سترانا عیسێ ده‌لا كاره‌كێ مه‌زنه و داستانه‌كه دهێته تۆماركرن
ئامێدیێ، مه‌حمود نهێلی:
هه‌لبه‌ستڤانێ ژێهاتی و مه‌زنێ كوردستانێ ، ئه‌دیب چه‌لكی د چاڤپێكه‌فتنه‌كی دا بۆ رۆژناما ئه‌ڤرۆ دیار كر، نوكه گه‌له‌ك كارێن وی د رێ دانه لێ كارێ ژ هه‌موویان مه‌زنتر نوكه ئه‌و مژوولی چێكرنا كلیپا عیسێ ده‌لا یه كو دێ ژلایێ هونەرمەند حه‌سه‌ن شه‌ریف ڤه هێته گۆتن .
و گۆت: عیسێ ده‌لا وه‌زیر و ئاقلمه‌ندێ میرێ ئامێدیێ یوویه تایبت ل گه میر به‌هرام ، ئه‌و بخوه ل گه‌ل سێ میران یێ ژیایی به‌لێ پتر ل گه‌ل میر به‌هرام پاشایێ دوویێ بوویه كو ل سالا 1714 تا 1767 میرێ ئامێدیێ بوویه.
و دیاركر، ئه‌و ستران ل سه‌ر رۆلێ عیسێ ده‌لایه د رێڤه‌برنا میرگه‌ها به‌هدینان دا و گۆت : كاره‌كی مه‌زنه دااستانه‌ك دهێته توماركرن كو بۆ ماوێ وێ حه‌فت خۆله‌كن و هیڤیدارین جهێ رازیبوونا خه‌لكی بیت.
و گۆت: ئه‌ڤ سترانه ژ په‌یڤێن منن و پرۆژێ وێ ئه‌ز پێرابوویمه هه‌روه‌سا سیناریۆ من یا به‌رهه‌ڤكری ل گه‌ل ده‌رهێنه‌ری و ئاواز و گۆتن ژلایێ هونه‌رمه‌ندێ گه‌لێ مه حه‌سه‌ن شه‌ریف ڤه دێ هێته گۆتن و گه‌له‌ك خوه‌ش یێ گۆتی و ب دیتنا من ئاوازا وێ ژی ئاوازه‌ك نمونه‌یه و ژ خوه‌شترین ئاوازێن سترانێن حه‌سه‌ن شه‌ریفن و گه‌له‌كا تایبه‌ت و جودایه و حه‌فت خۆله‌ك ده‌رباز دبن مرۆڤ نزانیت چاوا ده‌رباز دبیت و كارێ ده‌رهێنان ژی ژلایێ ماموستا كامیران بێتاسی ڤه دهێته ئه‌نجامدان و كلیپا وێ دێ ل ده‌ڤه‌را ئامێدیێ هێته ئه‌نجامدان.
و دیاركر، كارێ وێ گه‌هشتیه قووناغێن ستران وه‌ك مۆزیك و تۆماركرنا ده‌نگی ب دووماهی هاتیه و بتنێ ڤیدیۆ كلیپ مایە گۆت: ڤیدیۆ كیلپا وێ دێ ل ڤێ ده‌ڤه‌رێ هێته چێكرن هه‌ر ل ده‌ڤه‌را ده‌شتا زێ و دێره‌لۆكێ تا دگه‌هیته ئامێدیێ و بامه‌رنێ و هند دیمه‌نێن دی ژی دێ ل زاخۆ و دهۆكێ و جهێن دیترێن ده‌ڤه‌را به‌هدینان هێنه وێنه‌كرن.
