ئیران: دڤێت ئاگربەست وەکو خوە بهێتە بجهئینان
پەیڤدارێ وەزارەتا دەرڤە یا ئیرانێ راگەهاند کو ئاگربەستا دو مەهی یا د ناڤبەرا ئسرائیلێ و حزبوللا لوبنانێ دا کارەک باشە و وەکو ئیران ئەو پشتەڤانیێ ل وێ ئاگربەستێ دکەن، لێ دڤێت ئاگربەست وەکو خوە بهێتە بجهئینان و دڤێت ئسرائیل هەموو هێزێن خوە ژ باشورێ لوبنانێ ڤەکێشیت و رێزێ ل سەروەریا ئاخا لوبنانێ بگریت.
ئیسماعیل بەقایی ئەو یەک ژی دیار کر، وەکو ئیران ئەو هەردەم پشتەڤانێ خەلکێ لوبنانێ نە و دڤێت جڤاکێ نێڤدەولەتی ژی ل هەمبەر تاوانێن ئسرائیلی یێن دەرحەق خەلکێ غەزە و لوبنانێ خوەدان هەلوەست بیت.
ل ئالیێ دی حوکمەتا لوبنانێ ژی راگەهاند ئەو دێ هێزێن خوە بەنە باشورێ لوبنانێ و داخواز ژ وەلاتیان ژی کر بلا جارێ چاڤەرێ بن هەتا هێزێن ئسرائیلێ ب تەمامی باشورێ لوبنانێ چۆل بکەن، پشتی ئسرائیلێ باشورێ لوبنانێ ب تەمامی چۆل کر وی دەمی وەلاتی دشێن ڤەگەرنە ڤە مالێن خوە، لێ جارێ بلا خەلک چاڤەرێ بن دا رەوش ب تەمامی ئارام بیت.
