راگەهاندنا كوردی نێزیكی یا جیهانی دبیت
سندس سالح سلێڤانەیی:
نوح سلێمان، مەدیاكارێ بەرنیاسێ باژێرێ زاخۆ، د دیدارەكێ دا بۆ رۆژناما ئەڤرۆ گۆت: ب دیتنا من نوكە راگەهاندنا كوردی یا نێزیكی یا عەرەبی و جیهانی دبیت، چنكو ل چەند سالێن بۆری پێنگاڤێن باش هاتینە هاڤێتن و شیایە جهێ خوە دناڤ جڤاكی دا بكەت، هەروەسا شیایە دەنگ و رەنگێ كوردان بگەهینتە جیهانێ، هەروەسا ببیتە پرەك بۆ دانەنیاسینا كوردان و گەهاندنا مافێن پەیاما وان، ب تایبەت ژی پشتی سالا 2014 كو پێنگاڤێن هەرە باش هاڤێتن و هەتا رادەیەكی پێشكەفتنەكا بەرچاڤ ب خوەڤە دیت.
زێدەتر گۆت: دەمێ شەڕێ داعش روودای گەلەك كەنالان ب پیشەیانە كارێ خوە كرن و دەنگوباسێن شەڕی ڤە دگوهاستن، ژوانا كەنالێ (رووداو و كوردستان 24) و هندەك سایت و مالپەرێ دی كو نووچەیێن وان بوونە ژێدەرێن گەلەك كەنالێن عەرەبی و جیهانی و ئەڤە ژی ژلایەكی ڤە جهێ شانازیێ یە كو كەنالێن جیهانی بۆ خوە مفای ژ دەنگوباسێن كەنالێن كوردی ببینن و ژلایەكێ دیڤە ئەڤە گرۆڤێ وێ چەندێ یە كو راگەهاندنا كوردی هەتا رادەیەكی راگەهاندنا كوردی پێشكەفتن ب خوە ڤە دیتیە، دەربارەی رۆلێ ژنان د راگەهاندنا كوردی دا، ناڤهاتی گۆت: هەتا رادەیەكی وەك میناك نینە، چنكو ئەو ئازادیا بۆ كوڕی دراگەهاندنێ دا هەی بۆ كچان نینە و من دڤێت بێژم هەكە پارە هەبن راگەهاندن دشێت پتر رۆلێ خوە ببینت یان پێشكەڤیت، چنكو دەستهەلاتا چارێ یە و دشێت پەیامێ بگەهینیت و هیڤیا من ئەوە ل دەمێ بهێت راگەهاندنا كوردی پتر بەرب پێشڤە بچیت و قوناغێن باشتر دەرباز بكەت.