ده‌رباره‌ی گرنگیا ڤی به‌رهه‌می ناڤهاتی دیاركر، ژ به‌ر كو عیسێ ده‌لا فه‌یله‌سوفه‌كێ ملله‌تێ كورد بوویه و ئاقلمه‌نده‌كێ مه‌زن بوویه و ئامێدیێ ژی پایته‌ختێ میرگه‌ها به‌هدینان بوویه و گۆت: رۆله‌كی مه‌زن هه‌بوویه د ئاڤاكرن و پێشخستنا ده‌ڤه‌رێ دا و شه‌رفخانێ بدلیسی دبێژیت : ل سه‌ر ده‌مێ عیسێ ده‌لا سه‌نته‌رێ علم و زانینێ ئامێدیێ بوویه ل سه‌ر ئاستێ كوردستانێ و ئه‌ڤه ژی خاله‌كا گه‌شه د دیرۆكا گه‌لێ مه دا و ئه‌ڤه ژی گه‌له‌كا گرنگه كو خه‌كێ مه دیرۆكا مه بزانن و بزانن عیسێ ده‌لا چ كه‌سه‌كێ به‌ركه‌فتی بوویه.
ناڤهاتی ته‌كه‌ز كر، كاروانێ نڤیسینا هه‌لبه‌ستا یێ به‌رده‌وامه و دێ به‌رده‌وام بن لێ هه‌ر تشته‌ك دده‌مێ خوه دا، لێ ئاریشا مه دنوكه دا سپونسه‌ر دكێمن.
ده‌رباره‌ی كا چ به‌رهه‌مه‌كی وی پتر هه‌موویان بدلی وی بوویه هه‌لبه‌ستڤان ئه‌دیب چه‌لكی گۆت: مرۆڤ نه‌شێت بێژیت ئه‌ڤ به‌رهه‌مه یێ ب دلێ من بوویه و یان ئه‌ڤه ژی ب دلێ من نه بوویه هه‌موو به‌رهه‌مه‌كی من ب دلی من بوویه و ئه‌ز یێ پێ رازیمه لێ وه‌ك ڤیدیۆ كلیب و هه‌لبه‌ست بخوه ژی ئه‌ز گه‌له‌ك حه‌ژێ دكه‌م ، میرا په‌ریا ، ل ئه‌لمانیا و هوله‌ندا یێ هاتیه وێنه كرن و سترانه‌كه كه‌لتور و فلوكلور و دیرۆك و ئه‌فسانه‌یا ملله‌تێ مه یێ كورد من یێ تێدا بكار ئینای و هه‌لبه‌ست یا ده‌وله‌مه‌نده و كلیپ ژی ب دلێ من هاتیه چێكرن ، و ستران ژی ژلایێ به‌دیل ئیبراهیم ڤه هاتیه گۆتن كوردێ باكوره ل ئه‌لمانیا دژیت و كلیپا وێ ژی عادل ئاكره‌ی یێ چێكری ، كو ئه‌ڤه ئێكه ژ جوانترین كلیپێن تا نوكه بۆ كارێن من هاتیه چێكرن و ڤیدیو كلیپ ژی گه‌له‌كا جوانه .
و گۆت: گه‌له‌ك كارێمن دی یێن جوان یێن هاتینه چێكرن وه‌ك كاروانێ پیرۆز و داستانا شێخ عه‌بدولسه‌لامێ بارزانی و هه‌ر دوو سرۆدێن پێشمه‌رگه و شنگالێ و تو به‌حسێ كێژێ بكه‌ی ئێك ژ ئێكێ جوانتره.
ده‌رباره‌ێ وێ یه‌كێ كیش ستران بێژی پتر هه‌موویان كلیپێن وی ب كار ئیناینه ناڤهاتی دیاركر، پشكا شێری یا هه‌لبه‌ستێن من یا گه‌شتیه هونه‌رمه‌ندێ مه‌زنێ گه‌لێ مه حه‌سه‌ن شه‌ریف وه‌ك ئه‌یوب عه‌لی و زه‌كه‌ریا كو گه‌له‌ك جوان گۆتینه بتایبه‌تی ژی سترانا سه‌رێ گاره‌ی هه‌ر ئاڤا بكه به‌س نزانه ئه‌ڤه ده‌مه‌كێ درێژه یێ بێده‌نگ بوویی، هه‌كه راستی هونه‌رمه‌نده‌كی خوادان شیانه و گۆت : لێ ل گه‌ل هونه‌رمه‌ند حه‌سه‌ن شه‌ریف كاروانێ مه به‌رده‌وامه.
