ل شۆڕەشا ئیلۆنێ هەتا ئەنفالان 25 جاران مالا من هاتیە ڤەگوهاستن
دیدار، سالار محەمەد دۆسكی:
١ – ٢
پێشمەرگەیێ هەرد و شۆڕەشێن ئیلۆن و گولانێ (زەینەل شوكر) یێ ناڤدار ب ( زەینەل رێكانی) ل سالا 1943 ل گوندێ (كەیادێرێ) ل دەڤەرا رێكان ژ دایك بوویە، ل دەسپێكا شۆڕەشا ئیلۆنێ چەكێ شەرەفێ هەلگریتە و دبیت پێشمەرگە و ژ بەر زیرەكی و شارەزایا وی دشەران دا چەندین جهان دهێتە راسپاردن، دو جاران بریندار بوویە و ل هەوا ئەنفالێن رەش دەربەدەری ئیرانێ بوویە.
پێشمەرگەیێ هەر دو شۆڕەشێن ئیلۆن و گولانێ زەینەل رێكانی بۆ رۆژنامەیا ئەڤرۆ گۆت: پێشتر مالا مە ل توركیا بوو و ل سالا 1963 مالا مە هاتە باژێرێ مویسل و چوومە دەف (مەلا حەمدی و عەلیێ خەلیل) و هاتمە رێكخستن و هاتمە راسپاردن بۆ گەهاندنا زانیاریان ل سەر دەڤەرێ بۆ ناڤ پێشمەرگەی وەك رێكخستیەكێ نهێنی و مە دەست ب كارێ خوە كر، ل سالا 1964 ل گەل (قەنجو كەیادێری) مە پەیوەندی ب شۆرەشا ئیلۆنێ كر، و چووینە دەڤەرا رێكانیان و چووینە دەف خودێ ژێ رازی (مەلا مستەفا بارزانی) ، وی سەردەمی خودێ ژێ رازی (مەلا مستەفا بارزانی) رۆلەكێ باش دامە و هاریكاریا مەكر، و ئەم هەر دو هاتینە هنارتن بۆ (بێتاتێ) و (شەریف هورەیی) ژی گەهشتە شۆرەشێ و ئەو ژی هاتە هنارتن بۆ (قەلادزێ) .
هەمان پێشمەرگەیێ هەردو شۆرەشان گۆت: ل تێكچوونا رێكەفتنا 11 ئادارێ و تایبەت پشتی شەر دناڤبەرا سەركردایەتی یا كوردستانێ دا و حوكمەتا بەعس یا وی سەر دەمی دروست بووی، مە رۆلەكێ باش گێرا دشەران دا و تایبەت ل دەڤەرا خوە یا هاتینە راسپاردن و هەر جهەكێ بۆ مە هاتبا دەست نیشانكرن ب هێزا خودێ مە سەركەفتن تێدا دئینان، (علی شەعبان بارزانی) ئامر هێزێ مەبوو، وی سەردەمی گۆتە خودێ ژێ رازی (مەلا مستەفا بارزانی) زەینەل رێكانی گەلەكێ شارەزایە بۆ شەران و هەر جهەكێ دهێتە راسپاردن وی جهی ب سەركەفتیانە دپارێزیت، و هەر شەرەكێ پشكداریێ تێدا دكەت ب سەركەفتیانە وی جهی رزگار دكەت، و (مەلا مستەفا بارزانی) ژ (عەلی شەعبان بارزانی) خودێ ژێ رازیبت خواست سەرەدانەكێ بۆ بكەم، پشتی هاتیمە ئاگەهداركرن كو بچمە بارەگایێ(ئەحمەد حاجی) دێ كەسەك هێتە دیف من را و دووڤدا (عەلیێ خەلیل) هاتە دیف من را و چووینە دەف خودێ ژێ رازی (مەلا مستەفا بارزانی)، وی دەمی گەلەك پێشوازیەكا جوان ل من هاتەكرن و گەلەك كەیفا خوە ب من ئینا و دەست خوشیی ل من هاتەكرن، و كلاشینكوفەك و چاردەخورەك وەك دیاری پێشكێشی من كرن، و پشتی ڤی سەرەدانێ پتر مورالا مە بلند بوو.
