باخچەلی سەبارەت ب قۆناغا ئاشتیێ چەندین داخوازی ژ ئەردۆغانی کرینە
رۆژنامەیەکا تورکیا دیار دکەت د هەڤدیتنا ڤێ دووماهیێ یا د ناڤبەرا ئەردۆغانی و باخچەلێ دا سەرۆکێ پارتا بزاڤا نەتەوەپەرست سەبارەت ب قۆناغا ئاشتیێ داخواز ژ ئەردۆغانی کریە کو هندەک گوهۆڕین بهێنە کرن دا چو ئاستەنگی ل هەمبەر قۆناغا ئاشتیێ دروست نەبن.
رۆژناما تورکیا (Turkiye Gazetesi) د راپۆرتەکێ دا بەحسێ ڤێ یەکێ کریە کو د هەڤدیتنا بەری دو رۆژان یا د ناڤبەرا ئەردۆغانی و دەولەت باخچەلی دا، سەرۆکێ پارتا بزاڤا نەتەوەپەرست دیار کریە، دڤێت ئاسانکاری بهێنە کرن دا پەکەکە بشێت کۆنگرێ خوە ساز بکەت و خوە هلوەشینیت، چونکی ئەو یەک ژ بۆ بەردەوامیا قۆناغا ئاشتیێ گەلەک یا گرنگە، هەروەسا باخچەلی دیار کریە دڤێت کار بۆ ئامادەکرنا دستوورەکێ نوو بهێتە کرن و د دستوورێ نوو دا گرنگە هندەک گوهۆڕینێن مەزن بهێنە کرن، چونکی ئەو یەک دێ بیتە ئەگەرێ ڤێ یەکێ شەڕێ هەی ب دووماهی بهێت، چونکی نها پتر ژ هەر دەمەکێ پێدڤیا تورکیا ب ئاشتیێ هەیە.
د هەڤدیتنێ دا بەحسێ هەلبژارتنێن بهێت یێن سەرۆکاتیا تورکیا ژی هاتیە کرن و دەولەت باخچەلێ دیار کریە ئەو پشتەڤانیی ل ڤێ یەکێ دکەت دا جارەکا دی ئەردۆغان بۆ سەرۆکاتیا تورکیا بهێتە بەربژار کرن، لێ ژ بۆ ڤێ یەکێ ژی دڤێت هندەک ماددەێن قانوونێ بهێنە گوهۆڕین و هەروەسا دڤێت ب رێیا هندەک چاکسازیان ئەو بشێن پشتەڤانیا خەلکی بدەستڤە بینن و ژ بۆ ڤێ یەکێ ژی گەلەک یا گرنگە قۆناغا ئاشتیێ بەردەوام بیت و بگەهیتە ئەنجامەکێ کو ب دلێ هەموو وەلاتیێن تورکیا بیت.
هەمان رۆژنامێ ئەو یەک ژی دیار کریە، د هەڤدیتنێ دا سەرۆک کۆمارێ تورکیا رەجەب تەیب ئەردۆغان ژی دیار کریە، ئەو ب هەموو رەنگەکێ کار دکەن دا قۆناغا ئاشتیێ بگەهیتە ئارمانجا خوە، ژ بۆ ڤێ یەکێ ژی گرنگە د پێنگاڤا ئێکێ دا پەکەکە ب فەرمی هلوەشاندنا خوە راگەهینیت و چەکێن خوە ژی رادەست بکەت، هەکە ئەو یەک بهێتە کرن دێ گوهۆڕینێن گەلەک مەزن ل تورکیا دروست بن، ئەو یەک دێ کاریگەریا خوە یا گەلەک باش ل سەر ژیانا وەلاتیێن تورکیا کەت و دێ بیتە ئەگەرێ ڤێ یەکێ رەوشا ئابووری ژی یا تورکیا ژی گەلەک باشتر ببیت.
ل گۆر راپۆرتا رۆژناما تورکیا سەرۆک کۆمارێ تورکیا سوپاسیا هەلوەستێ دەولەت باخچەکێ کریە و راگەهاندیە هندەک هێز و ئالی دخوازن ئاستەنگان ل هەمبەر قۆناغا ئاشتیێ دروست بکەن، لێ جهێ دلخوەشیێ یە کو هەموو وەلاتیێن تورکیا و هێزێن سیاسی پشتەڤانیێ ل تورکیایەک بێ تیرۆر دکەن، وەکو تورکیا ئەو دێ یا پێدڤی کەن، چونکی دەمێ تیرۆر ل تورکیا نەمینیت دێ هەموو ئاریشەیێن نها هێنە چارەسەرکرن و تورکیا دێ پتر بهێز کەڤیت.
