كابووسك
سەیفوللا محەمەد
خەونێن من، ڕەنگڤەدانێن ڕۆژێن من یێن سەخت و دژوارن، ئەو ڕۆژێن پڕی ڕەڤ و تالان و وێرانی و خوین ڕشتن، قێڕی یێن زاڕۆك و گەنج وكالان، زێمارێن زەرییان، ئەو ڕۆژێن ڕەش و تاری و پڕ مەرگەسات و تراژیدی.
ما كەنگێ ڤان ڕۆژان بەلا خوە ژ من ڤەكرییە، هەتا جارەكێ و شەڤەكێ سەرێ ڕەحەت دانم سەر بالگوهی و خەو و خەونەكا شرین ببینم؟ شەڤێن من هەمی خەونن، خەونێن من ژی بووینە سینەما و ب دەهان فلم د هێنە پەخش كرن، ئەز ژی تەماشەڤانەكێ بێ تكێتێ هەر دەمی مە، ئەز یێ فێربوویمە خەونێن ڕەش و كابیسكێن گەلەك ب ترس و سەهم.
هەمی فلم دوبارە و دەهبارەنە، ل بەر چاڤێن من ب لەز د هێن و ب لەز د چن، باوەر بكەن، هێشتا ب دروستی نەشێم ڤەگێڕم، ما بۆ كێ ڤەگێڕم؟ چ شڕوڤە بۆ نەڤێن، ئەو بخوە شڕوڤەیێن كەتوارێ منن، تژی رویدانن، تژی ئەكتەرن، تژی سیناریۆنە، تژی قارەمانن، ژ تاقەتا مێشكێ من دەركەتینە، جاران ژ بەر وان دیمەنێن گەلەك ب ترس ڤەدجنقم، سەد جار دبێژم «بسملا» و حەز دكم دوبارە د خەو بچم، لێ هەر دەما خەوێ دوبارە دكم، خەونێن من ژی خوە دوبارە دكن، هەمی دبنە كابووسك و خەوێ ل من حەڕام دكن، گەلەك جاران ژ بەر ڤان كابووسكان، د نیڤە شەڤێدا و ژ نشكەكێڤە دكم قێڕی و هاوار، زاڕۆكێن من ل دەنگێ من هشیار دبن و ب لەرزك و ترسڤە دبێژن: «بابۆ تە ئەم بەعجاندین، ئەڤ چ بۆڵ بۆڵ و گۆڵ گۆڵا تەیە و ژ بەر د ئاخڤی؟: ئەز دبێژم: بابۆ حەیران، ئەڤە كابووسكە دهێتە من، خەونێن گەلەك ب ترس و سەهمن، ئەڤ كابووسەكە وەكو ئێشەكا ڤەگرە دناڤ مالباتا مەدا، دەمێ ئەز ژی وەكو وە زاڕۆك، ڕەحمەتییێ باپیرێ وە ژی كابووسك د هاتێ و خەو ل مە حەڕام دكر.
