ئەڤرۆ باتیفا و شێخان چاڤ ل پێشەنگییا خولێ نە
عەلی حاجی:
بڕیارە ئەڤرۆ ل دەمژمێر چارێ ئێڤاری یاریێن گەڕا هەشتێ ژ هەڤڕكیێن خولا پلا ئێكا كوردستانێ یا فوتبۆلێ بۆ كۆما دویێ بهێنە كرن ئەوا 10 یانە دڤێ كۆمێ دا پشكدارن، هەردو یانەیێن پارێزگەهێ و ئیدارا سەربەخۆیا زاخۆ شێخان و باتیفا دو یاریێن گرنگ و ب هێز هەنە و چاڤ ل پێشڤەچوونێ بۆ ڕێزبەندییا ئێكێ و دویێ هەنە.
ل یاریگەها خوە و دناڤ ئەرد و جەماوەرێ خوە دا یانەیا شێخان دێ مێڤاندارییا یانەیا خەلیفان كەت كو دهێتە هژمارتن ئێك ژ یاریێن بهێز بۆ كوڕێن باژێرێ پێكڤەژیانێ، شێخان خودانا 14 خالانە رێزا چارێ دهێت كێمترییا دو خالان ژ یانەیا هەلەبجەیا شەهید ئەوا سەرێ لیستێ دهێت ب16 خالان، لێ یانەیا خەلیفان 11 خال كۆمكرینە رێزا شەشێ دهێت، تیما شێخان ئاست و ئەنجامێن وێ د باشن و شیایە چار سەركەفتنان و دو وەكهەڤی و ئێك خوسارەتی هەبیت ئەڤە ژی پالدەرە ئەڤرۆ بشێت بەردەوامیێ بدەتە سەركەفتنان.
ژلایێ خوەڤە یانەیا باتیفا دێ ل هەولێرا پایتەخت و دناڤ یاریگەها دویێ یا شەهید فرانسۆ حەریری بیتە مێڤانا یانەیا برۆسك، تیما باتیفا ژی ب ئاست و ئەنجامێن باش هەنە ئەوا ب14 خالان رێزا سێیێ دهێت ژ چار سەركەفتن، دو وەكهەڤی و ئێك خوسارەتی، دێ بەرانبەر یانەیا برۆسك بیت ئەوا بزاڤێ كەت خوە ژ رێزبەندیا داكەفتنێ پارێزیت ژبەركو ل رێزا هەشتێ دهێت ب كۆمكرنا پێنچ خالان، كوڕێن باتیفا ژی هیڤی و ئۆمێدێن مەزن هەنە كو ئەڤ سالە دەستكەفتەكی بۆ باژێرێ خوە بینن.
ژ یاریێن دی یێن ئەڤرۆ، پەروەردە- هەلەبجەیا شەهید، حاجیاوا- بەختیاری، ژبەر خوەڤەكێشانا یانەیا باوەنوور ژ خولێ بۆ یارییا ئەڤرۆ بەرانبەر خەبات ب ئەنجامێ سێ ب چنە هاتییە هژمارتن خوسارەتی.
