ئەسمەرێ
عەدنان رێكانی
چیرۆكا من دیمەنەكە ژ بەری سەرهلدانێ، چیرۆكا خێزانەكێ یە بەرەڤ باژێرێ مووسل ڤەدچن و خانییەكی بكرێ دگرن و تێڤە دژین. خێزان ژ دو خووشكان و دو برا پێكدهێت و ئەڤا من كرییە كاراكتەرا ڤێ چیرۆكێ، ناڤێ وێ ئەسمەرە و ژ قەدەرا وان، ئەو خانییێ تێڤە دكەڤیتە بەرامبەری شوعبەكا حزبا بەعس. ئەز بەحسا خویشك و برا و دەیبابێن ئەسمەرێ ناكەم و بتنێ دێ فۆكسا چیڕۆكا خوە ئێخمە سەر كاراكتەرا چیرۆكا خوە. ئەسمەر دژیێ خوە یێ 17 سالیێدا بوو و ژبەركو خویشكا وێ دو سالان ژ وێ مەزنتر بوو و مالا وان دكەڤیتە بەرامبەری شوعبێ، شووشتنا بەر دەرۆكێ مالێ بهیڤییا ئەسمەرێ ڤە هێلابوو.
چەند ئەسمەر دەردكەڤتە بەر دەرۆكێ مالێ، رەفیقێ شوعبێ چاڤدێرییا وێ دكر و كەسەك فرێكرە دەف ئەسمەرێ و گوتێ رەفیقی یا گۆتی بهێتە شوعبێ، دێ چەند پرسیارەكان لدۆر بابێ وێ ژێكەم. ئەسمەر ژ چوونا خوە دودل ما، چبكەت؟ لڤی تاخێ لێ دژین، تاكە خێزانا كورد ئەون و ئەڤە بەعسینە و دشێن توومەتا بۆ وان دروست بكەن و ژخوە دەهان كەس، هوسا یێن بێ سەروشوین كرین و ئەگەر نەچوو و بابێ وێ گرتن و كرنە ددەستێ ئەمنێ دا، ئەو دێ چكەن؟ لێ رەفیقێ كورییا وی دچەند تلهانرا بزدییایی، ئەو كەس جارەكا دی فرێكرە دەف ئەسمەرێ و گۆتێ ئەگەر نەهێی، پاشی گازندا نەكە؟! ئەسمەرێ خوە ژ مالێ ڤەدزی و قەستا بارەگایێ شوعبێ كر و دگەل ئاخفتنێن خۆش و گەفلێكرنێ، رەفیقی ئەسمەر ترساند و گۆتێ: ئیخباریێن هاتین، بابێ تە بۆ سیخوریێ یێ هاتیە باژێرێ مووسل و ئەگەر ئەوا ئەز دبێژم نەكەی، بابێ تە ژلایێ ئەمنێ ڤە دێ هێتە بەرزەكرن! ئەسمەر ترسییا، ئەسمەرێ دەهان چیرۆكێن ئەمنێ یێن گولێ بووین و ئەسمەرێ دەهان چیرۆك و سیناریوو دسەرێ خوەدا ئینان و برن. لێ هەتا ئەسمەر ب سەرخوەڤە هاتی و خوە ژبن دەستێن رەفیقێ شوعبێ ئینایەدەرێ، هەر تشتێ وێ یێ پیروز بدەستێن رەفیقی هاتنە كرێتكرن و ژ ترسێ و ژ گەفێ و پاراستنا خێزانا خوە، ئەسمەر بۆ لەبێ و بەلێ یا وی و چەند هەیڤان ل ئەسمەرێ دیاركر. دەیكا وێ گۆمان ژێ برن و وێ ل بەر دەیكا خوە بەرزەكر. دەیكا وێ دبن عەبایی ڤە برە مالا شەمێ و شەمێ گۆتێ: پیرۆزە كچا تە یا ب دوگیانە و دایكێ ل رانێن خوەدا و شەمێ زانی وێ لەز دگۆتنا خوەداكر و تێك هاتنۆچوون، بابێ وێ گۆتێ: بتنێ ئەڤ رەفیقە نەبا، هەر گاڤا چاڤێن من ب چاڤێن وی دكەڤن، ئەو ترسێ دئێختە دلێ من و من نەدزانی ئەو مارێ بن گلگلەیە و