رەشمالا خیلان دوبارە هاتە ژەنین
ئەڤرۆ نیۆز:
سێ مۆزیکژەنان، ئاوازا ئێک ژ بەرهەمێن ناڤدارێن هونەرمەند «مەزهەر خالقی» بناڤێ رەشمالا خیلان دووبارە ژەنی و کار بۆ وێ چەندێ دکەن پشکەک ژ سترانێن ناڤدارێن کوردی وەکو بەرهەمەکێ مۆزیکێ پێشکێش بکەن.
رزگار حەمە رەئوف، هونەرمەند و ئێک ژ مۆزیکژەنێن پشکدار د بەرهەمی دا دیار کر کو وان پێخوەش بوو وەکو رێزەک بۆ مامۆستا مەزهەر خالقی ئەڤێ سترانێ هەلبژێرن و تێکەلی دەنگێ کەمان و عود و شمشالێ بکەن و بۆ رووداو گۆت: «ئەز ب ئمیرێ شمشال و کاروان محەمەد ب ئامیرێ ڤایۆلین و شیشیار ئەسوەد ب ئامیرێ عودێ پشکداربووینە».
ناڤهاتی ئاماژە دا وێ چەندێ کو ئەڤ بەرهەمە بۆ ئەرشیفێ وان ب خوەیە د هەمان دەم دا مەرەما وان خزمەتا هونەرێ نوو یێ کوردی یە و گۆت: «مە ب گرنگ زانی سترانێن کوردی ب شێوەیێ مۆزیک ژی هەبن بۆ وێ چەندێ ئەو میلۆدیێن کوردی بەردەوام بکەڤنە بەر دەستێ گوهداران، هیڤیدکەین ل پاشەرۆژێ هەمان کاری بۆ پشکەکا سترانێن ناڤدار و رەسەنێن کوردی بکەین».
رزگاری سوپاسیا وان کەسان کر یێن کو د بەرهەمئینانا ڤی کارێ هونەری دا ماندی بووین ژوان ژی دەرهێنەر هونەر دیلۆن کو ئەڤ بەرهەمە کلیپ کریە و دلێر سەلیم کو هاریکاریا ڤی بەرهەمی کریە.
ڤیدیۆ کلیپا مۆزیکا سترانا «رەشمالا خێلان» ل کەنالێ تایبەتێ هونەرمەند رزگار حەمە رەئوف ل یوتیوبی هاتیە بەلاڤکرن.
