پشتی رێكخستنا مە ئاشكرا بووی محمـود غلبیشی هاتە دەستەسەركرن و پاشی سێـدارەدان
دیدار، سالار محەمەد دۆسكی:
1-2
حەمید ئیبراهیم حەمید شیكەیی، ل سالا 1958 ل گوندێ دەرگەلا شیكەی یا ژ دایك بوویە، خواندنا سەرەتایی ل قوتابخانا نەوروز، ناڤنجی ل دهۆكێ و ئامادەیا پولیسان ب دووماهی ئینایە و ژ رێكخستیێن نهێنی بوویە دناڤا باژێری دا و ماوەكێ زور ل بنگەهێ پولیسان خزمەت كریە، دهێتە هەژمارتن ژ ئەندامێن شانێن دەسپێكیێن نهێنی دناڤا باژێری دا و پێنوسێ نهێنیێ بنگەهێ پولیسان بوویە، وەك ئاماژە پێ دكەت زێدەتر كارێ رێكخستنێ ل ژوورا بنگەهێ پولیسان دا دكر، و هەتا نوكە ژی شانازیێ ب وێ خزمەتا بۆ مللەتێ خوە كری پێ دكەت.
حەمید ئیبراهم حەمید د دیدارەكێ دا ل گەل رۆژناما ئەڤرۆ دیاركر، ل دەسپێكا شۆرەشا ئیلۆنێ پشتی تێكچوونا كاودانێن دەڤەرێ و بارودوخ ل گوندان تێكچوو و ئێدی خەلكی گوند بەردان و بەرەف باژێران هاتن، وی دەمی بابێ من گەلەك تەرش و كەوال هەبوو، وی دەمی گوندێ مە وەكی هەمی گوندێن كوردستانێ هاتە سۆتن، و گوندێ مە نێزیكی 40 خێزانا تێدا دژیان، و بابێ من ئەو دەمێ هاتینە دهۆكێ ئێدی بریاردان نەزڤرنە ڤە، و ل دەسپێكێ خێزانا مە ل تاخێ شێلێ ئاكنجی بوو، و دوڤدا چووینە تاخێ گرێ باسێ و ل مالا ئاغای ڤە ئاكنجیبووین.
حەمید ئەو ژی دیاركر كو ل سالێت شێستان بتنێ مە خواندن و ئەم بچوویك بووین و دروستبوونا هەستێ نەتەوەیی دناڤا گەنجان دا تایبەتی پشتی نسكۆیا سالا 1975ێ دروست بوو و گەلەك زولم و تەعدا ل خەلكێ مە هاتەكرن، و گەلەك عەشق و ڤیانا مللەتی و كوردینیێ بوومە چێبوو، وی دەمی ئەم گەنجێن تاخێ گرێ باسێ بووین، مە هەڤالەك هەبوو بناڤێ (ئلیاس حاجی پیرۆمەری) پەیوەندی ب مە كر، و گۆت گرنگە ئەم رێكخستنەكێ وەك گەنج دروست بكەین، و تایبەت ل تاخێ (گرێ باسێ) و ئەڤ دەرگەهە ڤەكر و مە هزرا وی ب بەرچاڤ وەرگرت و ل سەر دروستكرنا رێكخستێن نهێنی ل ناڤ باژێری رازیبوون، و پێشتر ئەم هەڤالێن ئێك بووین و مە ئێكو دو باش نیاسی، و ئەم ل تاخەكی بووین وی دەمی گەلەك یا ب نهێنی بوو، و ئەگەر تە باوەری ب كەسەكی نەهاتبا تو نەشیا ب چ رەنگ و شێوازن ل دەف باخڤی، و دەمێ مە پەیوەندی ب رێكخستنێ كرین و زێدەتر مە كومبوونێن خوە ل كولانێن تاخی یان مالێن ئێك و دو دكرن، وی دەمی (ئلیساس پیرۆمەری) پەیوەندی ل گەل خودێ ژێ رازی (محمود غلیشی) هەبوو، و بەرپرسێ رێكخستنێن نهێنیێن پارتی دیموكراتی كوردستان ل باژێرێ دهۆكێ بوو، و دووڤ دا هاتە دەستەسەركرن و هاتە سێدارەدان و خودێ ژێ رازی بیت.
