مەشیا مۆزیكا كوردی یا فۆلكلۆری بكەینە د سیستەمێ خواندنا كونسێرڤاتوریا چایكوڤسكی دا
كاوین جیهاد:
گرۆپەكێ مۆزیكژەنێن كورد بەری چەندەكێ سەرەدانا وەلاتێ رۆسیا كربوون و هژمارەكا كونسێرت و ئاهەنگان ل وی وەلاتی گێرابوون و ب گۆتنا سەرۆكێ گرۆپی وان هندەك دەستكەفتێن باش بۆ مۆزیكژەنێن كورد ل وی وەلاتی ب دەستڤەئیناینە.
مۆزیكژەن(مێهڤان حسێن) كو ژ پارێزگەها دهۆكێ یە و سەرۆكێ وی گرۆپی بوو، ل دۆر گرنگیا وێ سەرەدانێ بۆ رۆژناما ئەڤرۆ گۆت: هەلبەت سەرەدانەكا سەركەفتی بوو، چنكو مەشیا مۆزیكا كوردی یا فۆلكلۆری بكەینە د سیستەمێ خواندنا كونسێرڤاتوریا چایكوڤسكی دا، كو مەزنترین پرۆسێسا خواندنا مۆزیكێ یە ل وەلاتێ رۆسیا، ئەز دبینم ئەڤە سەركەفتنەكا مەزن بوو بۆ دیرۆكا مۆزیكا كوردی، هەروەسا مە زەمالا خواندنێ بۆ چەند مۆزیكژەنێن كورد ل رۆسیا وەرگرت، كو ئەڤەژی دەستكەفتەكێ مەزن بوو، مەزاختی ژی دێ ل سەر وی وەلاتی بن.
هەروەسا گۆت: ل بەرە بۆ جارا ئێكێ كارەكێ ئۆركێسترانێ یێ هەڤپشك دناڤبەرا هژمارەكا مۆزیكژەنێن كورد و رۆسی ل هەرێما كوردستانێ بهێتە گێڕان، كو دوێ سەرەدانێ دا ئەڤ چەندە ل رۆسیا ل گەل خواندنا چەند هەلبەستێن كوردی و ئامیرەیێن مۆزیكا كوردی هاتە گێڕان، هەروەسا چەند لاوك و پەستە ژی هاتنە پێشكێشكرن، پێشكێشكارا كۆنسێرتێ (د. سڤێتلانە راوەندی فادیا) مەزنە تویژەرا پەیمانگەها رۆژهەلاتا ناڤەراست) بوو، شاندێ مۆزیكەژەنێن كوردستانێ ژمن وەك (مێڤان ئەمین) لێدەرێ قانۆنێ و سەرپەرشتێ گرۆپی و (زانا جەبەلی) لێدەرێ عۆدێ و سترانبێژ و ( فەرمەند خەیلانی) لێدەرێ زۆرنایێ و بلۆلێ و (ژینا خۆلقی) لێدەرا دەفێ پێك دهات و (هەڤال حەمدی) رێڤەبەر و سەرپەرشتێ گرۆپی بوو.
