خۆڕاگری و پێداگری كلیلا سه‌ركه‌فتنێ یه
ئحسان ئامێدی
گه‌لێ كوردستانێ ژ كه‌ڤندا خۆیاكریه كو ملله‌ته‌كێ خۆڕاگره، له‌وان یێ شیایی هه‌بوونا خوه یا نه‌ته‌وه‌یی بپارێزیت و گه‌شه‌یی پێ بكه‌ت. هه‌لبه‌ت ئه‌ڤ خۆڕاگریه به‌ست بوویه ب پێداگریا ملله‌تی ب هه‌بوون و مافین خوه.
خۆڕاگری و پێداگری دو توخمێن بنه‌كینه بۆ هه‌ر تاكه‌كی یان پیكهاته‌كێ بۆ سه‌ركه‌فتنێ.
هه‌بوونا مرۆڤی یا ئارمانجبه‌ره و كار و بزاڤ ژبۆ گه‌هشتنێ ب ئارمانجێ یا ب ره‌نج و زه‌حمه‌ته و دكه‌ڤیته هه‌مبه‌ری كۆمه‌كا كۆسپ و ئاسته‌نگان، و ل ڤێره گرنگیا خۆڕاگریێ و پێداگریێ دیاردبیت، دڤێت مرۆڤێ مافدار یێ بخوه باوه‌ربیت و خۆڕاگریت و پێداگریێ بكه‌ت و ب چ ره‌نگان ده‌ستان نه‌داهێلیت و پاشگه‌زنه‌بیت، ئه‌ڤه ژی ه‌ێ نیشاده‌ت كو هیزا باوه‌ریا وی موكوم و خورته.
خۆڕاگری و پێداگری پرسه‌كا ژیری و هزرییه به‌ری بیته هه‌لسوكه‌فته‌كێ مرۆڤی و ئه‌ڤه پتر ل ده‌ف سه‌ركرده‌یێن ژیرمه‌ند و دووربین هه‌یه و دكاریت خه‌لكێ ژی پی فێر بكه‌ت و بكه‌ته هه‌لسوكه‌فته‌كێ ته‌ڤایی بۆ گه‌هشتن ب ئارمانجێن ده‌ستنیشانكری.
دڤێت بزانین چ سه‌ركه‌فتن بێی زه‌حمه‌ت و قوربانیدان بده‌ستڤه ناهێن و یێ سه‌رفرازی بڤێت دڤێت ره‌نجێ بكێشیت و خوهێ ڤه‌مالیت و رۆندكان ببارینیت و خوه ل به‌ر نه‌خۆشیان بگریت و به‌رگریێ ژ هه‌بوون و مافێن خوه بكه‌ت و پێداگریێ ل سه‌ربكه‌ت تا بده‌ستڤه دئینیت.
بزاڤا رزگاریخوازا كوردستانێ، بزاڤه‌كا راست و ره‌وایه، له‌وا ژی سه‌ره‌رای وان هه‌می كۆسپ و ئاسته‌نگ و شكه‌ستنان، لێ باوه‌ری ژ ده‌ستنه دا و خۆڕاگرت و ده‌ستبه‌رداری مافێن خوه نه‌بوو، هه‌روه‌كو بارزانیێ نه‌مر ل شه‌ڕگه‌ها بجهئینانا رێكه‌فتنا خیانه‌تكاریا جه‌زائیرێ گۆتی (ئها نهو ژی ئه‌ز ئامه‌ده نینم ده‌ستبه‌رداری بهۆسته‌كا ئاخا كوردستانێ ببم)، به‌لێ خوه ل به‌ر پیلانێ راگرت و به‌رپسیاریا خوه هه‌لگرت و ئه‌ركێ خوه‌یێ نه‌ته‌وه‌یی و نیشتیمانی و جڤاكی بجهئینا و پێداگری كر ل سه‌ر بده‌ستڤه‌ئینانا مافێن ره‌وایێن ملله‌تی.
