دژبـەریـا (تـەوتین)ێ و (هـژمـاری من) ب دووماهی هات
نـاجی بـەدەل
د ستراتیژیەتا دەستپێكا هەر دانوستاندنەكێ دا دەست نیشانكرن و خالبەندیكرنا ئەوان داخوازی و شێوەیێ سەرەدەریكرنێ بۆ بدەستڤەئینان و زامنكرن و بنەجیهكرنا هندەك ژ ئەوان خالێن تە هەین ل گەرەكا دانوستاندنێ بدەستڤە ئینای سەركەتنە، ژ دەستپێكا دامەزراندنا عیراقێ و هەتا گەهشتیە قۆناغا ئەڤرۆ ب دەولەتەكا فیدرالی دهێتە دانان هێشتا چەندین و بگرە و ڤەكێش و دانوستاندنێن هەمەجورێن دناڤبەرا هەرێمێ و بەغدا دا هەنە، هەلاویستن و بەردەوامبوونا ئاریشەییان د بەرژەوەند و دۆزا كوردی دانینە و چەند زیترە بهێنەچارەكرن مفابەخش و زەێدەتر بدەستڤەهێت ژ پاش خستنێ، د شیان دایە خالێن هەڤپشك بهێنە چارەكرن.
دوماهی ئاریشە بۆ پێدانا مووچەی ب بەنكیكرنا مووچەیێ فەرمانبەرێن هەرێمێ یە كو دەڤ هەرێمێ هژماری من و دەڤ بەغدا تەوتینە، بنەما و مەرەم ژێ چێكرنا وان ئێكە لێ تێگەهـ و میكانزمێن وان ژێك جودانە، د دووماهی روونكرنەكێ دا دادگەها دستوری دوپاتی ل سەر بنەمایێ رێكارێن بەنكا مەركەزی و فەرمانبەر یێ سەر پشك بیت د هەلبژارتنا بەنكێ كر، ئەڤە پێنگاڤەك و دەرگەهەك نوویه بو هەرێمێ و بێ تانە لێدانە و بجهكرنا وێ ئەركە، سەرپەرشتیارێ پرۆژەیێ هەژماری من پێشوازی ل وێ بڕیارا دادگەهێ كر، ئێدی دڤێت هەرێم ژی پیچەكێ دیڤ بەردانەكێ بكەت داكو ئەڤ قوناغا باش هاتیە پێش مانا هژماری من بخۆ ب وی ناڤی سەركەتن و دەستكەڤتەكە ئەڤجا ب چ ئالاڤ پارەداركرن بهێتەكرن.
ل پێشیا پارتێن سیاسی یێن عیراقێ هەلبژارتنەكا چارەنوساز هەیە بۆ وان و بەرهەڤ نینن چ داگێرانەكێ بكەن كو كارتێكرنێ ل دەنگ و رێژەیا كورسیكێن وان ل جڤاتا نوونەران بكەت، لەورا دەلیڤەیك زیرینە و ئەم ژی باینە وەك وێ یا دادگەها فیدرال كری داكەین، گرنگ ژین و ژیارە سەقامگیریا ئابووری یە بۆ وەلاتیان.
خوشگۆزەرانی و دلنیایێ دەتە وەلاتیان دڤێت ئەوێ دەست نیشان بكەین، چونكو هەر ئەو وەلاتیە یێ ئاستێ نوونەراتیا گەلبوونێ ددەتە دەسەلاتێ و دەسلات ژی دڤێت گۆهدار و گودارا ژێدەرێ رەواتیا مافێ نوونەراتیێ بگریت، چونكو خۆشگۆزەرانی پتر مە نێزیكێ كەنارێن ئارامیا ئازادیێ و بدەستڤهئینا مافێن رەوایێن كوردی دكەت، چەند خۆشی و ئارامی و گەشەیا ئابوور و جفاكی و پیشەسازی پێشكەڤیت، پشكداریا زلهێزان گەلمە پتردبیت ئەڤە بخۆ پاراستنەكە بۆ سەقامگیریێ ل دەڤەرێ.
ئێدی دەم هات هەرێم ب هەماهەنگی و ب وان رێكارێن بنەمایێن بەنكا مەركەزی ب بەنكیكرنا مووچەیان رازی بیت و هندی زوویە چێترە دەرباز بین و دەست ب ئاریشەیەكا دی یا هلاویستی بكەین چونكو پێكڤە چارە نابن دڤێت ئێك ئێكە و دەم ژێرا دڤێت.
تیمێ كورد ل حوكمەتا فیدرال دڤێت لگۆری ستراتیژەیەتەكا ئیكگرتی و دوور ژ هزر و بەرژوەندێن پارتایەتی یێن بەرتەنگ، بەلكو پێكڤە بنە ئیك دەست ئێك ئیكە ئاریشە بهێنە چارەكرن بەریا گوهورینێن كو بریارە ل دەڤەرێ بێنەكرن، ئانكو بەرهەڤكاریەك هەبیت داكو ئێدی نەكەڤینە بن چ ئەجندایێن ئەقلیمی و دولی بەلكو هەرگوهورینەكا دبیت دێ ل سەر ئەوان میكانزم و بنەایێن قانونی دانوستاندن هێتەكرن یێن ئەڤرۆ بنیات بۆ دهێتە دانان.
