ئەڤرۆ (44) كەڤال دێ ل هۆلا چالاكیێن قوتابخانەیان هێنە نیشادان
هەرهین محەمەد:
ل ژێر چاڤدێریا رێزدار(د. ئالان حەمە سەعید) وەزیرێ پەروەردێ ل حكومەتا هەرێما كوردستانێ، رێڤەبەریا چالاكیێن قوتابخانەیان، كو سەر ب رێڤەبەریا گشتی یا پەروەردێ ل پارێزگەها دهۆكێ، ئەڤرۆ دێ خولا چارێ یا گەلەریا چالاكێن قوتابخانەیان بۆ (44) ماموستاێن شێوەكارل سەرانسەری پارێزگەها دهۆكێ ل هولا چالاكیێن قوتابخانەیان ڤەكەت.
بێوار عەلی بداخ، رێڤەبەرێ چالاكیێن قوتابخانەیان ل پارێزگەها دهۆكێ، د دیدارەكێ دا بۆ رۆژناما ئەڤرۆ گۆت: خولا چارێ یا گەلەریا چالاكیێن قوتابخانەیان (44) ماموستایێن شێوەكار ب چل و دو كەڤال و دو پەیكەران پشكداری كریە و مەرەم ژ ڤەكرنا ڤان پێشنگەهان ئەوە مامۆستایێن شێوەكار پتر نێزیكی ئێك بن و ستایلێن ئێك و دو بزانن و مفای ژ هزرێن هەڤدۆ وەربگرن.
هەروەسا گۆت: بەری نوكە گەلەری نە بوو، ئەڤە بۆ دەمێ چارسالانە گەلەری هاتیە ڤەكرن و پشكا چالاكیێن قوتابخەیانان هندەك مامۆستایان ل سەرانسەری پارێزگەهێ دەستنیشاندكەن و ئەو مامۆستایە كەڤالێن خوە چێدكەن و بۆمە دهنێرن و دەسنتیشانكرنا بابەتێ كەڤالان هەر ب هزرا مامۆستایان ب خوە یە، ئانكو ئەو د ئازاد بووینە دچێكرنا كەڤالان دا ل سەر چ بابەت بیت.
