خەریبی
رەیان خالد عەلی
دەستپێكا وەرزێ سڕێ
هەتاڤ سل و یاخی
ل پشت ئەورێن گەور
بەلگێن وەریای ل سەر خەونێن ستەور
هەمی دیمەن ب رەنگێ خەریبیێ
ل سەرێن چیا، باران بەفرا
بایێ خوە د پەراسیێن قورمێن ستوور دا ڤەشارتی
ب هێرش ڤە ئاسۆیان داگیر دكەت
گەردوونی هەمبێز دكەت و دبێژت:
گەرماتی د ناخێ تە دا نەڤەمریت
هەر هاڤینە..
سیبەرێن سەمایەكا بێ رتم
ل سەر ناڤچاڤێن خەونەكا چەنگۆكری
سترانەكا مەلوولە..
د هەر قورنەتەكا رەڤینێ دا
دەرگەهەكە ملێ تە دگریت و بەرێ ڤەگەریانێ
ل بەر تە شرین دكت
دا جارەكا دی تە بێختە د خەفكا خەریبێ دا
و د بازنەكێ دوبارەكری دا
دلێ خوە دانی بەر پێهنا.