حەمید شێكەی، ئەندامێ ئێك ژ شانێن رێكخستنێ یێن نهێنی دناڤا باژێری دا زێدەتر گۆت: گەلەك زی شانا مە یا رێكخستنێ هاتە ئاشكراكرن و ئەوی ماوێ نهێنی دا ئەم شیاین چەندین چالاكیان دناڤا باژێری دا ئەنجامدەین، و بەلاڤووك بوومە دهاتن و رۆژناما خەبات بوومە دهات و بیرا من دهێت جارەكێ مە بەلاڤووك ل دیوارێ قوتابخانا شورەش دان، وی دەمی دەنگڤەدانەكا مەزن دناڤا باژێری دا ڤەدا، و گەلەك رێكخستنا مە دووم نەكێشا و پشتی شەهید (مەحمود غلبیشی) هاتیە دەستەسەركرن، و هاتە سێدارەدان وی كەسێن بن خودا ئاشكراكرن، و بەرپرسێ مە (ئلیاس پیرۆمەری) ئاشكرا بوو وی دەمی ئەز چوو بوومە خولەكێ ل بەغدا (فەهیم عەبدوللا حەمو، دیندار گەرماڤی، عابد بێسری) ژیانا وان كەفتە د مەترسیێ دا، كەسەك هەبوو یێ پیرۆمەری دگۆتنێ (ئسماعیل حەسەن پیرۆمەری) یێ بەرنیاس بوو ب (سمائیلێ وەتفایێ) مرۆڤەكێ گەلەكێ كورد پەروەر بوو و یێ زیرەك بوو، وی(ئلیاس پیرومەری) قورتالكر و جلكێن ئافرەتا كرنە بەر و هەتا بێسرێ گەهاند و بەرەف پێشمەرگەی چوو و دووڤ دا ئەم ژی ئاشكرا نەبووین و ئەم ماینە دناڤا باژێری دا.
حەمید شیكەی گۆت: ل سالا 1976 ئەز بوومە فەرمانبەر ل بنگەهێ پولیسێن دهۆكێ وەك پێنوسێ نهێنی هاتمەدامەزراندن وی دەمی من كارێ تایپكرنا دەستی دكر ل بنگەهێ پولیسان وچوونا من بۆ بەغدا بۆ خولەكێ بوویە ل سەر تایپكرنێ و هەڤالێت منێن رێكخستنا نهێنی گەلەك پشتەڤانیا من كر بچمە وێ خولێ دا مفا بۆ رێكخستنێ ژی ژ من و ڤی كاری بهێتە وەرگرتن، پشتی چوویمە خولێ ل بەغدا و پشكداربوویم و ئێدی كارێ خوەیێ نڤێسینێ و كومكرنا ئابوونا و هەر تشتەك و نامەكا رێكخستنێ مە هەبا من ل بنگەهێ پولیسان ڤە چێدكر و پشتی هەمی چوونە مال بتنێ مام و من كارێ خوە دكر و ناڤێن مە هەمیان یێ دنهێنی بوون و پشتی من كارێ خوە دكر و من دووڤ دا رادەستی بەرپرسێ خوە دكرن، وی دەمی من هەست پێ دكر كو گیانێ مە دمەترسیێ دایە لێ خوینا مە یا گەرم بوو و ئەم گەنج بووین و نەتەوا مە بەری هەر تشتەكی بوو و گەلەك یا شرین بوو و من دگۆت دڤێت هەر ئێك ژ مە ل گورەی شیانێن خوە خەباتێ بۆ مللەتێ خوە بكەت.
حەمید شیكەی، زێدەتر گۆت: دەمێ شانا مە ئاشكەرا بووی و ژ بەغدا ڤەگەریایمە مال هەڤالێن من هاتن و گوتن هشیاری خوە بە و بەرپرسێ مە دەركەفتی یە و خوە قورتال كر و هەتا ئاستەكێ باش ئەم ب سلامەتین لێ دڤێت هەر مە ئاگەه ژ ئێك دو هەبیت و ب ئانەهیا خودێ ئەم ئاشكەرانابین، ئەوان رۆژا ترسەكا مەزن بوومە دروست بوو و مە هزر دكر گرتنا مە ل سەر خولەكانە و هەر پولیسەك یان ئێكێ ئەمنێ مە دیتبا مە هزر دكر یێ ل مەدگەریت و دێ مە دەستە سەر كەت و گەلەك ترس بوومە چێبوو و ناڤێن مە ئاشكرانەب بوون و چونكە دەمێ بەرپرسێ مە (ئلیساس) دەركەفتی گۆتی ژ خوە نەترسن و ناڤێن هەوە ئاشكرانەبووینە و بتنێ ناڤێ من ئاشكەرا بوویە و ئەگەر ئەز قورتال بووم و گەهشتمە جهەكێ ئێمن و پێشمەرگەی دێ هەوە ئاگەهدار كەم و ئێدی سەربەست هاتن و چوونێ بكەن .
حەمید شیكەی ئەو ژی گۆت: دەمێ مە كارێ رێكخستنێ دكر خێزانا من ئاگەه ژێ نەبوو و كەسەك پێ نەحەسیا و بتنێ هندەك هەڤالێن تاخی زانی ئەو ژی ئەو هەڤال بوون یێ جهێ باوەریا مە و شەڤ و رۆژان ئەم ل گەل ئێك بووین، دەمێ (مەحمود غلبیشی) هاتیە دەستەسەركرن و شەهیدكرن گەلەك شانێن نهێنی ل باژێرێ دهۆكێ ئاشكەرابوون وی دەمی ترسەكا مەزن دناڤا باژێری دا چێبوو و گەلەك ترس دناڤا خەلكی دا بەلاڤ بوو وی دەمی ئەم گەلەك عاجزبووین، وی دەمی ئەم تاخێ گرێ باسێ بووین وەك من زانی (محلا خستێ، بەرۆشكێ، محلا قەرچان، شێلێ) گەلەك شانە ئاشكەرابوون و گەلەك خەلك ئەوێ سالێ هاتنە دەستەسەركرن.
