ئیران: ئالۆزیێن دەڤەرێ د بەرژەوەندیا چو ئالیەکێ دا نینن
مەسعود پزیشکیان سەرۆک کۆمارێ ئیرانێ د داخۆیانیەکێ دا راگەهاند وەکو ئیران وان دڤێت هەموو پرسێن هەی ل دەڤەرێ دوور ژ شەڕی و ب رێیا دانوستاندنان بهێنە چارەسەر کرن، ئەو پرۆژەیێ ئەمریکا بۆ راگرتنا شەڕێ ل لوبنانێ ژی ئامادە کریە هندەک خالێن باش تێدا هەنە و هندەک خال ژی هەنە دڤێت زێدەتر ڤەکۆلین ل سەر وان بهێتە کرن.
سەرۆک کۆمارێ ئیرانێ ئەو یەک ژی دیار کر، وەکو ئیران وان دڤێت شەڕێ نها ل رۆژهەلاتا ناڤین ب دووماهی بهێت، لێ نابیت ئەو یەک ببیتە ئەگەرێ بهێزبوونا ئسرائیلێ، چونکی وی دەمی دێ ئالۆزیێن هەی زێدەتر لێ هێن، هەکە ئەمریکا و وەلاتێن رۆژئاڤایی دخوازن ئالۆزیێن نها نەمینن دڤێت رێگریێ ل ئسرائیلێ بکەن و نەهێلن ئسرائیل زێدەگاڤیان بکەت، چونکی ئسرائیل رۆژانە تاوانێن مەزن ل دژی وەلاتیێن سڤیل ل غەزە و لوبنانێ ئەنجام ددەت.
