دلنیا رەزازی ئەلبوومەکا نوو بەلاڤ کر
ئەڤرۆ نیۆز:
سترانبێژ دلنیا رەزازی، پشتی چەندین سالان کار د ئەلبوومەکا سترانان دا کری، نووترین ئەلبووما خوە بناڤێ «شەن» بەلاڤ کر.
هونەرمەندا ناڤهاتی ئاشکرا کر کو شەن نووترین ئەلبووما وێ یە و نوکە ل کەنالێ خوە یێ تایبەت د یوتیوبی و پلاتفۆرمێن دیجیتال دا بەردەستە و ژ نەهـ تراکێن سترانان پێک دهێت و بۆ رووداو گۆت: «د چەند سالێن بووری دامن کار د چێکرنا ڤی بەرهەمی دا کریە و دخوازم ب دلێ حەز ژێکەرێن دەنگێ من بیت».
دلنیا رەزازی کچا هەر دوو هونەرمەند مەرزیە فەریقی و ناسر رەزازی یە، سوپاسیا وان هەموو کەسان کر یێن هاریکاریا وێ د چێکرنا ڤێ ئەلبوومێ دا کری، ب تایبەتی بۆ کارێ مۆزیکێ ئەو ژی هونەرمەندان «کاوە قادری، محسنێ حسێنپوور، موکریان ئەبابکر، پێدرام شەهلای، شاکۆ شێرکۆ و گۆت: «د ڤی بەرهەمی دا وەزیر خالد وەکو پرودیۆسەر کار د ڤێ ئەلبوومێ دا کریە و ئەرکێ بەلاڤکرنا وێ ب ستوویێ خوەڤە گرتیە».
ئێک ژ تراکێن د ناڤ ڤێ ئەلبۆمێ دا بناڤێ «ئەزیزم» کو بەری نوکە ب دەنگێ دایکا وێ هونەرمەند مەرزیە فەریقی هاتبوو تۆمارکرن دلنیایێ د ناڤ ڤێ ئەلبوومێ دا ب مۆزیکەکا نوو و ب ریتمەکا بلەز گۆتیە.
دلنیا رەزازی ل سالا 1979 ل مەریوانێ رۆژهەلاتێ کوردستانێ ژدایکبوویە، دەستپێکا دیاربوونا وێ د ناڤ هونەری دا پشتی وەغەرا دووماهیێ یا دایکا وێ بوو ب ئەلبووما ب دووماهی نەهاتی یا دایکا خوە دەست ب کارێ هونەری کر و پێشۆازیەکا بەرچاڤلێ هاتەکرن.
