نوكه ئه‌ز مژوولی دۆکیۆمێنتکرنا هەموو بیرهاتنێن خوە مە
زنار تۆڤی:
هونه‌رمه‌ند حه‌سه‌ن شه‌ریف، د دیداره‌كێ دا بۆ رۆژناما ئه‌ڤرۆ دیار كر: د نوكه دا چێكرنا ئه‌لبۆمان كاره‌كێ ب زه‌حمه‌ته، دیسا ژی ئه‌ز ل گه‌ل هندێ مه كو مرۆڤ كارێ خۆ وه‌كو ئه‌لبۆم، لدووڤ سیسته‌مێ نوو چێكه‌ت و ل پلاتفۆرمان به‌لاڤ بكه‌ت، هه‌روه‌سا نوكه هژماره‌كا كارێن نوو یێن هونه‌ری لبه‌ر ده‌ستێ من هه‌نه، هه‌ر سترانه‌كا نوو یا ئه‌ز چێدكه‌م و چیرۆكه‌ك و مه‌ره‌مه‌ك تێدا هه‌یه، كو سترانا « ته‌نیرڤان» ئێك ژ وان سترانایه، كو مه‌ره‌م ژێ ڤه‌گه‌راندنا ژینكه‌ها كوردستانێ یا كه‌ڤنه، ئه‌شق و ئه‌ڤینا گوندایه، هنده‌ك كارێن داستانی ژی مه چێكرینه.
ناڤهاتی گۆت ژی: ئه‌ز حه‌ز دكه‌م ل هه‌موو باژێرێن كوردستانێ كۆنسێرتا بگێرم و سترانێن خۆ پێشكێشی خه‌لكێ خۆ بكه‌م، هه‌ر چه‌نده دبیت ئه‌و كاره د شیانێن مه‌دا نه‌بیت، له‌وما هه‌تا نوكه مه ئه‌و كۆنسێرته نه‌كرینه، دیسا ده‌مێ ئه‌ز ستران و كلیپێن خۆ به‌لاڤ دكه‌م، ئه‌ز چ ژ وان ستران و كلیپێن خۆ سپۆنسه‌ر ناكه‌م، د پلاتفۆرمێن دیجیتالی دا كلیپێن من چه‌ند ڤیۆ هه‌بن، ئه‌و ڤیۆیه هه‌موو د سرۆشتی نه و سپۆنسه‌ر ناكه‌م، هه‌روه‌سا نوكه گوهداریكرنا سترانان بچووك بوویه، ته‌كنولۆجیا نوو وه‌كریه، كو ژیان بچووك بیت و ب ڤی ره‌نگێ نوكه بیت.
حه‌سه‌ن شه‌ریف هێشتا دبێژیت: هه‌كه سترانبێژه‌كی بڤێت، هه‌رده‌م به‌رهه‌مه‌كێ بابش چێكه‌ت و خه‌لك ژی پتر گۆهدارییا سترانێن ی بكه‌ن، دڤێت خۆ نووژه‌ن بكه‌ت و لدووڤ ته‌كنیكا نوو كار نه‌كه‌ت، دێ مینیته د جهێ خۆدا و پێشناكه‌ڤیت، له‌وما هنده‌ك شیان لده‌ف من هه‌نه و من دڤێت هه‌رده‌م خزمه‌تا گه‌لێ خۆ بكه‌م، هه‌روه‌سا بۆ ده‌مێن بهێن ژی، من هنده‌ك سترانێن رامیاری و ره‌خنه‌یی و داستانی هه‌نه، ل ڤان هه‌یڤێن بهێن، دێ هنده‌ك ژ وان سترانان ژی به‌لاڤ كه‌م، دیسان ب ستایلێ خۆیێ كه‌ڤنار و پیچه‌كێ نووژه‌نكرن، ژ لایێ ته‌كنیكێ و هۆستایا ده‌نگی و موزیكی دا، ئه‌ز شیایمه به‌رده‌وامیێ بده‌مه هونه‌رێ خۆ، من لبه‌ره هنده‌ك سترانێن خۆ یێن كه‌ڤن ژی نوو بكه‌م، هه‌كه ده‌لیڤه هه‌بیت، دێ هنده‌ك ژ وان سترانان نووژه‌ن كه‌م و وه‌كو ئه‌رشیف به‌لاڤ بكه‌م.
هونه‌رمه‌ند حه‌سه‌ن شه‌ریف هێشتا دبێژیت: نوكه ئه‌ز مژوولی هندێ مه، كو ئه‌ز بخۆ، هه‌موو بیرهاتنێن خۆ یێن سێ قووناغێن ژیانا خۆ دكیۆمێنت بكه‌م، هه‌تا نوكه من چه‌ندین تشت نڤێسینه، ئه‌و تشتێن من د ژیانا خۆدا دیتین، دێ نڤێسم، دیسان ئه‌ز خۆ مه‌قدور نابینم، چونكی ملله‌تێ مه حه‌زه‌كا مه‌زن بۆ هونه‌رێ من هه‌یه و ئه‌ڤه مه‌زنترین ده‌وله‌مه‌ندییه بۆ من، هندی د ژیانێ دا مابم دێ خزمه‌تا هونه‌رێ كوردی كه‌م و ئه‌و حه‌ز و ڤیانا خه‌لكێ بۆ هونه‌رێ من هه‌یی، گرنگییه‌كا هه‌ره مه‌زنه به‌رامبه‌ر هونه‌رێ من، ئه‌ڤێ وه‌كریه كو ئه‌ز به‌رده‌وام كارێن ژ هه‌ژی پێشكێشی وان بكه‌م.
