مژوولی تۆماركرنا هژمارەكا سترانێن نوو یە
زنار تۆڤی:
خانما سترانبێژ دیلان رۆژئاڤا، كو ناڤێ وێ یێ دروست دیلەك ئەرسەلانە، خەلكا دەڤەرا گەڤەڕێ یە ل باكورێ كوردستانێ، ژبەر حەزا وێ بۆ رۆژئاڤایێ كوردستانێ ناڤێ خوە كریە، دیلان رۆژئاڤا، بۆ رۆژناما ئەڤرۆ دبێژیت: ئەڤە دەمێ پازدە سالانە ئەز سترانان دبێژم، ل دەستپێكێ دچوومە داوەت و دیلانان و ب ڤی رەنگی ئەز شیام بەردەوامیێ بدەمە كارێ خوە و ب رەنگەكێ باش فێری سترانگۆتنێ و مۆزیكێ بوویمە، هەر چەندە ل دەستپێكێ خەلكی لۆمەی من دكر و دگۆتن، تۆ كچی نابیت سترانان بێژی، بەلێ من گوهداریا وان نەكر و یا بەردەوام بووم.
ناڤهاتی گۆت: نوكە ل باژێرێ ئیستانبولێ دژیم و دەستپێكا كارێ من یێ هونەری، ب هاریكاریا هندەك هەڤالێن من یێن هونەرمەندن ئەز شیام بچمە چەندین بەرنامێن هونەری، ئەڤ بوو ئەگەر كو ئەز بشێم باشتر خۆ بدەمە نیاسین، من هندەك كلیپ و ستران چێكرن و ئەز چوومە ئاهەنگێن كوردان ل باكورێ كوردستانێ، نوكە ئەز گەلەك ب هونەری ڤە هاتیمە گرێدان و ل دەف من هونەر و سترانگۆتن كارەكێ گەلەك جۆدایە، د هەمان دەمدا نوكە ئەز مژوولی تۆماركرنا هندەك كارێن نوو یێن هونەری مە و من لبەرە كلیپەكا نوو بەلاڤ بكەم، دیسان چەندین جاران ئەز هاتیمە هەرێما كوردستانێ، من ستران ل ئاهەنگ و دەواتان ل كوردستانێ گۆتینە، هەتا نوكە من دو ئەلبۆمێن سترانان و چەندین كلیپ و سترانێن سینگل ژی بەلاڤكرینە، هەروەسا من ڤیایە ب رێیا هونەرێ خۆ خزمەتا هەموو خەلكێ كوردستانێ بكەم و ل ڤان رۆژێن بۆری ژی من كلیپەكا نوو بەلاڤكریە.
