ئارمانجا سەرەکی یا تورکیا کۆنترۆلکرنا رۆژئاڤایێ کوردستانێ یە
ب، سه‌رجان مەحمود:
سیاسەتمەدارێ کورد دیار دکەت، تورکیا ب رێیا قۆناغەکا نوو ل گەل ئۆجەلانی دڤێت رۆژئاڤایێ کوردستانێ بکەتە ژێر کۆنترۆلا خوە، لێ بەرپرسێن پەکەکێ یێن ل قەندیلی ڤێ یەکێ ب توندی رەت دکەن، ژ بەر هندێ ژی ئەو قۆناغا تورکیا کار بۆ دکەت دەستپێنەکریە و گەلەک ئاریشە هەنە.
ئیبراهیم خەلیل باران سیاسەتمەدارێ کورد سەبارەت ب گوهۆڕینێن نها ل تورکیا و بزاڤێن دەولەت باخچەلی بۆ ئاشتیێ دیار کر، بەری هەر تشتەکێ ب هاتنا ترامپی دێ گوهۆڕینێن مەزن ل رۆژهەلاتا ناڤین روو دەن، بەرپرسێن تورکیا وەسا دبینن دێ ئەمریکا هێزێن خوە ژ سووریێ و رۆژئاڤایێ کوردستانێ ڤەکێشیت و وی دەمی ئەو دشێن دەست ب ئۆپەراسیۆنەکا نوو ل رۆژئاڤایێ کوردستانێ بکەن، د هەمان دەمی دا تورکیا دڤێت ب رێیا ئۆجەلانی هەموو رۆژئاڤایێ کوردستانێ بکەتە ژێر کۆنترۆلا خوە و گۆت: (لێ تشتێ دیارە بەرپرسێن پەکەکێ یێن ل قەندیلی داخوازیێن ئۆجەلانی قەبوول ناکەن، چونکی وەسا دیارە د ناڤبەرا دەولەتا تورکیا و ئۆجەلانی دا هەڤدیتن هەنە و ل سەر هندەک خالان ژی رێککەفتن کرینە، لێ بەرپرسێن پەکەکێ یێن ل قەندیلی وان تشتان قەبوول ناکەن و ژ بەر ڤێ یەکێ ژی هەتا نها چو پێشڤەچوون نینن و ئەوا دبێژنێ قۆناغەکا نوو ژی وەکو خوە مایە و چو تشتەک نوو نینە).
ناڤهاتی ئەو یەک ژی دیار کر دیارە ئارمانجا سەرەکی یا دەولەتا تورکیا ژ دەستپێکرنا قۆناغەکا نوو بۆ ڤێ یەکێ یە دا نەهێلن کورد ل رۆژئاڤایێ کوردستانێ هەرێمەکا خوە یا خوەسەر هەبیت، ژ بەر ڤێ یەکێ ژی دەست ب بزاڤەکا مەزن کرینە، چونکی تشتێ نها دیارە ئەوە ئەمریکا دێ هێزێن خوە ل رۆژئاڤایێ کوردستانێ هێلیت و دبیت پتر ژ ئیدارا بەرێ پشتەڤانیا کوردان ژی بکەت، وی دەمی دەلیڤەکا زێرین دێ بۆ کوردان هێتە پێش و کورد دشێن پێگەهێ خوە ل سووریێ بهێزتر لێ بکەن و هەرێمەکا فیدرال یا بهێز ژی بۆ خوە ئاڤا بکەن، ئەو یەک ژی ب دلێ تورکیا و نینە و هەموو بزاڤێن نها یێن تورکیا بۆ ڤێ یەکێ دا بشێت ب هەر رەنگێ هەی رێگریێ ل بهێزبوونا کوردان ل سووریێ بکەت.
سیاسەتمەدارێ کورد ئەو یەک ژی دیار کر، نها د ئاستێ نێڤدەولەتی دا پشتەڤانیەکا باش بۆ کوردان ل سووریێ هەیە، د شەرێ ل دژی داعشێ دا ژی کوردان ل سووریێ گەلەک قوربانی دان، ژ بەر ڤێ یەکێ دبیت ئیدارا نوو یا ئەمریکا پتر ژ ئیدارا بەرێ پشتەڤانیێ ل کوردان بکەت، چونکی کورد دێ بنە هێزەکا کاریگەر د سیاسەتا دەرڤە یا ئەمریکا دا بۆ گوهۆڕینێن ل دەڤەرێ، دیارە تورکیا هەست ب ڤێ یەکێ کریە و دڤێت ئاستەنگیان ل هەمبەر بهێزبوونا کوردان دروست بکەت.
