كەریم فندی بالیۆزێ رەوشەنبیری بوو
شاكر ئەتروشی:
ب پشتەڤانیا رێزدار(د.عەلی تەتەر) پارێزگەرێ دهۆكێ، رێڤەبەریا گشتی یا رەوشەنبیری و هونەری ل دهۆكێ/رێڤەبەریا چالاكیێن وێژەی، ل ئێڤاریا رۆژا پێنجشەمبی، رێكەفتی 26/9/2024 دچالاكیەكا تایبەت دا رێز ل خەبات و بەرهەمێ رەوشەنبیرێ ناڤدارێ كوردستانێ نڤیسەر و پێشمەرگەیێ وەغەركری (عەبدولكەریم فندی دۆسكی1946ـ 2023) گرت و پرتووكەكا وی یا ب دو بەرگان ژنوو چاپبووی ب ناڤێ (الحیاە الحزبیە فی العراق 1916ـ2023) ب دیاری ل سەر بەهیڤبوویان هاتە بەلاڤكرن و رێ و رسم ل هولا ئۆتێلا ژیان بوون.
ئەمیر عەلی، رێڤەبەرێ گشتی یێ رەوشەنبیری و هونەری ل دهۆكێ د پەیڤا دەستپێكرنا وێ چالاكیێ دا گۆت: ئەم نەشیێن د دەرفەتەكا بچووكدا بەحسێ خەبات و خزمەتا نڤیسەرەكێ مەزن و ناڤدار بكەین، لێ دێ بێژین دەمێ ل كۆچا ملیۆنی خەلكەكی باژێر بەرداین و قەستا سەر سنۆران كرین ل وی دەمی ماموستا كەریم فندی ل شوونا مالێ خوە پرتووكێن خوە خلاسكرن و برنە سەر سنۆری و پشتی سەرهلدانێ ژی ئەو رۆلێ وی گێڕای چ وەك رێڤەرێ گشتی یێ رەوشەنبیری و هوونەری، چ ژی وەك بریكارێ وەزیرێ رەوشەنبیری چو جاران ناهێتە ژبیركرن، چنكو سەردەمەكێ زێڕین بوو، لەورا هەردەم دبێژم كەریم فندی بالیۆزێ رەوشەنبیری بوو دناڤبەرا دهۆك و هەولێرێ دا و پتریا نڤیسەر و هونەرمەندێن دهۆكێ قەردارێن خزمەتا وی نە.
دووڤدا بەلگە فلمەك ل دۆر ژیان و بەرهەم و خزمەتا وی دبوارێ رەوشەنبیری و هونەری دا هاتە نیشادان، پاشان (د. رەشید فندی) كو دبیتە برایێ خودێ ژێ رازی كەریم فندی پەیڤا ماباتێ پێشكێشر و بەحسێ قوناغێن ژیانا وی كر و سوپاسیا رێڤەبەریا رەوشەنبیری كر بۆ رێكخستنا ڤێ چالاكیێ و ل دووماهی پرۆفیسۆر د: ئیبراهیم ئەحمەد سمۆ چەندەكێ ل سەر بیرهاتن و كارو خەباتا كەریم فندی دوارێ رەوشەنبیری و هونەری دا ئاخفت و پێشنیازەكر كو هولەك یان جادەیەك یان كولانەك ب ناڤێ وی بهێتە دانان و هونەرمەند (فەهمی سەلمان) ژی بەحسێ وان بزاڤێن هونەری كر یێن ماموستا كەریم فندی پشتەڤانی لێ دكر.
