ژڤانێ دوماهییێ
سەیفوللا محەمەد
دزانم تو ژی ب ڤان ژڤاناڤە گەلەك وەستیای، نە جارەك و دەه جاران مە جهێ ژڤانێن خوە گوهاڕتن، لێ هەر مە نەشییا هەناسەیا عەشقەكا ژ دل هەلكێشین، لەوا ئێدی بەسە ئەم ل بەندا ژڤانێن تامسار بین، بۆ هەر كێلییەكێ دلێن مە سەد ئاوازان بژەنن، سەد گەف، سەد نفرین، سەد چاڤنەباری، سەد بەكرۆك، نەهێن خوە ل سەر دەهێن مە بێخن.
ئێدی بەسە، وەرە ئەز ل بەندا ژڤانێ دووماهییێ مە، ئێكێ ژ دویان بكین، ڤێ جارێ پێشوازییەكا سپرایز كرییە. دێ مەحفیرا سۆرا پێشوازییان ڕائێخم و هەمی سالێن عەمرێ خوە ل سەر دانم، داكو دەمێ دهێی و هەر پێنگاڤەكا دهاڤێژی، ل سەر سالەكا ژ عەمرێ من دانی، پێنگاڤا ئێكێ ل سەر وێ سالا دەسپێكا دلێ من تو د ناڤ خوەدا ڤەگرتی، پێنگاڤا دویێ و هەتا دگەهتە بەری دوماهییێ، هەمی سالێن خەم و خەریبییا د بن شمكا خوە یا ڕەقڕەقیڤە بهەڕشینی، ل پێنگاڤا دوماهییێ و دگەل سلاڤێ، دەسپێكەكا دی یا ژیانێ ب من ببەخشی، دزانم ژی چ دەسپێك بێ دوماهی نینن، هەتا دوماهییا ڤێ دەسپێكێ ژی خودێ كەریمە.
