جهێ پیاسەیێن من و تـە
رەمەزان ئیسماعیل گەرەگوهی
پیاسێن من..
ل پەلازویر و بەرخابیر و
جهێن دویر و
ل زۆمێن چەل و بەرچەلانن
ل بن كەڤۆتێن
بەرێ سیلێ و
وارێن كەپرۆك و گوندی لێ
ل دویڤ ئاڤێ و
ل ڕەخ و دۆرێن سیلاڤێ و
ل دەردۆر و
ل ناڤ دیمەنێن
مێرگ وكانیێن كیكەلانن
ل بن بییێن
بەژن بلند و
هەلەمویتێن بێشەلانن
ل سەر لێڤێن
زێ و ڕۆشینی و
ل هەمبەری
ئاڤێن بۆش و سیپەلانن
ل ڕەخ زنار و ل بن چنار و
ل بەر سیبەرا
خولپ و دارێن مەخەلانن
پیاسێن تە..
ل ناڤ ئاخ و
ڕەز و باغ و
جەرگ و ناخ و دلێن منن
ل سەر سینگ و
زەند و بەند و
هەردو قۆلێن ملێن منن
ل هوندڕێ
خەونێن كویر و
هزر و بیرێن هلێن منن
ل ناڤ هەست و
هەر دو دەست و تلێن منن.
