من دڤێت تشتەکێ جوان ل هونەرێ كوردی زێدە بكەم
سترانبێژ (بەهمەن سەفەری) د دیدارەكێ دا بۆ رۆژناما ئەڤرۆ گۆت: ژبەر چەند ئەگەرێن تایبەت بۆ دەمێ چەند سالان ژ سترانگۆتێ دووركەفتم، بەلێ بەری هەیامەكێ من كلیپەك ب ناڤێ (نێچیرڤانێ هەمیان) چێكر، كو ژ پەیڤێن بورهان زێباری و ئاواز منە، بۆ زانین من گەلەك ستران هەنە و هەتا نوكە نێزیكی بیست و چار تراكێن ئامادە ل بەردەستێ منن، بەلێ ژ بۆ ئەنجامدانا ئەڤی كاری مەزاختیەكێ مەزن دڤێت و من ئەو مەزاختیە نینە و تشتێ نوو ل بەردەستێ منە.
هەروەسا گۆت: بابێ من سەفەرێ نەقەبی سترانێن فلكلۆری دبێژیت و من گوهداریا بابێ خوە ومحەمەد عارفێ جزیری و گەلەك هونەرمەندێن دی كریە و هەركەسەكێ سترانێن ئەڤان هونەرمەندان نەزانیت ناهێتە هژمارتن سترانبێژ و من گەلەك مفا ژ بابێ خوە دیتیە و شانازیێ ب وی و هونەرێ وی دبەم و ستایلێ من و بابێ من وەكو ئێكە، بۆ زانین بەری پشكداری بەرنامەیێ (رێكا ستێرا) ببم من ل گەل بابێ خوە ستران گۆتینە و شیرەت و ئاخفتنێن لژنەیا پرۆگرامی بۆ من گەلەك ب مفا بوون و ب رێكا وی بەرنامەی چوومە دناڤ جیهانا سۆشیال میدیایێ دا و من دڤێت تشتەكێ جوان ل هونەرێ كوردی زێدە بكەم.
