەكێ ل دهۆكێ دیار كر، ئەڤە بۆ دەمێ حەفت سالە قوتابخانەیا مە ژبلی وانە گۆتنێ و زانینێ كارێ خێرخوازی ژی دكەت و سالانە جارەكێ ئەم سەرەدانا جهێن پێدڤی دكەین، ب تایبەت وان جهێن زارۆ پێدڤی بن و ب وێ سەرەدانێ و ب دیاریێن وان دلخۆش دكەین و ئەڤ سالە ژی نێزیكی 400 دیاری و كوژمەكێ پارەی مە بەلاڤكریە.
سالار جەمیل، ماموستا ل قوتابخانا ئەمریكی یا نیڤدەولەتی بۆ رۆژنامەیا ئەڤرۆ دیار كر، ل قوتابخانەیا وان هەر ژ دەستپێكا سالا 2018 هەتا نوكە كارێ خێرخوازی دكەن ب هاریكاریا قوتابیان و دیسان كارگێریا قوتابخانێ هەر جار سەرەدانا جهەكی دكەن و ل سالا بوری قەستا جهێن زارۆیێن بێ سەمیان كربوو، ئەڤ سالە ژی سەرەدانا نەخوشخانەیا هیڤی یا زارۆكان كربوو.
ناڤهاتی زێدەتر بەردەوامیێ ب ئاخفتنێن خوە دەت و دبێژیت: ئەو جهێن ئەم سەرەدانا وان دكەین ئەم دزانین كا ئەو پێدڤی چنە، لەورا بەری ئەم بچین ئەم وان پێدڤیان ل گەل خوە بۆ دبەین و دەمێ ئەم ئامادەكاریێن خوە دكەین ژ بۆ ڤی پرۆژێ خێرخوازی، ئەم دایك و بابێن قوتابیان هایدار دكەین كو مە پرۆژەكێ ب ڤی رەنگی هەیە و ئەڤ سالە مە پرۆژێ خوە كربوو نەخوشخانا هیڤی یا زارۆكان، لەورا مە گۆتبوو سەمیانێن قوتابیان هەر قوتابیەك یاریەكا زارۆیان ل گەل خوە بینیت ژ بۆ ڤێ مەرەمێ.
هەر دیسان ل گەل هاریكاریا قوتابیان قوتابخانە ژی ب كوژمەكێ پارەی هاریكارە د ڤی پرۆژەیدا، هەروەسا گەلەك جاران سەمیانێن قوتابیان دەمێ ڤی تشتی دزانن ئەم دێ كەین ئەو ژی ب كوژمەكێ مەزن یێ پارەی پشكداریێ د ڤی پرۆژەی دا دكەن، چونكو كارەكێ خێرخوازیە و دلێ زارۆیێن بێ سەمیان و نەخوش پێ خوش دبیت و د سەرەدانا ئەڤ جارە دا مە دیاری پێشكێشی نێزیكی 160 زارۆیێن نەخوشكر.
هەروەسا د وێ رۆژێ دا مە سەرەدانا نەخوشخانا تەلاسیمیایێ و نەخوشیێن گران كر و ل وێرێ ژی نێزیكی 150 دیاری بەلاڤكرن ل سەر وان ئەو دیاری ژی كوژمەكێ پارەی بوو.
سالاری زێدەتر گۆت: مەرەما مە ژ ڤی كاری ئەوە هەموو كەس بنە هاریكارێن ڤان زارۆیێن نەخوش و بێ سەمیان، چونكو ئەو ژی پێدڤی هاریكاریی َو پشتەڤانیێ نە و دەمێ زارۆیێ نەخۆش بیت و مرۆڤ یاریەكێ بۆ وی ببەت، بۆ وی گەلەكە، ب تایبەتی دەمێ زارۆ ب خوە بدەنە زارۆی كەیفەكا مەزن بۆ چێدبیت و ئەڤ جارە مە گەلەك تشتەكێ جوان دیت و ئەو زارۆیێن نەخۆش هەست ب نەساخیا خوە نەكر كو یێ نەساخە و هەست پێدكر یێ ساخە و سرۆشتی یە و د سالێن بوری دا من بۆ زارۆیان كەمان ژی دژەنی، بەلێ ئەڤ سالە دەلیڤە نەبوو مۆزیكێ بۆ وان ب ژەنم، بەلێ گەلەك حەز دكەین هەموو قوتابخانە مە ببینن دا كو ئەو ژی چاڤلێكرنا مە بكەن و هەكە جهێن شولەژێ ل گەل مە دهاریكاربن ئەم دێ بەردەوامبین ل سەر ڤی كاری و هەر چنە بیت هەیڤێ جارەكێ دا سەرەدانێن خوە كەین ژ بۆ ڤان جهان.
