دڤێت تورکیا ل گەل کوردێن سووریێ دانوستاندنان بکەت
ئەندامەکێ پەرلەمانێ تورکیا راگەهاند نها ل سووریێ رەوشەکا نوو هاتیە پێش و تورکیا دشێت ل سووریێ رۆلەکێ باش بگێریت، لێ دڤێت تورکیا دەست ژ دوژمناتیا کوردان بەردەت و ل گەل کوردێن سووریێ دەست ب دانوستاندنان بکەت.
جەنگیز چاندار ئەندامێ پەرلەمانێ تورکیا راگەهاند، ژناڤچوونا رژێما بەشاری دەلیڤەکا زێرینە بۆ هەموو خەلکێ سووریێ کو بشێن وەلاتێ خوە ل سەر بنەمایێ دیموکراتی ئاڤا بکەن، رژێما بەشاری گەلەک زۆرداری ل خەلکێ سووریێ ب تایبەتی ژی کوردان کر، لێ نها رژێما بەشاری ژناڤچوو و ل سووریێ قۆناغەکا نوو دەستپێکریە و گۆت: (ئەمریکا، ئسرائیل و وەلاتێن عەرەبی یێ بزاڤا ڤێ یەکێ دکەن دا پێگەهێ خوە ل سووریێ بهێز بکەن، لێ سیاسەتا نها یا تورکیا گەلەک شاشە، دڤێت تورکیا دەست ژ دوژمناتیا کوردێن سووریێ بەردەت، ئەو یەک چو ئەنجامێن خوە یێن باش بۆ تورکیا نابن، هەکە تورکیا بڤێت ل سووریێ ببیتە خوەدان پێگەهەک باش دڤێت دەست ب دانوستاندنان ل گەل کوردێن رۆژئاڤایێ کوردستانێ بکەت، ئەو یەک د بەرژەوەندیا تورکیا دایە، مخابن سیاسەتا نها یا حوکمەتا ئەردۆغانی گەلەک شاشە و ئەو یەک دێ زیانێن خوە یێن مەزن بۆ تورکیا هەبن).
ئەندامێ پەرلەمانێ تورکیا ئەو یەک ژی دیار کر، چەند سالن ل دەڤەرێن کوردی ێێن رۆژئاڤایێ کوردستانێ رێڤەبەریا خوەسەر هەیە، هەروەسا هێزێن کوردی دربێن مەزن ل داعشێ دان، نها ئەمریکا و وەلاتێن رۆژئاڤایی و ڤێ دووماهیێ ژی ئسرائیل پشتەڤانیێ ل کوردان دکەن، رێڤەبەریا خوەسەر و هێزێن وێ هەتا نها نەبووینە مەترسی بۆ تورکیا، بەلکو گەلەک جاران سیاسەتمەدارێن رۆژئاڤایێ کوردستانێ دیار کرینە وان دڤێت ل گەل تورکیا دەست ب دانوستاندنان بکەن و پەیوەندیێن خوە ل گەل تورکیا باش بکەن، ئەو یەک ژی دەلیڤەکا گەلەک باشە بۆ تورکیا دا بشێت ل گەل کوردان دەست ب قۆناغەکا نوو بکەت و گۆت: (ڤێ دووماهیێ جارەکا دی ئەمریکا پشتەڤانیا خوە بۆ کوردێن رۆژئاڤایێ کوردستانێ دوپات کر، ئەو یەک ژی نیشا ددەت دێ ئەمریکا و ئسرائیل بەردەوام هاریکاریا کوردان کەن، ژ بەر ڤێ یەکێ ژی گەلەک یا گرنگە تورکیا وانەیان ژ دیرۆکێ وەربگریت، ب دوژمناتیا کوردێن سووریێ چو ناگەهیتە تورکیا، لێ هەکە تورکیا ل گەل کوردێن رۆژئاڤایێ کوردستانێ پەیوەندیێن خوە باش بکەت دشێت پێگەهێ خوە ل سووریێ گەلەک بهێز بکەت).
ناڤهاتی د دووماهیا ئاخڤتنا خوە دا ئەو یەک ژی دیار کر، ئێدی رەوشەکا نوو ل سووریێ هاتیە پێش و کوردێن رۆژئاڤایێ کوردستانێ نها هێزەکا کاریگەرن ل سووریێ، تورکیا ژی باش دزانیت ب شەڕی نەشێت کوردێن سووریێ ژناڤ ببەت یان ژی وان لاواز بکەت، بەلکو کورد دێ بنە هێزەکا کاریگەر د سیستەمێ نوو یێ سووریێ دا، ژ بەر ڤێ یەکێ ژی گرنگە تورکیا ل گەل کوردێن رۆژئاڤایێ کوردستانێ دەست ب قۆناغەکا نوو بکەت.
