دهۆك خوسارەت بوو و شێركۆی هەولێر بەر ب سەركەفتنێ بر
قەیس وەیس:
ل ئەینییا بۆری هەڤڕكیێن وەرزێ نوو 2024/2025 یا خولا ستێرێن ئیراقێ بۆ یارییا فوتبۆلێ ب ئەنجامدانا دو یارییان هاتە ڤەكرن، ب سەركەفتنەك و خوسارەتییەكا یانەیێن كوردستانی.
دناڤ ئەرد و جەماوەرێ خوە دا تیما یانەیا دهۆك نەشیا ژ ئاستەنگا زەورا دەرباز بیت پشتی ب گۆلەكێ بێ بەرانبەر تووشی خوسارەتیێ بووی، د یارییا واندا ئەوا بەرهەڤبوونا مەسرۆر بارزانی سەرۆكێ حوكمەتا هەرێمێ و هەردو سەرۆكێن فیدارسیۆنا فوتبۆلا ئیراقێ و دەستەیا لالیگایا ئسپانی و زێدەتری 30 هزار ژ پشتەڤانێن وێ، د ماوەیێ دەستپێكا نیڤا ئێكێ دا ئەو ئاستێ پێدڤی ژ یاریزانێن دهۆكێ نە هاتە دیتن تا بوویە ئەگەر د خولەكا 16ێ دا یاریزانێ زەورا حەسەن عەبدولكەریم گۆلا ئێكێ بوو تیما خوە ئینا، پشتی ڤێ گۆلێ یاریزانێن دهۆكێ گڤاشتن كرن ژبۆ تۆماركرنا گۆلا وەكهەڤیێ لێ نیڤا ئێكێ ب پێشكەفتنا زەورا ب دووماهی هات، د نیڤا دویێ دا ئاستێ تیما دهۆكێ باشتر لێهات و بەردەوام گڤاشتن و هێرشێن تۆماركرنا گۆلێ دكرن لێ بێ ئەنجام بوون هەتا فیركا دادڤانی ب سەركەفتنا زەورا ل سەر دهۆكێ ب دووماهی هات.
ئەندرێس گاریسییا: ئەم باشتربووین و گۆلا دەستپێكێ شێوازێ یاریێ گوهارت
د پرێسكۆنفرانسێ رۆژنامەڤانی دا ئەندرێس گاریسییا هاریكارێ راهێنەرێ تیما یانەیا دهۆك گۆت: سەرباری خوسارەتیێ یاریزانێن مە ئاستەكێ گەلەك باش نیشان دا، گۆلا دەستپێكا یاریێ كارتیكرن ل سەر شێوازێ یاریێ كر، هەرچەندە مە كۆنترۆل ل سەر پرانییا دەمی دكر، ئەم گەلەك نێزیكی گۆلا وەكهەڤیێ بووین، لێ یانەیا مێڤان ژی شێوازێ خوە كرە بەرەڤانی، سۆپاسییا جەماوەری دكەین پشتەڤانییا تیمێ كرین بۆ یارییا بهێت دڤێت قەرەبوو بكەین، هێشتا دەستپێك و یارییا ئێكێ یە.
عیسام حەمەد: یاری ب سانەهی نەبوو و یا مەدڤییا سێ خالێن یاریێ بوون
ژلایێ خوەڤە عیسام حەمەد راهێنەرێ یانەیا زەورا گۆت: یاریزانێن مە باشترین ئاست نیشان دا و گەشتینە ئەوا مە دڤییایی سێ خالێن یاریێ بوون، هەردەم یاریێن دگەل دهۆكێ دناڤ ئەرد و جەماوەرێ وێ دا بزەحمەتن، یاری ب سانەهی نەبوو لێ ئەوا ژ یاریزانان دهاتە خواستن د ناڤ یاریگەهێ دا بجهـ دئینان، سەركەفتنا ڤێ یاریێ پالدەرە بۆ یارییا بهێت و داهاتی بەردەوامیێ بدەینە ئەنجامێن باش، سۆپاسییا هەموو دهۆكیا دكەین بۆ پێشوازییا وان لمە كرین.
ژلایێ خوەڤە تیما یانەیا هەولێرێ پێنگاڤا ئێكێ ب سەركەڤتیانە هاڤێژت پشتی ب دو گۆلان بەرانبەر گۆلەكێ سەركەفتی ل سەر یانەیا دیالا، د یارییا واندا ئەوا ل رۆژا ئەینی یاریگەها شەهید فرانسۆ حەریری هاتییە كرن.
هەرچەندە تیما دیالا شیا گۆلا ئێكێ د خولەكا 10ێ دا بینت ژلایێ پێشەكارێ خوە بێنجامین ئۆك ئۆكۆرۆنكۆ، لێ ستێرێ هەولێرێ شێركۆ كەریم شیا د هەردو خولەكێن 27 و 84 ێ گۆلا وەكهەڤیێ و سەركەفتنێ بینت و تیما خوە بەر ب سەركەفتنا ئێكێ ببەت.
زاخۆ ل چاڤ سەركەفتێ یە
بڕیارە ئەڤرۆ ل دەمژمێر حەفتی شەڤ ل یاریگەها ئەلمەدینە پایتەختێ ئیراقێ بەغدا تیما یانەیا زاخو ببیتە مێڤانا یانەیا تەلەبە د یارییەكا ئاگرین ب هێز دا، تیما كوڕێن خابووری ژ دەرڤەیی یاریگەها خوە لێ دهێتە چاڤەڕێ كرن كۆمەك ژ جەماوەرێ زاخۆ ل یاریگەهێ بەرهەڤبن بۆ پشتەڤانیێ، پێنەڤێت یارییا ئێكێ یە و دبیت ئەركێ زاخۆییان ب سانەهی نەبیت لێ ل دووڤ بەرهەڤیێن هاتینە كرن و داخویانیێن هاتینە گۆتن گەشبینی دناڤ رێزێن تیمێ و كادرێ راهێنانێ و كارگێرییا یانەیێ دا یا هەیی.
ژ یاریێن دی یێن ئەڤرۆ، مینا- حدوود دەمژمێر 4:30 ئێڤاری، ئەلقاسم- نەفت ئەلوەسەت دەمژمێر 4:30، كارەبا- جەوییە دەمژمێر 9:15 شەڤ.
بۆ زانین ل وەرزێ 2023 – 2024 یانەیا شورتە هەردو ناسناڤێن خول و كۆپا ئیراقێ دەستڤە بینت، یانەیا دهۆك ل وەرزێ 2009-2010 ناسناڤێ خولێ ب دەستڤە ئینابوو، بۆ وەرزێ ئەڤ سالە یانەیا دهۆك دێ پشكداری قارەمانییا كۆپا كەنداڤی كەت پشتی د یاریا پلەیی ئۆف دا شیا پلێتا دەربازبوونێ وەربگریت.