پێشمەرگەیێ شۆرەشا ئیلۆن و گولانێ، زەینەل رێكانی ئەو ژی گۆت: چەندین شەران دا پشكدار بوویمە وەكی شەرێ (كەپكێ حەمە ئاغای، سپیلكی، دولا ئالانێ، گەلیا بێشێ، هەیبت سولتان، خواكورك، دولا شەوێ، بێتاتێ، شیشالا) هەمی شەران دا سەركەفتی بوویمە.
پێشمەرگەیێ هەر دو شورەشێن ئیلون و گولانێ، زەینەل رێكانی، بەحسێ چەند شەران دكەت ل شۆرەشا گولانا پێشكەفتنخواز ژی گۆت: من شەر ل دەڤەرێن ناڤ (بەرواری، سێدەرا، گەلیێ سیلا) گەلەك شەرێن دی پشكدار بوویمە.
زەینەل رێكانی، پێشمەرگەیێ هەر دو شۆرەشێن ئیلۆن و گولانێ ئەو ژی ئاشكراكر، كو دژیێ خوە یێ پێشمەرگاتیێ دا دو جاران بریندار بوویە، جارەكێ بێتاتێ و جارەكێ كەپكێ حەمە ئاغای بریندار بوویمە و ئێكەم شەرێ پشكدار بوویم ل شۆرەشا ئیلۆنێ شەرێ كەپكێ حەمە ئاغای بوویە، و چیایێ ماخولكێ ل گەل حوكمەتا ئیراقێ و چەتان وێ سالێ گەلەك بەفر هاتبوو و زڤستان بوو، بەلێ كارتێكرن ل سەر من نەكر و مە جهێ خوە بۆ دوژمنی نە بەردا و ل شەرێ دولا شاوێ مە گەلەك وژمن ئێشاند و هەر چ خوشی ژ بەر مە نەبوو ومن جهێ خوە نەبەردا هەتا رێكەفتنا خیانەتكاری یا جەزائیر ل سالا 1975ێ .
پێشمەرگەیێ شۆرەشا ئیلۆن و گولانا پێشكەفتنخواز، زەینەل رێكانی بەحسێ روودانەكا خوە یا مێژوویی یا ب مەترسیداردكەت و گۆت: ل دەمێ ئەم ل (بێتاتێ) ل گەل گەل چەند پێشمەرگەیان ئەم ئاسێ بووین ل كەپكێ حەمە ئاغای و شەڤەك و رۆژەكا ئەم ماینە ئاسێ و لەشكرێ حوكمەتێ سەرمەدا دەرباز بوو و دووڤدا ئەم دەربازبووین.
هەروەسا گۆت: ل كەپكێ حەمە ئاغای لەشكرێ ئیراقێ هات و ئەز چوومە بێتاتێ(50) رۆژا مامە ل وێ دەڤەرێ و نە راوستیام هەتا ئەو لەشكر من كریە دەڤەرێ و شیام ب سەركەڤم و پشتی ڤەگەریایمە بارەگایێ خوە ئەو نانێ مایە ل وێرێ مە هویردكر ل سەر بەرا و مە دخوار وی دەمی خوارن نەبوو، و چار هەیڤان جارەكێ پێنچ دینار مە وەردگرتن، بلا رۆلێ خەلكێ گوندان و تایبەت ئافرەتان ژبیر نەكەین، و ئەوان رۆلەكێ هەرە كاریگەر هەبوو و پشتەڤان و هاریكارێن مە بوون، و هەر جهەكێ چووباینێ خوارن بوومە بەرهەڤدكر، و پێشمەرگەیێ ل شۆرەشا گولانێ گەلەك ماندیبوون دیتی و گەلەك جاران بیرا من دهێت هەر 12 هەیڤان من دەستیردان وەرنەگرت، و هەر شنی من ژیانا هەڤژینێ پێك ئینا بوو و گەلەك جاران ئامر هێزێ مە دگۆتە من هەرە بەلێ ئەز نەدچووم، و تایبەت دەمێ شەر و من گۆت دا نەبێژن چەپەرێن شەری بەردان.