گۆتە ئەسمەرێ: ئەز هەر نەشێم وی بكوژم و نە بتنێ ئەز، خەلكێ ڤی تاخی هەمی رابیتە سەرخوە، نەشێن خوە تلا خوە ژی درێژكەنێ و بتنێ ئەز دشێم تە بكوژم. ژۆرەك ل سەر ئەسمەرێ قفل و كلیلدان و خێزان تێك هاتن و چوون، بریاردان: برایێ وێ یێ پازدە سالییێ بناڤێ عیسۆ، ئەسمەرێ بكوژیت و ژبەركو ژیێ وی دبن یاسایێ دایە، عیسۆ گەلەك دزیندانێڤە نامینیت و چەكەك بۆ پەیداكرن، دێ چاوان فیشەكێ بەتە بەر تڤەنگێ و دێ چاوان تبلا خوە دانیتە سەر جەلەبكێ و دێ چاوان شەقینیت، هەمی نیشادان و عیسۆی وەكی دەرسا قورئانێ هەمی ژبەركر. دایكا ئەسمەرێ قەستا ژۆرا ئەسمەرێ كر و گۆتێ: عیسۆ دێ تە كوژیت بۆ خوە برەڤە. خویشكا ئەسمەرێ، قەستا ژۆرا ئەسمەرێ كر و گۆتێ: عیسۆ دێ تە كوژیت بۆ خوە برەڤە. برایێ ئەسمەرێ قەستا ژۆرا ئەسمەرێ كر و گۆتێ: عیسۆ دێ تە كوژیت بۆ خوە برەڤە. بابێ ئەسمەرێ قەستا ژۆرا ئەسمەرێ كر و گۆتێ: كچا من، ئەز دزانم ژ پێخەمەت پاراستنا من و خێزانا مە تە ئەڤ چەندە یا كری، دزانم گونەها تە نینە و ئەز دێ ئەڤ شەڤە دەرۆكی مالێ هێلمە ڤەكری و بۆ خوە برەڤە. ل دووماهیێ هەمییا قەستا ژۆرێن خوە كرن و گوهێ وان ما ل دەنگێ تڤەنگێ و كا دێ كەنگی عسیۆ تبلا خوە ل جەلەبكێ شدینیت و تڤەنگ تەقییا. خانی تژی دەنگ بوو و كەیفا هەمیان هات. چەندەك پێڤەچوو و دەنگێ فیشەكەكا دی ژ تڤەنگێ هات و جاددە تژی دەنگ بوو و چەندەكێ كێم پێڤەچوو، دەنگێ ویلەویلا ئەمبولانسێ و دەنگێ ترۆمبێلێن پۆلیسان و هێشتا كەیفا ل سەر دێمێ وان، دەرگەهێ خانی ژبن برن و خانی تژی پۆلیس و زەلامێن ئەمنێ بوو. باب، دانە بەر قۆنتاغێن تڤەنگان. برا، دا بەر قۆنتاغێن تڤەنگان. عیسۆ، ژ ژۆرا ئەسمەرێ دەرئێخستن و یێ ددەنە بەر قۆنتاغێن تڤەنگا. دایك و كچا وێ یا مەزن هێلان. دایك بەزی ژوۆرا ئەسمەرێ و كچا مەزن دا بدویڤ دەیكێ و گەهشتنە سەر كەلەخێ ئەسمەرێ. ئەسمەر یا دخوینا خوە دگەڤزیت و عیسۆی ئەسمەر كوشت. ل رەخێ دییێ جاددێ، هێشتا كەلەخێ رەفیقی یێ ل سەر جاددێ و عیسۆیی فیشەكا دوویێ ل ئەنییا رەفیقی دابوو. باب، چەند هەیڤان بەرزەكرن و ژڤێ زیندانێ بۆ زیندانا دی و لدووماهیێ ئازادكرن. برایێ مەزن چەند هەیڤان بەرزەكرن و ژڤێ زیندانێ بۆ زیندانا دی و پشتی چەند هەیڤان ئازادكرن. عیسۆیێ ژ تەمەنێ یاسایێ بچوكیتر، نەكەتە بەر حوكمێ سێدارێ و پێنج سالان دزیندانێڤە ما، عیسۆی شەرەفا مالێ پاراست، لێ شەرەفا ئەسمەرێ ژی ب عەردیڤە نەهێلا.
