باخچەلی: بلا ئیمرالی و دەم پارتی هەڤدیتنان بکەن
دەولەت باخچەلی سەرۆکێ پارتا بزاڤا نەتەوەپەرست یا تورکیا دوهی د کۆمبوونا فراکسیۆنا پارتا خوە ل پەرلەمانێ تورکیا ئاخڤی و دیار کر، دڤێت ئۆجەلان و دەم پارتی هەر زوو دەست ب دانوستاندنان بکەن، مە بەری نها ژی دیار کریە دڤێت ئۆجەلان بهێتە پەرلەمانێ تورکیا و ل کۆمبوونا دەم پارتی بئاخڤیت، نها ژی ئەز جارەکا دی هەمان داخوازیێ دکەم.
سەرۆکێ پارتا بزاڤا نەتەوەپەرست یا تورکیا ئەو یەک ژی دیار کر، ل رۆژهەلاتا ناڤین و جیهانێ دێ گوهۆڕینێن گەلەک مەزن دروست بن، ئەمریکا و هندەک ژ وەلاتێن ئێکەتیا ئۆرۆپا ژی نها دخوازن ئاریشێن نوو بۆ تورکیا دروست بکەن، شەڕ ل بەر دەرگەهێ تورکیا یە، لێ دڤێت ئەم هشیار بین و رێ نەدەین مەترسی ل سەر تورکیا دروست بن، ژ بۆ ڤێ یەکێ ژی وەکو تورکیا ئەم بۆ ئاشتیێ و چارەسەریێ بەرهەڤین و ژ بۆ ڤێ یەکێ ژی دڤێت بێی گیرۆبوون ئۆجەلان و دەم پارتی دەست ب دانوستاندنان بکەن.
