ئەڤرۆ دهۆك دێ بزاڤێن ڤەگەڕاندا هێزا خوە كەت
قەیس وەیس:
چاڤەڕێیە ئەڤرۆ سێ یاریێن دی ژ هەڤڕكیێن گەڕا 30ێ یا خولا فوتبۆلا ستێرێن ئیراقێ ل یاریگەهێن جودا بهێنە ئەنجامدان، یانەیا دهۆك دێ ل یاریگەها خوە مێڤاندارییا یانەیا كەربەلا كەت، ل پایتەختێ ئیراقێ بەغدا نەفت و كەرخ دێ ل دەمژمێر پێنجی ئێڤاری بەرانبەر ئیك یاریێ كەن، ژلایێ خوەڤە د هەمان دەم دا یانەیا مینا دێ تیما كارەبا مێڤان كەت.
ئەلهۆیێن چیا دێ شەڕی بۆ سێ خالان كەن
جەماوەرێ وەرزشی یێ تیما یانەیا دهۆك ئەڤرۆ ل دەمژمێر 7:30 شەڤ دێ ل یاریگەها سەرەكێ ب ژڤانن بۆ پشتەڤانییا تیما خوە قارەمانا كەنداڤی دەمێ مێڤاندارییا یانەیا كەربەلا د یارییەكا هەستیار دا بۆ ئەلهۆیێن چیا و هەموو بزاڤ دێ بۆ ڤەگەڕاندنا هێز و ئەنجامێن سەركەڤتنێ بیت، پشتی د دو یاریێن بۆری دا نەشیایی ب سەركەڤیت، دهۆك ب كێمترییا شەش یاریێن پاشئێخستی د نوكە دا 41 خال كۆمكرینە و پێشوەخت رێزا هەشتێ دهێت ژ 12 سەركەفتن، پێنج وەكهەڤی و شەش خوسارەتی، ژلایێ خوەڤە یانەیا كەربەلا خودانا 22 خالانە ل رێزبەندییا 19ێ و بەری دووماهیێ دهێت، وەكو پێشچاڤ دبیت یاری بۆ ئەلهۆیێن چیا ب سانەهی بیت لێ د ناڤا یاریگەهێ دا بتنێ فیركا دووماهیێ یا دادڤانی دێ ئەنجامی ئێكلاكەت.
یاریێن دهۆكێ یێن پاشئێخستی
ژبەركو تیما فوتبۆلا یانەیا دهۆكێ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ كۆپایێ ب دەستڤە بینت، د دەمێ قارەمانیێ دا فدراسیۆنا فوتبۆلا ئیراقێ دەلیڤە دابوو دهۆكێ یاریێن وێ بهێنە پاشئێخستن بوخاترا ئەڤێ قارەمانیێ كو سەرجەمێ و بوونە شەش یاری و ب ڤی رەنگی، بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا و یارییا شەشێ مێڤاندارییا یانەیا مینا یە بەسرایی بكەت.
گۆلكەرێن ئەلهۆیێن چیا د خولێ دا
تیما دهۆكێ خوانا دەهـ یاریزانێن پشكداری د تۆماركرنا 30 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش چار گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
هەولێر دگەل هەڤڕكا سەرێ لیستێ یە و نەورۆز ل بەغدایە،
بڕیارە سوبەهی دوشەمبی چار یاریێن مایی ژ هەڤڕكیێن گەڕا 30 بهێنە كرن، د گرنگترین یاریێن ڤێ حەفتیێ دا بۆ كوڕێن كەلهە و منارە یانەیا هەولێر دێ ل یاریگەها شەهید فرانسۆ حەریری مێڤاندارییا یانەیا شورتە یا بەغدایی ل دەمژمێر 7:30 شەڤ كەت كو دهێتە هژمارتن تاقیكرنەكا بزەحمەت بۆ هەولێرییان ئەوا بشێوەیەكێ دەمكی دا ل رێزا 15 دهێت ب 35 خالان ژ 10 سەركەفتن، پێنج وەكهەڤی و 13 خوسارەتیان، د بەرانبەر دا یانەیا شورتە ئەوا شەڕی بۆ دەستڤەئینانا رێزبەندییا ئێكێ دكەت ل رێزا دویێ یە ب 59 خالان دێ بزاڤێ كەت بەردەوامیێ بدەتە پێشڤەچوونا خوە پێخەمەت پاراستنا ناسناڤێ خوە یێ وەرزێ بۆری.
نەورۆز گەشبینە ب سێ خالان ڤەگەڕیت
د بەرانبەر دا یانەیا چارێ یا كوردستانی تیما فوتبۆلا یانەیا نەورۆز دێ ل یاریگەها ئەحمەد رازی ل پایتەختێ ئیراقێ بەغدا بیتە مێڤانا یانەیا ئەلحدود ل دەمژمێر پێنجێ ئێڤاری د یارییەكا دی یا بزەحمەت دا بۆ یانەیێن كوردستانی، سەرباری رێزا دووماهیێ دهێت هەموو بزاڤێن وێ خوە قۆرتالكرنە ژ وێ رێزبەندیێ، تیما نەورۆز خودانا 36 خالانە ل رێزا 13ێ دهێت ب نەهـ سەركەفتن، نەهـ وەكهەڤی و 11 خوسارەتییان، تیما حدود ژ یاریێن دی یێن سوبەهی، نەجەف- ئەلگەرمە دەمژمێر پێنجێ ئێڤاری، حدود ئەوا ب 17 خالان رێزا 20ێ و دووماهیێ دهێت شەڕەكێ مەزن دێ كەت بۆ سەركەفتنێ پێخەمەت خوە قۆرتالكرن ژ رێزبەندییا دووماهیێ ژ بۆ دانا دەلیڤەیا مانا خوە د خولێ دا بهێلیت، دبیت وەكو شرۆڤەكرنا پێشچاڤ یاری بۆ نەورۆز ب سانەهی بیت لێ ل سەر ئەردێ یاریگەهێ بتنێ ئەنجام دێ دیاربیت، دەمژمێر پێنجێ ئێڤاری یانەیا نەجەف دێ ئەلگەرمە مێڤانكەت.
