پێدڤیە مالپەرێن تایبەت هەبن گرنگیێ ب نڤێسین و رێنڤیسا گەنجان بدەن
بێوار حەمدی:
هەر گەنجەكێ پشكداریێ د كورو سمینار و خۆلان دا بكەت ژ بۆ مەرەما پێشڤەچوونا خۆ، بێگومان دێ بیتە خودان رێنڤیسەكا باش، چاڵاكڤانەكی ژی گۆت: نڤێسین هونەرە و كاركرن بۆ دڤێت، لەوما گرنگە مالپەرێن تایبەت هەبن خوە ل گەنجا و نڤیسینێن وان بكەنە خودان. نڤیسەرەك ژی دبێژیت: خالا ژ هەموویێ گرنگتر یا گەنجی هانددەت شارەزابیت د نڤێسینێ دا خواندنە، لەوما یا پێدڤییە ئەو بخوینیت د هەمی واران دا و پاشی وارەكی دەستنیشانكری هەبیت كو بشێت د وی واریدا بنڤیسیت و خزمەتێ بكەت.
عەبدولرەحمان بامەرنی، چاڵاكڤانێ مەدەنی د دیدارەكێ دا بۆ رۆژناما ئەڤرۆ گۆت: تا كۆ گەنج ببیتە نڤیسەرەكێ باش، پێدڤییە ئێكەم جار زمانێ خۆ یێ نڤێسینێ پێش بێخیت، دەما ئەم بەحسا زمانێ نڤێسینێ دكەین مەرەم پێ رێنڤیسە، ژ بەر كۆ گەنج ب خوە بەرپرسە ژ رێنڤیسا خۆ و دڤێت ئەو ب خوە خوە ئاڤابكەت و گۆت: (هەر كەس دشێت ببیتە نڤیسەر، لێ نڤێسینێ هونەر و كاركرن بۆ دڤێت، چ كار بێ ئاڵاڤ ناهێنەكرن و هونەرێ نڤیسینێ ژی پەیڤ و دەستەواژەنە، یا گرنگە نڤیسەر ڤان ل دەڤ خۆ پەیدا بكەت و كار ژ بۆ بكەت).
عەبدولرەحمانی هێشتا گۆت: یا پێدڤی یە مە رۆژنامە هەبن كۆ پووتەی ب گەنجی و نڤیسینێن وی بدەن، دیسان دڤێت مە ماڵپەرێن تایبەت هەبن خوەە ل گەنجان بكەینە خودان و نڤیسینێن وان بەڵاڤ بكەین و شاشیێن وان راستڤەكەن بێی كۆ بهێنە پاشڤەبرن، بەلێ دگەل ڤێ هەموویێ ژی دڤێت گەنج ب خوە ژی خۆ پێش بێخن، ژبەركو ب دەهان كەنالێن بەڵاڤكرنێ یێن هەین).
حەمرین هروری، رۆژنامەڤانە و شارەزایە د نڤیسینێ دا، دەربارەی بابەتی گۆت: هەر گەنجەكێ پشكداری كوڕ و سمینار و خۆلان ببیت ژ بۆ مەرەما پێشڤەچوونا خۆ، بێگۆمان دێ بیتە خودان نڤێسینەكا باش و رێنڤیسەكا جوان و گۆت: (خالا ژ هەموویێ گرنگتر یا كۆ گەنجی هانددەت شارەزابیت د نڤێسینێ دا خواندنە، لەوما یا پێدڤییە ئەو بخوینیت د هەمی بواران دا و پاشی وارەكی دەستنیشانكری هەبیت كو بشێت د وی واریدا بنڤیسیت و خزمەتێ بكەت).
د بەردەوامیا ئاخفتنا خۆ دا حەمرینی دیار كر، هەتا د بەڵاڤكرنا پۆستێن سۆشیال میدیایێ ژی دا گەنجان گەلەك ڕێنڤیسێن شاش هەنە، ب مخابنی ڤە ئەگەر مە سیستەمەكێ دروست یێ خواندنێ نەبیت كۆ فێری رێزمانەكا باش نەبین دێ شاشیێن رێنڤیسێ ژی گەلەك د زۆربن و گۆت (ب تایبەت نوكە د سوشیال میدیایێ دا دێ بینی ب ڕێژەیا 60% ژی شاشیێن مەزن یێن رێنڤیسێ هەنە، ژ بەر هندێ یا پێدڤی یە ئەم بەردەوام بنڤێسین و بخوینین و هەمی دەما بزاڤێ بكەین شاشیێن خۆ یێن رێنڤیسی ڕاستڤەكەین).
