بووم ڕێڤنگێ چۆل و چیا
سەگڤان ئەحمەد
شەڤا تاری باران باری
دئێتن دەنگێ برویسییا
ئەز ڕێ دویرم برین كویرم
بووم ڕێڤنگێ چۆل وچیا
بەلەنگازم مرنێ دخوازم
ئەز دنالم وەك سێوییا
دل كول ئەزم ئەز بێ كەسم
نەشێم باڤێم گاڤا پییا
كا گولا من دلبەرا من
بۆ من نەما یا من دڤیا
: : : : : : : : :
دل شكەستیمە بێ هیڤیمە
فەلەك كەتم دەریا خەما
بێ هەڤالم ئەز دنالم
بۆچی ئەڤرۆ من كەس نەما
شین و ڕەشم نە دلگەشم
ژ من زیزن كەیف و سەما
چاڤ تارینە دل برینە
كا نێرگزا باغ و چەما
ددلیدا بوو ژ من جودابوو
ئەز نزانم ل كیڤە ما
: : : : : : : : :
خۆ ژ من دویركر دل ئێخسیركر
خودانا وا دێم و ڕوییا
نە دبشكورم ونە د كەنم
ئەز دل كولم ژ هەمییا
یا لبەر چاڤا هەمی گاڤا
جان و جەرگێ من حەلییا
فەلەك چما كوشتم خەما
لمن هشك بوو دارا هیڤییا
كا خەجا من سیابەندم
نێچیرڤانێ پەز كیڤییا
