ژ بەر قەیرانا ئابووری ئاکپارتیێ پشتەڤانیا خەلکی ژ دەست دایە
کۆمپانیەکا راپرسیان ل تورکیا دیار دکەت وان دەست ب راپرسیەکا مەیدانی ل هەموو باژێرێن تورکیا کرینە و د ئەنجام دا دیار بوویە هەکە نها ل تورکیا هەلبژارتن بهێنە کرن دێ پارتا کۆماریا گەل بیتە پارتا ئێکێ و ژ بەر قەیرانا ئابووری ئاکپارتیێ پشتەڤانیا خەلکی ژ دەست دایە.
کۆمپانیا ئاسال یا راپرسیان د داخۆیانیەکێ دا راگەهاند کو وان دەست ب راپرسیەکا مەیدانی ل دۆر هەلبژارتنان ل تورکیا کرینە و د ئەنجاما راپرسیێ دا دیار بوویە هەکە نها ل تورکیا هەلبژارتن بهێنە کرن دێ پارتا کۆماریا گەل ٣٤.٥٪ ژ دەنگان بدەستڤە ئینیت و ل هەمبەر دا رێژەیا دەنگێن ئاکپارتیێ ژی ٢٩.٨٪ ە و ئەو یەک ژی نیشا ددەت کو رێژەیا دەنگێن ئاکپارتیێ ل گۆر هەلبژارتنێن بۆری گەلەک کێم بووینە.
هەمان کۆمپانیێ ئەو یەک ژی دیار کریە ل گۆر ئەنجاما راپرسیێ دەمێ پرسیار ژ خەلکی هاتیە کرن کا بۆچی هوون ڤێجارێ دەنگێ خوە نادەنە ئاکپارتیێ، پڕانیا پشکداربوویان دیار کرینە کو ئاکپارتیێ تورکیا تووشی قەیرانەکا گەلەک مەزن یا ئابووری کریە و نها رەوشا ژیانا وان گەلەک خرابە و ئەو ئێدی پشتەڤانیێ ل ئاکپارتیێ ناکەن.
چاڤدێرێن سیاسی ل تورکیا و باکورێ کوردستانێ ژی وەسا دبینن، ئاکپارتیێ د چەند سالێن بۆری دا نەشیا قەیرانا ئابووری یا ل تورکیا چارەسەر بکەت و نها رەوشا ژیانا وەلاتیان ل تورکیا گەلەک خرابە، خەلک نەشێن پێدڤیاتێن سەرەکی یێن ژیانا رۆژانە بۆ خوە دابین بکەن، خەلک ئاکپارتیێ وەکو بەرپرسا سەرەکی یا قەیرانا نها ل تورکیا دبینن و ژ بەر ڤێ یەکێ ژی ئێدی وەکو سالێن بۆری خەلک پشتەڤانیێ ل ئاکپارتیێ ناکەن.
ئەو یەک د دەمەکێ دایە کو مەها بۆری چەندین بسپۆرێن ئابووری یێن تورکیا د نامەکێ دا بۆ سەرۆک کۆمارێ تورکیا دیار کربوون کو پێدڤیە د کەرتێ ئابووریێ دا چاکسازیێن بنگەهین بهێنە کرن، چونکی تورکیا د قەیرانەکا گەلەک مەزن یا ئابووری دایە و هەکە چاکسازی نەهێنە کرن د چەند سالێن بهێت دا دێ تورکیا تووشی کارەساتێن گەلەک مەزن بیت و وی دەمی ژی چارەسەری دێ گەلەک یا ب زەحمەت بیت و دڤێت دەستهەلات یا پێدڤی بۆ باشکرنا ژیانا وەلاتیان بکەت.
ل گۆر باوەریا چاڤدێرێن سیاسی ژ بەر سیاسەتا ئەردۆغانی یا ل هەمبەر ئەمریکا و وەلاتێن رۆژئاڤایی، ئەمریکا ب رەنگەکێ نەراستەوخوە شەڕێ ئابووری ل دژی تورکیا راگەهاندیە و ژ بەر ڤێ یەکێ ژی رۆژ ب رۆژێ لیرێ تورکی ل هەمبەر دۆلاری بهایێ خوە ژ دەست ددەت و ئەو یەک ژی بوویە ئەگەر رەوشا ژیانا وەلاتیان رۆژ ب رۆژێ خرابتر لێ بهێت و دەستهەلاتا ئاکپارتیێ ژی نەشیایە قەیرانا ئابووری چارەسەر بکەت.
