سەرمووچەیێ زێدەتر ژ 14 هزار پێشمەرگەیان دێ زێدەبیت
ئەمیر ئەترووشی:
وەزارەتا پێشمەرگە یا حوكمەتا هەرێما كوردستانێ راگەهاند، دێ سەرمووچەی دەتە زێدەتر ژ 14 هزار پێشمەرگەی و ژمێریارییا وەزارەتێ ژی تەكەز كر، دێ ل دووڤ پلەیێن وان مووچەیێن وان زێدە بیت. ل دووڤ فەرمانەكا وەزارەتا پێشمەرگەی یا حوكمەتا هەرێما كوردستانێ، ب فەرمانا وەزیرێ پێشمەرگەی، سەرمووچە دایە 14 هزار و 288 پلەدار و پێشمەرگەیان.
ل دووڤ فەرمانی، كۆ ل مەها بووری دەرچوویە، ب دوو لیستان سەرمووچە دایە پێشمەرگەی، دیوانا وەزارەتا پێشمەرگەی و لیوایان، لیستەكا سەرمووچە دایە 13 هزار 377 پلەدار و پێشمەرگەیێن دیوانا وەزارەت و رێڤەبەراتیان، لیستا دووێ یا سەرمووچەی دایە 10 هزار و 579 پلەدار و پێشمەرگەیێن لیوایان.
لیستا سێ یێ، سەرمووچە دایە هزار و 788ی هێزێن پشتەڤانیا ئێك، لیستا چارێ ژی ژ ناڤێن 559 پلەدار و پێشمەرگەیێن هێزێن پشتەڤانیا دوو پێكهاتیە. سەرمووچەیێ وان پلەدار و پێشمەرگەیان دێ ژ لیستا نەورۆزا 2024 بیت، فەرمان دێ ژ خشتە و مووچەیێن نەورۆزا 2024ێ هێتە جێبەجێ كرن. ل دووڤ ڕێنمایێن وەزارەتا پێشمەرگەی، ژبەر سەرمووچەیێن وان، مووچەیێ وان كەسا ل دووڤ پلەیێن وان دێ زێدە بیت.
ژێدەرەكێ ل ژمێریارییا وەزارەتا پیشمەرگەی ڕاگەهاند: «پارێ سەرمووچەیێ وان پێشمەرگا دگەل لیستا مووچەیێ هەیڤا پێنج دێ هێتە گرێدان، ژبەركۆ زێدەتر ژ 15 ڕۆژایە لیستا مووچەیێ هەیڤا چار تمام كریە و فەرمان ژی تازە هاتیە.»
ل دووڤ یاسایا وەزارتا پێشمەرگەی، پلەبلندكرن و سەرمووچەیێ پێشمەرگەی دێ ب دوو خشتەیێن سالانە بیت، كۆ دبێژنێ خشتەیێ نەورۆز و ئیلوولێ.
لیوا هۆشمەند حەیدەر، جێگرێ سوپاسالارێ پێشمەرگەی بۆ كاروبارێن ئیداری و میری، ڕاگەهاند: «سەرمووچەیێ نەورۆزا ئەڤساڵە، دێ دگەل مووچەیێ هەیڤا ئایارێ هێتە گرێدان و ژمێریاران ژی كارێن خۆ دەست پێكریە.»
وی بەرپرسێ ئیدارا پێشمەرگەی ئاماژە ب وێ ژی دا: «پلەبلندكرن و سەرمووچەیێ وەزارەتا پێشمەرگەی ب شێوەیەكێ ڕێكوپێك و د دەمێ هنارتنا وان ژلایێ ژمێریاران ل دووڤ یاسا و ڕێنمایان دهێتە كرن.»
