نامەیێن شكەستی
ئەدیب عەبدوللا
ئارامی
عاشقەكێ عەشق لێ هندا، د دەریا یا بێئۆمێدیێ دا دخەندقی، هەڤالەكێ وی ملێ وی گڤاشت:
– دێ چاوا شێم تە ئارام كەم.
– گەردوون ب مەزناهییا خۆ ڤە نەشێت من ئارام كەت.
– بنڤیسە دگەل بۆرینا دەمی دێ ئارام بی.
– ئەز هەمی یێ بوویمە نڤیسن، لێ رۆندكێن خوینێ نا هێلن دەربڕینێ ژێ بكەم، هەر چركەیەكا دچیت ژییەكێ ژی دگەل خۆ دبەت، هەر دەمێ دهێت ژی كۆڤانەكێ ل خەما زێدە دكەت، خەریبییا من خەریبتر دبیت.
گۆڕستان
باژێرێ من ئەوێ گەلەك بچویك، هەر مالەكێ ب كێمی دو سەد سێ سەد كەز بوو دڤێن، گۆڕستانا وێ ئەوا گەلەك مەزن، هەر گۆڕەكی كێمتر دو كەز بوو دڤێن. ئەز نزانم ئەز ژ باژێری مە یان ژی ژ گۆڕی؟
كاروان
رەنگە رێنیشاندەر كاروانی وەكی خۆ بدەتە رێ، لێ ئەز ل پەی وان ناچم (ئەو ژ رێ ئەز ب پێ)، چ ئەڤرو یان سوباهی دێ كاروانی ئینمە سەر رێ.
ڤیان
چەند هەدارا من ب هەدارێ دهات هند حەز ژ ئادارێ دكەم، ئادار دەستگرتیا من بوو، هەدار هەناسە بوو، هەناسا من بێ هەدارێ نەدهات، ئادارێ ژی هەدار نە بوو من ب هەدار بئێخیت، من هەردو دڤیان، وان ژی ئەز بۆ خۆ بتنێ دڤیام.
