ئەرشەد زاخۆیی دێ ئەلبۆمەكا نوو بەلاڤكەت
زنار تۆڤی:
هونەرمەند (ئەرشەد زاخۆیی) د د دیدارەكێ دا بۆ رۆژناما ئەڤرۆ دیاركر كو وی بەرهەمەكێ نوو تۆماركریە ژ دەه سترانان پێك دهێت، ل بەرە ل دەستپێكێ دو سترانان كلیپ بكەت و سترانێن ڤێ ئەلبۆمێ ژ پەیڤێن هەلبەستڤانان شەهید (مەحموود هالۆ، جەگەرخوین، خالد عەلی سلێڤانەیی، سەلمان شێخمەمی، عەلی سەلیم زێباری، خالس خەلیل زاخۆیی، ئەرشەد زاخۆیی) ئاوازێن وان ژی هەموو یێن منن و ئارەنجۆریا نۆبەدار ئیبراهیم.
ناڤهاتی گۆت: نوكە بازارێ سیدیان نەمایە، كلیپ و بەرهەمێن هونەری ل تۆرێن جڤاكی دهێنە بەلاڤكرن، د هەمان دەمدا ئەو مەزاختنێن ئەم ل ڤان بەرهەمان دكەین، نەشێین ب دەست خۆڤە بینین، بۆ زانین هەتا نوكە من 38 ئەلبۆمێن سترانان بەلاڤكرینە، كو سەرجەمێ وان دینە 679 ستران و ئەڤە دێ بیتە بەرهەمێ من یێ 39 ێ، دیسان نوكە بەرهەمێن دیتر لبەر دەستێ من هەنە، من لبەرە وان سترانان ژی ب ئامیرێ عۆدێ و كەمانێ و قانوونێ تۆمار بكەم، كو ئەو ژی 25 سترانن و ب مخابنی ڤە نوكە هونەرمەند نەشێن ب بەرهەمێن خوە بژین، بەلێ هەكە هونەرمەند بچنە داوەت و ئاهەنگان، دێ داهاتەك بۆ وان ژێ هێت، بەلێ ب ستران و هونەرێ خوە نەشێن بژین، ل گەل هندێ مافێ هونەرمەندان ژی ناهێتە پاراستن.
