شەڕێ سحێلا هێمایـێ خـوەڕاگری و بنگۆڕكرنا خەونێن دوژمنان بوو
ديدار، سالار محةمةد دۆسكى:
هەر ژبەر ڤێ خۆڕاگری و دلسۆزی و پێگیری و دسپیلینا وی ژبۆ ب جهئینانا كار و ئەرك و پرنسیپێن لەشكری و پارتایەتی, ژبەر زیرەكی و مێرخاسیا وی یا بێ سنۆر و ساخلەتێن وی یێن شۆرەشگێری و ڤیانا وی بۆ گەل و وەلاتی و سەرەدەریا وی یا چاك و دروست دگەل هەڤال و هەڤسەنگەرێن ویدا, شیا جهێ خۆ دناڤ دلێ هەموو هەڤال و هەڤبیر و هەڤرێبازێن خۆدا بكەت و ببیتە جهێ ڤیان و حەز ژێكرنا وان, ژبەر كۆ هەردەم یێ رووگەش و سوحبەت خۆشبوو دگەل واندا, ژبەر ڤان هۆكارێن مە باس لێكرین, جارەكادی ل سالا 1987ێ .ل دویف بریارا لقێ /1 یا تێكوشەردهێتە پایەبەرزكرن و دبیتە كادر و جێگرێ رێكخراوا سەربەرزا -كۆماتە – كو بەرپرسێ وێ فەرماندێ قارەمان كاك – محەمەد ساركی بوو, یا هەژییە بێژین كو ل سەردەمێ شۆرەشێ و خەباتا چەكداریدا چو واستەكاری نەبوون بۆ پایەبەرزكرنێ بەلكو هەر پێشمەرگەیەك ل دووڤ شیان و زیرەكیا وی دهاتە پێشخستن و رۆلێ بەرپرساتیێ پێ دهاتە سپاردن شەهیدێ سەركردە مینا شاگردەكێ چەلەنگ و زیرەك دخوێندنگەهەكا مەزنا شۆڕەشگێری و مەشق و سەربۆر و ئەزمۆنگەریێدا هاتبوو پەڕوەردەكرن ئەوژی خوێندنگەها پارتی و بارزانی و كوردایەتیێ بوو كو تێدا هەرتشت فێم كریە هەست ب ئێش و ئازارێن گەلێ خۆ كرینە, ئەو گەلێ كەفتیە بەرمەزنترین هێرشێن دوژمنكاریێ تالاتیا شكەستن و كارەساتێن خویناوی و شرینیا سەركەفتن و داستانێن مەزن تامكریە, فێری دەرس و وانەیێن رەوشتپاكیێ و راستگۆیێ و ساخلەتێن كوردایەتیەكا پاك و بێ سەوداكاری بوویە, كا چەوا خۆ دناڤ روودان و بوویەر و شكەستن و كارەساتێن خویناویدا رابگرە و ئومێدێن گەش و مەزن دناڤ هەست و بیروباوەریێن خۆدا بجەمینە, كا چەوا خۆ ل بەر رەشەپێلێن زۆردار و داگیركەران رابگریت و گەشتیا خەبات و كێفەراتێ و گەشتیا پڕ ژ هیڤی و ئومێدێن خۆ یێن گەش پالدەت و بەرەف كنار و پەڕاڤێن ئارامی و رزگاریێ پاژۆت, كا چەوا كاروانێ خەباتەكا بێ راوەستیان دناڤ قادا مەیدانا شۆڕەشەكا درێژخایەن و دوورڤەكێشدا ژتەڤ ئالیانڤە بەرەف پێشڤە ببەت, چەند رەوش و كاودانێن شۆڕەشێ دسەخت و ددژوارتربان باوەری و ئیرادا وی مینا چیا بوو ب هێزتر دكەفت و موكومتر لێ دهات, دهەموو چالاكی و شەڕ و داستانێن وی سەردەمیدا هەردەم درێزێن پێشیێدا بوویە و پێشرەوبوویە و رۆلێ وی دناڤ هەڤال و هەڤچەپەڕێن ویدا یێ دیار و بەرچاڤ بوو.. ژبەر زیرەكی و مێرخاسیا وی ل سالا (1988)ێ بەری ئەنفالێن خویناوی جارەكادن ژلایێ لیژنا ناوچا دهۆكێ یا تێكوشەرڤە دهێتە پێشنیاركرن بۆ بەرپرساتیا رێكخراوا (هیزل) بریارا وی ژلایێ لقا ئێكڤە دەرچوبوو .عیسا زێوەی، پێشمەرگەیێ شۆرەشا گولانا پێشكەفتنخواز ل دور كەسایەتی یا شەهید وەحید باكوزی گۆت: ل دەستپێكا سالێن هەشتێیاندا شەهید – وەحید باكۆزی – هاتە دناڤ رێزێن شۆڕەشا گولانێدا ل سنۆرێ لیژنا دەڤەرا دهۆكێ سەرب لقێ ئێكێ خەباتكەرڤە، دەمێ من دیتی من وەسا ناڤ چاڤێن وی خواندن كو ژبەر زۆلم و ژۆرداری یا رژێما بەعسا فاشست ل عیراقێ چاڤ و دلێن وی دپرن ژهەستا نەتەوایەتی و دڤێت بلەز بچیتە دناڤ رێزێن هەڤالێن خۆ یێن پێشمەگەدا و بزاڤێ بكەت ژبۆ ب دەستڤەئینانا مافێن رەوایێن گەلێ كورد، شەهیدێ قەهرەمان