خۆشبه‌ختانه ئه‌ڤرۆ ژی سه‌ركردایه‌تیا سیاسییا هه‌رێما كوردستانێ ب تایبه‌تی رێبوارێن رێبازا بارزانێ نه‌مر ئه‌ڤ هه‌ردوو توخمێن كلیلا سه‌ركه‌فتنێ، خۆڕاگری و پێداگیری ب ده‌ستێ خوه ڤه گرتینه و كار و بزاڤا خوه پێ دكه‌ن دا بگه‌هنه ئارمانجێن خوه.
پارتیا دیموكراتیا كوردستانێ هه‌ر ژ دامه‌زراندنا خوه ل سه‌رده‌ستێ بارزانیێ نه‌مر، ئارمانجێن خوه ب زه‌لالی ئه‌شكه‌راكرن و ده‌ستنیشانا ئاسته‌نگ و قه‌پخوازیان كر و كار و خه‌بات بۆ كر و شییا خوه ڕابگریت هه‌مبه‌ری هه‌می وان ده‌ستدرێژی و دژمنكاریا و ده‌ستبه‌رداری مافێن ملله‌تی نه‌بوو، به‌لكی ل هه‌می كاودانان دا پێداگری لسه‌ر مافێن وی یێن ره‌وا دكر، تا شییای سه‌ربكه‌ڤیت و ده‌ستكه‌فتنان بده‌ستڤه بینیت، شۆرشا ئیلۆنێ و رێكه‌فتنا ١١ ئادارێ و شۆرشا گولانی و سه‌رهه‌لدانا گه‌لێ كوردستانی و دامه‌زراندنا هه‌رێما كوردستانی و هه‌لبژارتنێن په‌رله‌مانی كوردستانێ و راگه‌هاندنا فیدرالیه‌تێ و روخاندنا دكتاتۆریه‌تی و ئاڤاكرنا ئیراقا فیدرالیا دیموكراتی و شكاندنا داعش و ریفراندۆما سه‌ربه‌خوه‌یا كوردستانێ.
ل هه‌مبه‌ری ڤان سه‌ركه‌فتنا هه‌میان ژی ئاسته‌نگ و پیلان هه‌بوون، شه‌ڕێن ده‌وله‌تێ و گڤاشتنێن هه‌رێمایه‌تی، دوبه‌ره‌كی و ناكۆكیێن ناڤخوه‌یی، خیانه‌تا ٦٦ رێكه‌فتنا جه‌زائیرێ، شه‌رین ناڤخوه‌یی، ئه‌نفال و كیمیا باران، هێرشین تیرۆریستی و هۆڤانه، ژبه‌رئێكچوونا نافمالیا كوردستانێ و ده‌ستێوه‌ردانێن ده‌ره‌كی، ئابلۆقه‌یا ئابۆری، برینا بودجه‌ی، نه‌دانا مووچه‌ی، بریارێن سته‌مكارانه یێن دادگه‌ها فیدرالی دژی هه‌رێما كوردستانێ.
دگه‌ل ڤێ هه‌میێ ئیراده‌یا خۆڕاگریێ و پێداگریێ ب هێز خوه نیشادده‌ت و ل سه‌ر ئاسته‌نگ و قه‌پخوازیان ده‌ربازدبیت.
ل ماوه‌یێ بۆری دا ملله‌تێ كوردستانێ گه‌له‌ك ده‌رده‌سه‌ری دیتن و خوه ل به‌ر گرت و لدوماهیێ سه‌ركه‌فتن.
ئیراده‌یا خۆڕاگریێ و پێداگریێ سه‌ركه‌فت لسه‌ر گڤاشتنێن ناڤخوه‌یی، یێن خه‌لكی و هێزێن سیاسیێن كوردستانێ و ئیراقی سیاسه‌تێن حوكمه‌تێ و نه پێگیركرن ب ده‌ستووری و رێكه‌فتنێن هه‌ڤپشك و هه‌لسوكه‌فتێ نه‌رینیێ هێزێن شۆفینست و تایفه‌گێر و برسیكرنا خه‌لكی و بریارێن دادگه‌ها سته‌مكار، و گڤاشتن و ده‌ستدرێژیێن ده‌وله‌تێن هه‌رێمایه‌تی.
