كوێخێ عوزێری و كلدانا چاڤێ جوامێری!
شڤان سالم
چه‌ند رۆژه‌كن چاڤێم مه زه‌حف ب ته‌قاندن و ژبنبرنا دیوانا كوێخێ عوزێری، ئێك فه‌رماندێن سه‌ربازی سه‌ر ئالیه‌كێ سیاسی یێ دیاركری ل ده‌ڤه‌را سلێمانیێ دكه‌ڤن، تووڕێن جڤاكی و ده‌زگه‌هێن راگه‌هاندنێ ژی كێم و زێده ئه‌ڤ بابه‌ته به‌لاڤكرینه، كو دیاره كابرا پشتی وه‌رگرتنا كوژمه‌كێ مه‌زن یێ پاره‌ى ژ چه‌ند وه‌به‌رهه‌م هێنه‌ران پاشى چه‌ند كه‌سه‌ك لسه‌ر ته‌قه‌كرنێ راسپاردینه، ل ڤان وبه‌رهه‌مهێنه‌ران كو ئه‌نجام ژی برینداربوونا وان بوویه،
ئه‌وا دهێت گۆتن پشتی ده‌رچوونا بڕیارا دادگه‌هێ بۆ گرتنا كوێخایی ئه‌و ل كوردستانێ نه‌مایه و قه‌ستا ژ ده‌رڤه كریه، د ئه‌نجام دا ب بڕیارا دادگه‌هێ كۆچك و دیوانا وی هاتیه ته‌قاندن، ئه‌ز یاساناس نینم كو بزانم بڕیارا دادگه‌هێ چه‌ند یاسایی و ره‌وایه یان نه، هه‌ر چه‌ند ب بۆچوونا من دروست نینه، لێ گریمان درست و د جهێ خوه دایه، لێ ئه‌وا جهێ پرسێ گه‌لۆ كوێخا ته‌نها كه‌س بوویه سه‌رانه ب زۆری ژ خه‌لكی وه‌رگرتی یان ژی زۆرن ئه‌وێن ل وێ ده‌ڤه‌رێ بازگه و گۆمكرێن سه‌ربخوه ل هه‌ر جهه‌كێ وان ڤیایی دانایین و به‌رده‌وام سه‌رانا ژ خه‌لكی وه‌ردگرن، كو زۆره‌ك ژ وان ژی نێزیكێن جوامێری بووینه، گه‌لۆ كۆچكا كێ ژ وان هاتیه ته‌قاندن وكی چوویه به‌ر دادگه‌هێ؟
ئه‌رێ ب راستی ژی جیاوازی د ناڤبه‌را جوامێرێ كوڕێ جوامێری و دارده‌ستێن وی و خه‌لكه‌كێ دی دا نینه؟ یان ژی مییه‌كێ دی د ناڤ ڤی ماستی داهه‌یه و جوامێری ژی چاڤێن خوه پێ كلدانه؟
ره‌كلاما د تۆڕێن جڤاكی ژی پشكه‌كن ژ ڤێ كلدانێ بۆ راكێشانا سۆزا خه‌لكی و پشكه‌ك ژ بانگه‌شه‌یا هه‌لبژارتنێن كو ئه‌و بخوه لێ رێگر؟
دویر ژی نینه گه‌فێن ئاغایێن، وان بن و ئه‌ڤا ئه‌م دبینین سیناریۆ و زێده‌تر نه‌بت.
ئه‌گه‌ر نه دادگه‌هه‌ك هۆسا بڕیارا ته‌قاندنا كۆچكا كوێخه‌یی بده‌ت، بێ ده‌نگی و بێ هه‌لوه‌ستیا وێ لسه‌ر شازده‌یی ئوكتوبه‌رێ دێ چ رامانه‌ك هه‌بت؟
له‌وا ژی گرنگه خه‌لك ساده بیر نه‌بت و باشتر هزر بكت وهنده ب ئاسانی چاڤان كل نه‌دن.
ژ به‌ركو زۆردكه‌ڤیت به‌ر چاڤ خه‌لكه‌ك ب ڤان دیمه‌نان و كریارا دلخۆش و بالا وان بۆ هاتیه راكێشان بێ كو هزر د پشت په‌رده‌یان دا بكه‌ن.
ئه‌گه‌ر ئه‌ڤا ئه‌م دبینن بۆ هه‌ر كه‌سێ بیت نها دڤیا نه‌ك دیوان، به‌لكو كۆچكا جوامێری ژی ته‌خت با.
