ئەحمەد تورک دێ سەرەدانا باخچەلی کەت
رۆژنامەڤانەکا تورکیا دیار دکەت، بەری چەند رۆژان دەولەت باخچەلی سەرۆکێ پارتا بزاڤا نەتەوەپەرست ب رێیا تەلەفۆنێ ل گەل ئەحمەد تورک سیاسەتمەدارێ ناڤدار یێ کورد ئاخڤیە و داخواز ژێ کریە سەرەدانا ئەنقەرە بکەت دا ئەو پێکڤە ل دۆر پرسێن نها ل تورکیا بئاخڤن.
نێرگز دەمیرکایا ئەو یەک ژی دیار کریە، ژ بەر ئالۆزیێن چەند رۆژێن بۆری ل هندەک باژێرێن کوردی هەتا نها ئەحمەد تورک سەرەدانا باخچەلی نەکریە، لێ دهێتە چاڤەرێکرن د چەند رۆژێن بهێت دا ئەحمەد تورک ل ئەنقەرە سەرەدانا دەولەت باخچەلی سەرۆکێ پارتا بزاڤا نەتەوەپەرست یا تورکیا بکەت.
چاڤدێرێن سیاسی ژی دیار دکەن، هەڤدیتنا ئەحمەد تورک و دەولەت باخچەلی دشێت ببیتە ئەگەرێ دەستپێکرنا قۆناغەکا نوو ل تورکیا، چونکی دەمەکە دەولەت باخچەلی کار بۆ دەستپێکرنا قۆناغەکا نوو و راگرتنا شەڕێ نها ل تورکیا دکەت، لێ هەتا نها ژی باوەریا کوردان ب ئاخڤتنێن باخچەلی و بەرپرسێن دی یێن دەولەتێ نینە، چونکی کورد داخواز دکەن ب کریاری هندەک تشت بهێنە کرن.