ب راستی گه‌ف و هه‌ڕه‌شه و گڤاشتن گه‌له‌كن، یا شه‌رمزار و دلئێشتر هه‌لسوكه‌فتێ هنده‌ك لایه‌نێن خوه ب كوردستانی دانن و د سه‌نگه‌رێ دژمنی دانه و سكالایێن خوه دژی سه‌روه‌ری و شایسته‌یێن هه‌رێمێ ل دادگه‌هێن ده‌رڤه‌ی هه‌ریمێ دكه‌ن و هه‌ولده‌ن هه‌رێمێ لاواز و بێ ئیراده‌كه‌ن!، و یا سه‌یرتر د ته‌نگاڤیان دا گازندا و هه‌ره‌شه‌یان دكه‌ن و هه‌می ئه‌وا ب سه‌رێ هه‌رێمێ دئینن دكه‌نه سویچا پارتی و سه‌ركردایه‌تیا وێ، و هه‌كو بوو به‌رفره‌هی و ده‌ستكه‌فتی هاتن دێ خوه كه‌نه خودان و هه‌ڤپشك!، ژبیرا خوه دبه‌ن ملله‌تێ هشیاره و چاڤێن وی دڤه‌كرینه و گوهێن وی دڤه‌چنینه و ئاگه ژ هه‌ر تشته‌كی هه‌یه، دزانن كی خودانه و هه‌ست ب به‌رپرسیاریێ دكه‌ت و ده‌ربرینێ ژئیراده‌یا ملله‌تی دكه‌ت و خوه لێ دكه‌ته خودان و خوه‌رادگریت و به‌رگریێ دكه‌ت و پێداگریێ دكه‌ت تا سه‌ردكه‌ڤیت، ئه‌ڤه ئیراده‌یا گه‌لێ كوردستانێ یه خوه د سه‌ركردایه‌تیا سه‌رۆك بارزانی و سه‌رۆكێ هه‌رێمێ و سه‌رۆكی حوكمه‌تا هه‌رێما كوردستانێ دبینیته‌ڤه.
خۆڕاگری و پێداگریا رێزدار مه‌سرۆر بارزانی سه‌رۆكێ حوكمه‌تا هه‌رێما كوردستانێ لسه‌ر ماف و ئارمانجێن ملله‌تی، شییا لایه‌نێن په‌یوه‌ندیدار نه‌چاركه‌ت بهێنه سه‌ر رێكا راست و چاره‌سه‌ریا كێشه‌یان بكه‌ن، ڤی هه‌لوه‌ستێ نه‌ته‌وه‌یی و مرۆڤی وه‌كر كو ل دوماهیێ ئیراده‌یا خۆڕاگریێ و پێداگریێ سه‌ربكه‌ڤیت و ماف و شایسته‌یێن خه‌لكێ كوردستانێ بۆ ڤه‌گه‌رن.
هه‌لبه‌ت ئه‌ڤ پرس و كێشه‌یه یێن خه‌لك و هه‌رێما كوردستانێ نه و سه‌رۆكاتیا هه‌رێما كوردستانێ لێ به‌رپرسه، هه‌ر ئه‌و ده‌ستهه‌لاتدار و رێپێدایه كو لێ خودان ده‌ركه‌ڤن و چاره‌سه‌ریا بۆ ببینن، و خوه‌شبه‌ختانه حوكمه‌تا هه‌رێمێ خوه ژ به‌پرسیاریێ نه‌دا پاش و خوه لێ نه‌ڤه‌دزی، به‌لكی لێ خودان ده‌ركه‌فت و ل سه‌ر راوه‌ستا و پێداگری ل سه‌ركر هه‌تا ب سه‌رفرزای تێدا سه‌ركه‌فتی، له‌وا ئه‌ڤ سه‌رفرازیه بۆ وان دزڤریت و هه‌ژی ده‌ستخۆشی و رێزلێنانێ نه، و ئه‌وێن گازنده كرین و سست و لاوازی نیشادای و ده‌ستبه‌ردای ماف و شایسته‌یێن هه‌رێمێ بووین كه‌ڤتنه د خه‌نده‌كا رویره‌شیێ دا.
سه‌ركه‌فتن هه‌میشه بۆ خۆڕاگر و پێداگرێن دلسۆز و خه‌مخۆره، یێن كو شیایین هه‌رێما كوردستانێ دامه‌زرینن و بپارێزن و گه‌شه‌یێ پێ بكه‌ن.
