چرکەک ژ هینگێ
شیان مەهدی کانیسارکی
هەردەم ئەز و برایێ خوە یێ بچویک ب حەفکا ئێک و دوو ڤەبووین، مە گەلەک ڤێکنەدکر، ئەز ل هیڤیا دەلیڤەیەکێ بووم دەیکا من خافل ببیت داکو من پرێقێن ژ بنێ گوهێ وی ئینابا، د مال ڤە ئەز گەلەکێ ب هێز بووم، لێ ژ دەرڤە من ب دەستێن هەمیان حتک دخوارن. ئارامی و دلساخیا من ژ دەرڤەی دەرگەهێ حەوشێ بۆ من ئاریشە چێدکرن دگەل زارۆکێن هندی من، لێ کەسێن دانعەمر گەلەک حەزژ من دکرن، هینگێ هێژ هەمی دژیانێ دا بوون! لێ نوکە کتەکا کێم یێن ماین دژیانێ دا. هەردەمێ ئەز و برایێ خوە ب جڕە چووباین و دکەفتین دویف ئێک ل دۆر وێ حەودکا درێژا گول ریحانان، چاڤێ من ب بابێ من دکەفت ئەو قورئانا ژ باپیرێ من بۆ وی مای لسەر قولاچکا سەری یا وی کەراویتێ ل بنێ ژوورێ دخواند، مە شەڕێ خوە دبرە بەردەرگەهێ حەوشی ژ دەرڤە ئەوژی هەکە چاڤێ دەیکا من ب مه نەکەفتبا چونکی زوی ب زوی ڕێک نەددا مە بچین کۆلانێ. نوکەژی پشتی ئەز و برایێ خوە مەزن بووین ئێدی ئەم چ شەڕان ناکەین، ل ناڤ حەوشێ ئەم هەردو د ڕوینشتینە، ئەو قورئان و کەراویت ژی هێژ یێ ل جهێ خوە..
