شام و رێڤه‌به‌ریا خوه‌سه‌ر ل دۆر پەترۆلێ رێککەفتن
هەڤدیتنێن رێڤەبەریا خوەسەر ل گەل شامێ بەردەوامن و هەتا نها ل دۆر دو خالان رێککەفتن هاتیە کرن، ئێک بابەتێ پەترۆلێ یە و خالا دی ژی سەبارەت ب هەماهەنگیێ د ناڤبەرا هێزێن ئێمناهیێ دا و هندەک خالێن دی هەنە هێشتا جهێ ناکۆکیێ نە د ناڤبەرا هەر دو ئالیان دا.
هه‌ڤدیتنێن د ناڤبه‌را هێزێن سووریا دیموکرات و ده‌ستهه‌لاتا نوو یا شامێ دا به‌رده‌وام دکه‌ن، هه‌تا نها د هه‌ڤدیتنێن هه‌ر دو ئالیان دا ب تنێ د وارێن په‌ترۆلێ و په‌یوه‌ندیێن ئێمناهیێ دا رێککەفتن هاتینه کرن، لێ د وارێن نڤیسینا دستووره‌کێ نوو بۆ سووریێ، پشکداریا کوردان د ده‌ستهه‌لاتا نوو یا شامێ دا و د بابەتێن سه‌ربازی دا هەتا نها چو رێککەفتن نەهاتینە کرن و هەڤدیتنێن هەر دو ئالیان بەردەوامن.
ئه‌حمه‌د سلێمان بەرپرسێ پەیوەندیان ل وه‌زارەتا په‌ترۆلێ یا ده‌ستهه‌لاتا نوو یا شامێ د داخۆیانیه‌کێ دا بۆ دەزگەهێن راگەهاندنێ دیار کر، پشتی چەندین هەڤدیتنان ل دۆر پەترۆلێ نها رێککەفتنەک د ناڤبەرا شامێ و رێڤەبەریا خوەسەر دا هاتیە ئیمزا کرن و گۆت: (بۆ دابینکرنا پێدڤیێن وزێ مە شیا ل گه‌ل هێزێن سووریا دیموکرات ئانکۆ رێڤه‌به‌ریا خوه‌سه‌ر رێککەفتنەکا نوو ئیمزا بکەین و د ڤێ چارچۆڤەیێ دا دێ رۆژانه بۆ پێدڤیێن وزێ ژ باشورێ فراتێ په‌ترۆلێ کڕین، د قۆناغا یه‌که‌م دا دێ رۆژانه ٥ هزار بەرمیل ژ بیرێن په‌ترۆلێن باکور و رۆژهه‌لاتێ سووریێ بۆ پالاوگەهێن بانیاس و حومسێ هێنه ڤه‌گوهاستن).
ل ئالیێ دی بەرپرسەکێ رێڤەبەریا خوەسەر یا رۆژئاڤایێ کوردستانێ ژی دیار کر، هەڤدیتنێن وان ل گەل شامێ بەردەوامن، هەتا نها د بیاڤێ پەترۆلێ و هەماهەنگیا د ناڤبەرا هێزێن ئێمناهیێ دا رێککەفتنەک هاتیە ئیمزا کرن، لێ هێشتا گەلەک ناکۆکی د ناڤبەرا وان و شامێ دا هەنە و دڤێت بهێنە چارەسەر کرن، بەری هەر تشتەکێ دڤێت نوونەرێن کوردان ژی د کۆنفرانسێ نشتیمانیێ یێ سووریێ دا پشکدار بن و هەروەسا دڤێت کورد د ئامادەکرنا دستوورەکێ نوو بۆ سووریێ دا پشکدار بن، لێ مخابن ژ بەر فشارێن تورکیا دەستهەلاتا نوو یا سووریێ ژی بەرهەڤ نینە وەکو پێدڤی ل دۆر بابەتێن گرنگ و ستراتیژی ل گەل کوردان دانوستاندنان بکەت.
هەمان بەرپرسی ئەو یەک ژی دیار کر، ئەمریکا، وەلاتێن ئێکەتیا ئۆرۆپا، ئسرائیل و چەندین وەلاتێن عەرەبی ژی بۆ شامێ دیار کرینە هەتا کورد ل سووریێ نەگەهنە مافێن خوە و کورد د دەستهەلاتا نوو یا شامێ دا پشکدار نەبن ئەو پشتەڤانیێ ل دەستهەلاتا نوو یا شامێ ناکەن، ژ بەر ڤێ یەکێ ژی د ڤان چەند رۆژێن بۆری دا هەلوەستێ شامێ ل هەمبەر رێڤەبەریا خوەسەر تا رادەیەکێ نەرم بوویە، چونکی ئەو ژی باش دزانن هەتا پرسا کوردی ل سووریێ نەهێتە چارەسەرکرن و کورد نەگەهنە مافێن خوە دێ مەترسی ل سەر دەستهەلاتا وان هەبیت.
