د فەستیڤالا دهۆكێ یا رەوشەنبیری دا خەلاتێ زێڕی پێشكێشی ئیسماعیل بێشكچی هاتە كرن
شاكر ئەتروشی:
ب چاڤدێری و بەرهەڤبوونا (د.عەلی تەتەر) پارێزگەرێ دهۆكێ، ئێكەتیا نڤیسەرێن كورد/دهۆك، ل رۆژێن 3 ـ 4 ڤێ هەیڤێ فەستیڤالا دهۆك یا رەوشەنبیری یا حەفتێ ل هولا نڤیسەران گێڕا و د هەردو رۆژان دا پازدە سمینار و دو ئێڤاریێن هەلبەست خواندنێ هاتنە پێشكێشكرن، هەروەسا خەلاتێ زێڕی یێ فەستیڤالێ پێشكێشكی نڤیسەر و هزرمەندێ مەزنێ تورك و دوستێ مللەتێ كورد(ئیسماعبل پێشكچی) هاتەكرن، لێ ژبەركو ئەو نەشیا بەرهەڤ ببیت ئەو خەلات ژلایێ نوونەرێ وی ڤە هاتە وەرگرتن.
حەسەن سلێڤانەیی سەرۆكێ ئێكەتیا نڤیسەرێن كورد/دهۆك، د پەیڤا دەستپێكرنا فەستیڤالێ دا گۆت: سوپاسیا سەرۆك بارزانی دكەین ژبۆ پشتەڤانیا وی یا (مادی و معنوی) بۆ ڤێ فەسنیڤالێ، هەروەسا سوپاسیا سەرۆكاتیا هەرێمێ و حكومەتا هەرێما كوردستانێ ژی دكەین كو هەردەم پالپشت و پشتەڤانێن بزاڤا رەوشەنبیری بووینە و ب هاریكاریا وان مە پرۆژێ چاپكرنا پرتووكان ل ئێكەتیا نڤیسەران ڤەكر و هەتا نوكە پتری (300) پرتووكان كو یێن نڤیسەرێن هەرچار یارچەیێن كوردستانێ و دەرڤە نە هاتینە چاپكرن، زێدەباری دەرخستنا بەردەواما گۆڤارا (پەیڤ) و چەندین بزاڤ و چالاكیێن دی یێن ئەدەبی و رەوشەنبیری و هەمەجۆر و دێ دبەردەوام بین.
د دووڤدا (د.عەلی تەتەر) پارێزگەرێ دهۆكێ و چاڤدێرێ فەسنیڤالێ د پەیڤەكێ دا بخێرهاتنەكا گەرم ل وان ئەدیب و نڤیسەران كرن ئەوێن دەرڤەی وەلاتی هاتین و گۆت: دهۆك مالا وە هەموویانە و بخێر بهێن بۆ مالا خوە و باژێرێ خوە، هەروەسا سلاڤێن سەرۆك بارزانی و مەسرور بارزانی سەرۆكێ حكومەتا هەرێما كوردستانێ گەهاندنە وان و جارەكا دی پشتەڤانیا حكومەتا هەرێما كوردستانێ و كارگێڕیا پارێزگەها دهۆكێ بۆ پێشخستنا بزاڤا رەوشەنبیری ل دەڤەرێ دوپاتكر و داخوازا سەركەفتنێ بۆ ڤەستیڤالێ خواست.
د دووڤدا پەیڤا دەزگەهێ كوردستان گرونیكل ژلایێ (جان دوست) و پەیڤا ئێكەتیا نڤیسەرێن عیراقێ ژلایێ (عەلی فەواز) ڤە هاتنە خواندن، پاشان هژمارەكا سمیناران هاتنە پێشكێشكرن و ل دانێ ئێڤاری ژی چەند سمینار و ئێڤاریەكا هەلبەست خواندنێ هاتە پێشكێشكرن، ل رۆژا دویێ ژی ل دانێ سپێدی هەر ل هولا نڤیسەران چەند سمینار هاتنە پێشكێشكرن و ل دانێ ئێڤاری ژی گەشتەك بۆ مێهڤانان هاتە رێكخستن و سەرەدانا باژێرێ زاخۆ كرن و ب گێڕانا ئێڤاریەكا هەلبەست خواندنێ فەستیڤال ب دووماهی هات و د هەردو ئێڤاریێن هەلبەست خواندنێ دا پتری(30) هەلبەستڤانێن كورد و عەرەب هەلبەستێن خوە خواندن و مێڤانێن پشكدار د فەستیڤالێ دا ل هەر چار پارچەیێن كوردستانێ و چەند پارێزگەهێ ناڤەراست و ژێریا عیراقێ و وەلاتێ توركیا و گۆرجستان و ئیمارات و چەند وەلاتێن دی هاتبوون و شاندێ (تونس و قەتەر) ژی ژبەر ئالۆزیێن نوكە نەشیان پشكدارببن.
