گولەباخ
بەهزاد بەهرام
ئەڤ سینگە
ب نێنۆكان من بۆ تە قەوراند
ژ تەرا من كر گۆزك و گولدان
وەرە لێ شین ببە
رهێن خوە كویر و هویر ببە
دا ژ خوینا دلێ من
ئاڤێ ڤەخوی و
دگەل هەر هەناسەكێشانەكێ
بایێ زەلال هەلمژی
دیسان بەژنا خوە دكەم
سه و سیبەر
دا ل هاڤینان بەر نزار بی
یا دیار و بژارە بی
گولەباخ
دگەل پاییزێ من هەر شەرە
هەر سال بەرامبەر من
دەیندار و ب قەرە
دناڤ دەستێن مندا رنگز و
بێ بال و چەنگ و بێ پەرە
گولەباخ
من چاڤ بۆ تە كرن
تیرۆژكێن رۆژێ
داكو ل زڤستانان بەر بەرۆژ بی
هەر گەشدار و بهێندار بی
گولەباخ
مەشا تە لسەر سینگێ من
سال ب سال
پر بشكۆژ و خونچەدارە
پری كولیلك و گولزارە
باخچە و هەردەم بهارە
لەورا من ناڤ ل تە كر گولەباخ
وەی! گولەباخ
تەڤدا بۆ تە بوومە
ئاڤ و ئاخ.
