هەتا نوكە پتری هزار كەسان فێری شۆفێریێ كرینە
شاكر ئەتروشی:
سیوف محەمەد، رێڤەبەرا نڤیسنگەها بێسرێ یا قێركرنا شۆفێریێ ل دهۆكێ، د دیدارەكێ دا بۆ رۆژناما ئەڤرۆ گۆت: دژیەكێ بچووكدا من حەزژ هاژۆتنا ترۆمبێلێ دكر و پشتی گەهشتیمە ژیێ گۆنجای بۆ دەمەكی من ل نڤیسینگەهەكێ كار، پاشی ل 2020 ئەڤ نڤیسینگەها تایبەت بۆ خوە ڤەكر و خۆشحالم كو ئەز ئێكەم ژنم ل دهۆكێ من نڤیسنگەها شۆفێریێ ڤەكری و د ماوێ بۆری دا من و هەڤالا خوە ( دلڤین كاوە) پتری هزار كچ و ژنان فێری هاژۆتنا ترۆمبێلێ كرینە، كو هندەك ژوان كچ و دایك بوون، هندەك ژی بویك و خەسی و …. هتد.
سیوفێ گۆت: مەرجێ سەركەفتنێ بۆ هەر كارەكی و هەر رەگەزەكی ئەوە مرۆڤ خوە نەترسینیت، لەورا دەمێ هەر كچەك یان ژنەك دهێتە دەف مە ئەم دبێژینێ هەكە خوە نەترسینی دێ فێری هاژۆتنێ بی و هەكە دێ خوە ترسینی ژی یا ب زەحمەتە، لێ سوپاس بۆ خودێ هەر كەسەكا هاتبیت و دماوێ دەه رۆژان دا مە فێركریە و پتریا وان موولەتێن هاژۆتنێ وەرگرتینە و نوكە خودان ترۆمبێلن و ب سوپاسی ڤە رێڤەبەریا هاتن و چوونێ ل گەل مە دهاریكارن و پەیوەندیێن بهێز یێن كاری دناڤبەرا مە دا هەنە، بۆ زانین ئەم بەس ئافرەتان فێری شۆفێریێ دكەین و كەسێن دهێنە دەف مە ژیێ وان ژ (18) سالیێ دەستپێدكەن هەتا دگەهنە (60) سالیێ ژی، كو هندەك ژوان ل ئۆرۆپا دهێن، چنكو ل دەف فێركرن گەلەكا گرانە.