كاك وەحید باكۆزی -دناڤ پێشمەرگەیدا زۆرێ هەڤال خۆش و خودان سۆزبوو دشەڕاندا ژی هەردەم خودان مورال و مەعنەویاتەكا بەرز و بلند بوو ئەز شاهدم دەمێ دگەل مندا دچەندین شەرادا كەسێ ئێكێ یێ هێرشبەربوو، ترسا مرنێ ل دەف نەبوو، شەهیدبوون ل دەف وی خەلاتەكێ زۆر مەزنبوو گەلەك جاران ل دەف من گۆتی یە خۆزی ناڤێ من شەهید وەحید ئیبراهیم باكۆزی بایە چونكی بابێ من هندی حەز ژ كوردینیێ دكر و یێ كوردپەڕوەربوو شەهید – وەحید – دناڤ رێزێن پێشمەرگەیدا زۆرێ خۆشتڤی بوو زۆرێ ترانەكەر و نوكتەچی بوو گەلەك جارا درەوش و هەلویستێن بەرتەنگدا دا نوكتەكێ بێژیت هندەك جارا ل سەر بابەتەكێ نەدروست زۆر توورەدبوو, بەلێ ڤێ توورەبوونێ خۆ دناڤ دلێ ویدا نەدگرت هەر زوی دا جارەكادی دەست ب سوحبەتەكێ كەتەڤە دگەل هەڤالادا هەروەسا شەهید – وەحید – دناڤ چالاكیێن شەڕیدا زۆرێ زیرەك و مێرخاس بوو، دەنگێ تەقا دوژمنی ل كیرێ هاتبایە یەكسەر داقەستا وی جهی كەت، هەردەم هەولد دا ل پێشیا پێشمەرگەی بیت، ژبەر هندێ ژی چەندین جارا دگەل مندا برینداربوویە، بۆ نموونە ل شەرێ گوندێ شاوریكێ ل سالا (1982) یێ ل دەڤەرا مانگێشكێ بریندار ببوو, هەروەسان ل سالا (1984) یێ ل شەڕێ دناڤبەرا گوندێ كێڤلا – سێجێ ل دەڤەرا سێمێلێ بریندارببوو و گەلەك جارێن دی ژی بەری شەهید ببیت بریندابوویە، هزار سلاڤ ل سەر جانێ وی و تەڤایا شەهیدێن كوردستانێ بن..
مام (سادق ئەحمەد ) گەلناسكی فەرماندێ لەشكری یێ شۆڕەشا ئیلۆنا مەزن و گولانا نیشتیمانی و پێشكەفتنخواز, هەڤسۆز و هەڤرێبازێ پارتی و بارزانی ل دور وەحید باكوزی گۆت: شەهید وەحید دەمێ گەهشتیە ناڤ رێزێن شۆڕەشا گولانێ و بوویە پێشمەرگە دناڤ رێزێن لەشكرێ شۆڕەشگێرێ كوردستانێدا گەلەكێ بچویك بوو، دەستپێكێ ل بارەگایێ لیژنا ناوچا دهۆكێ دگەل كاك – عیسا زێوەی – دابوو.، سەرەڕای وی ژیێ بچویك و بێ ئەزمۆنی و سەربۆرێن وی دوارێ شەڕاندا, چەند جارەكان دگەل مەدا پشكداری هندەك چالاكیان بوو, ل 14/9/1983 ێ مە بویسەك دانابوو سەرجادا سەرەكیا دكەڤیتە نێزیكی گوندێ (بەرێ بهار) دڤێ چالاكیێدا ئەم شیاین ئیڤایەكا لەشكری تێك بشكێنین و ب شەوتینین و ژمارەكا زۆر ژجەلاویزێن رژێمێ تێدا بكوژین, دەستكەفتێن مە (17) كەلاشینكۆف بوون, ئەڤەژی بووی دەمی گەلەك بوو، ژبەر كۆ مە گەلەك پێویستی ب چەك و تەقەمەنیا هەبوو, پشتی مە خۆ ڤەكێشای, رژیمێ هێرشەكا مەزن و دژوار ب هەڤكاریا لەشكری و جاش و مەفرەزێن تایبەت و فرۆكێن سەمتی ئینا سەر گوندێ – بەرێ بهار – و دەوروبەران, بەلێ كاك عیسا زێوەی و – شەهید – وەحیدی – وان گۆتن ئەم ل سەر خۆ قەبیل ناكەین و دێ شەڕی كەین.هەرد وی دەمیدا هێرشی دوژمنی كرن و شیان ژمارەكا زۆر ژجەلاویزێن رژیمێ بكوژن, بەلێ پێشمەرگەیەكێ مە یێ قارەمان ژی ب ناڤێ – ئەحمەد تەها موسا دهۆكی – دڤی شەڕیدا هاتە شەهیدكرن و چەند پێشمەرگەیەك ژی بریندار بوون, من دڤی شەڕیدا مێرانی و مێرخاسیا شەهید – وەحیدی باش دیت, ب راستی رۆلەكێ مەزن و بەرچاڤ هەبوو دڤی شەڕی دا, هەروەسان گەلەكێ ب مورال و ورەبەرزبوو, هەرچەندە درێكخراوامەدا نەبوو بەلێ پڕانیا چالاكیێن مە دكرن ب هەماهەنگی بوون دگەل بارەگایێ لیژنێ و رێكخراوێن دی, دوان چالاكیاندا ژی رۆلێ وی یێ دیاربوو, دیسان گەلەكێ ب سەبر و سوحبەتچی بوو.
