ساتا ئه‌ردی. .. .. و ژینگه‌ه
دلۆڤنیبرن ب ژینگه‌هێ و دلسۆزی ل هه‌مبه‌ر وێ كانیا مرۆڤ ئاڤێ ژێ ڤه‌دخۆت، ئه‌ڤه ئێك ژ چالاكیێن نیڤده‌ولی یه، سالانه دهێته ساخكرن ب مه‌ره‌ما بلندكرنا ئاستێ هشیاریێ ل دۆر چاوانیا گرنگیدانا مرۆڤی ب لایێ ژینگه‌هێ ڤه, بۆ جارا ئیكێ ل باژێرێ (سیدنی) ل ئوسترالیا ل سالا 2007 هاتیه ئه‌نجامدان، وه‌كو گرنگیدان ب ژینگه‌هێ و هشیاركرنا خه‌لكی ل دۆر مه‌ترسیا پیسبوونا ژینگه‌هێ و كارتیكرنا وێ ل سه‌ر گوهۆرین و تێكچوونا سه‌قای، سالانه ل رۆژا شه‌مبیا دووماهیێ ل مه‌ها ئادارێ د هێته ساخكرن، ئه‌و ژی ب رێیا قوتكرنا كاره‌بێ ژ باژێری یان ژ جهێن گشتی وه‌كو ئۆتێل،خارنگه‌ه، جاددێن گشتی، باله‌خانه‌یێن بلند، پاركێن مه‌زن.. . هتد، هه‌لكرنا شه‌مالكێن رۆناهیێ ل جهێ كاره‌بێ, مه‌ره‌م ژ ڤێ چه‌ندێ كێمكرنا فڕینا گازێن ژهراوینه بۆ ئاسمانی، ژ ئه‌گه‌رێ ب كارئینانا ئامیرێن دانا كاره‌بێ ب رێیا سۆتنا كه‌ره‌ستێ گازوایلێ، كو ژێده‌ره‌كێ سه‌ره‌كی یه د پیسكرنا ژینگه‌هێ دا، مفایێن ڤێ چه‌ندێ ژی ئه‌وه فێركرنا خه‌لكی ل سه‌ر پاراستن و پاقژكرنا ژینگه‌هێ پێكڤه، ئابووریكرن د زێده‌مه‌زاختنا كاره‌بێ دا، دبێژن گرنگ نینه مرۆڤ زوو پێش بكه‌ڤیت، لێ یا گرنگ ئه‌وه مرۆڤ بۆ لایێ دروست ڤه بچیت، زۆر وه‌لاتێن جیهانێ به‌ره‌به‌ره یێ ڤێ رۆژێ ساخ دكه‌ن، هه‌رێما كوردستانێ ژی ب شانازی ڤه ئێك ژ وان وه‌لاتانه كو ڤێ ساتێ ساخ دكه‌ت، ده‌ستخۆشیێ ل فه‌رمانگه‌ها پاراستنا ژینگه‌هێ ل دهوكێ دكه‌ین، بۆ ساخكرنا ڤێ ده‌مژمێرا ئه‌ردی، ژ به‌ركو چه‌نده ئه‌ڤه ئامه‌ژه‌كه كو جڤاك یێ ل سه‌ر رێیا راست دچیت، واته یا گه‌شبینیێ ل ده‌ف مرۆڤی په‌یدا دكه‌ت، وه‌سا دیار دكه‌ت كو جڤاكێ مه د قووناغا گوهۆرینی دا یه، به‌ر ب ره‌وشه‌كا باشتر دهێته په‌یڤین ژینگه‌ها پاقژ و ساخله‌م نیشانا مێشكه‌كێ پاقژ و ساخله‌مه.
رێكخراواێنN. G. O یێن گرێدای ب ژینگه‌هێ و پاراستنا كه‌سكاتی و چالاكڤانێن ڤی واری، دڤێت رۆلێ خوه بینن ل سه‌ر گوهارتنا مێشكێ وه‌لاتیێ مه ل سه‌ر ژینگه‌هێ، به‌ربه‌لاڤكرنا ره‌وشه‌نبیریا ژینگه‌هێ، ب تایبه‌تی د ژیێ سنێله‌یێ دا، نه‌مازه قوتابیان، كو ئیك ژ فاكته‌رێ گرنگێ ڤی كاریه بۆ په‌یداكرنا ره‌وشه‌نیریا مرۆڤایه‌تێ ل جه‌م به‌ره‌بابێن تازه دگه‌هن، هه‌ر وه‌سا گۆتار بێژێن مزگه‌فتا دشێن رۆله‌كی پێشچاڤ بگێرن ب رێیا مینبه‌رێن مزگه‌فتان ل دۆر هشیاركرنا خه‌لكی ل سه‌ر گرنگیدان ب ژینگه‌هێ, ژ به‌ر كو ژینگه‌ه مالا مه هه‌میانه له‌ورا پاراستنا وێ ئه‌ركێ هه‌میانه, ب ڤێ چه‌ندێ جڤاك هه‌می دێ به‌ر ب باشیێ و مرۆڤاتیێ ڤه چن د پاشه‌رۆژی دا. لێ یا پێدڤی بوو وه‌ك پێشنیاز
ده‌زگه‌هێن راگه‌هاندنێ پێشده‌م كار بۆ ڤێ ده‌مژمێری كربا، دا كو ب شێوه‌كێ رێكوپێكتر و به‌ر فره‌هتر هاتبا ئه‌نجامدان، پتر گرنگی پێ هاتبا دان.
