هندەك پەیج هەنە دبنە ئەگەرێ پەیدابوونا بەلبەلێ
سندس سالح سلێڤانەیی:
مەدیاكار (سولین سمۆ) د دیدارەكێ دا بۆ رۆژناما ئەڤرۆ گۆت: دژیێ نەه سالیێ دا ئەز چوومە بەرنامێ زارۆكان ل دهۆك تیڤی و بوومە بێژەر و پێشكار و هەتا ژیێ من بوویە شازدە سال ئەز ل وی كەنالی یا بەردەوام بووم و پشتەڤانێ من یێ ئێكێ بابێ من بوو و یا دویێ ژی دایكا من كو بۆ هەموو كارێن خوە ئەز بۆچوونێن وان وەردگرم.
هەروەسا گۆت: دەمێ ئەز گەهشتیمە قوناغا ئامادەیی من دەست ژێ بەردا، بەس وەكو كار هەردەم ل سەر هزار من بوو، لەورا ئەز چوومە زانكۆیا پولیتەكنیك و من ل پشكا رۆژنامەڤانیا ئەلكترونی خواند و پشتی ب دووماهی هاتی من ل چەند سایت و كەنالان كاركریە، هەروەسا دەمەكی بۆ رۆژنامەیا ئەڤرۆ و هندەك جاران ژی وەك پێشكێشكار نوكە ژی هندەك جاران ریكلامان چێدكەم و نوكە ئەز هندەك دیمێن نوو یێن كچان دناڤ راگەهاندنێ یان سۆشیالێ دا دبینم و هیڤیا من ئەوە ب دروستی كاربكەن، هەروەسا حەزدكەم دوفچوونەك بۆ وان كەسان هەبیت ئەوێن دناڤ راگەهاندنێ دا كاردكەن هەكە ئەتەكێتێن راگەهاندنێ باش نەزانن رێ پێ نەهێتە دا كاربكەن، چنكو نوكە هندەك پەیج هەنە بێ ژێدەر هندەك پێزانینێن نە دروست بەلاڤ دكەن و ئەڤە چەندە دبیتە ئەگەرێ پەیدابوونا بەلبەلێ دناڤ خەلكەكی دا و ئەڤ چەندە ژی یا ب زیانە.
