یا وان ئێكە و نابیتە دو
سەیق سنداڤی
هەر چیێ حوكم ل ئیراقێ كری و ل بەغدا بیە دەستهەلاتدار، دەستپێكێ ب نەرمی یا داگێرای، خوەشخوەشۆك یێن گۆتین و نەفەل یا ئیناتە ناڤتەنگێ، هەتا چەنگ و باسكێن وی جەبرینە و پێن خوە هەلوەشاندین ئاخێ و باش ب هێز ئێخستین و تیڕ خواری و بێهنا خوە ڤەكری. ڤێجا هەر ناڤبینەكێ ب رەنگەكێ یێ ل مە كوردان بشترێ كەتی، ئەم یێن ژێكدو كڕین و دو بەڕەكی یا ل ناڤم ەدا پەیداكری. پشترا هندی یێ ژێهاتی كاڤلكاری و كوشتار ل دژی ڤی گەلێ خوەراگڕ یێن پێكئیناین، گوند و باژێرێن كوردستانێ یێن دایین بەر چەكێن ناڤنەتەوی قەدەغە، هەر چی خرابیە یا ل دژی مە كوردان ئەنجامدای.
نە دویرە ژ دەستهەلاتا نوكە یا بەغدایێ، برینا مووچەیێ مووچەخوەرێن هەرێمێ، یان پلان گێرینا هەر كۆمپلویەكا ژەهراوی دژی خەلكێ كوردستانێ ل پشت دیواران ئامەدەبكیت. ل سەردەمێ شۆرەشا ئیلۆنێ ژی دەما رژێما بەغدایێ یا وی سەردەمی نەشیایە رێ ل بەر بەرخوەدانا گەلێ كوردستانێ بگریت، یا رابوویە ب سۆتن و برینا قووتێ ڤی گەلێ خوەڕاگر، ئەوژی وەكی یا هاتیە ڤەگێران ژ دیدەڤانێن روودانێن ل سەر وی دەمی، ل دەمێ بەرهەمئینانا دەخل و دانی، بێدەر و گدیش و زەڤیێن دەڕامەتی ب فڕۆكەیان بومبەبارانكرن و كەوال و لەهواز ب مۆشەكا مراركرن، ناپال ل گوند و باژێرێن كوردستانێ دان و وێرانكرن، خەلكێ گوند و باژێر ڤالەكرن و بەرەڤ چیایێن كوردستانێ چوون، ژیانەكا مەترسیدار و ماندی د شكەفتا و هشارا ل چۆلێ بۆراندن، بەس داكو ژ ڤێ ئێكێ خەلكێ سڤیلێ كوردستانێ برسی بكن و بترسینن، دا ببیتە فاكتەرەك ژبۆ لاوازیا شۆرەشێ. لێ خەلكێ كوردستانێ چۆك نەدەینا هەر بەردەوام شۆرەش دەستەك كر. ب هەمان ئاوا ئەڤرۆكە ژی دەستهەلاتا بەغدایێ هەر وەكی جاران و ب هەمان رەفتارێن خوەیێن دژمنكارانە قووتێ خەلكێ سڤیلێ كوردستانێ دبڕیت، ژبۆ كو خەلكێ توورەبكت و ب رێپیڤانان رابن بەرامبەری دەستهەلاتا خوە یا خومالی، بەلێ ئەڤە خەونەكا ڤالایە. چونكو خەلكێ كوردستانێ یێ هشیارە ئەڤێ ئێكێ باش دزانە كا چ كۆمپلوێن قرێژ ل بەغدا دئێن ئامادەكرن.
ل دەما ویلایەتا مووسلێ كەفتیە دەستێن ئالا رەشا دا، دەستهەلاتا بەغدایێ مووچەیێن فەرمانبەرێن ویلایەتێ دهنارتن، سەرەرای هێزێن تاری نێزیكی نیڤەك ئاخا ئیراقێ ڤەگرتبوو، ب هەمان ئاوا مووچەیێن حەشدا شەعبی ژی دهنێرت، ژبەركو ئەو عەرەبن، لێ چونكو فەرمانبەرێن هەرێما كوردستانێ كوردن مووچەیێن وان یێن برین، نە تشتەكێ دی، تشتێن ئەو دبێژن هێجەتێن بێ مەعنانە. پسیار ل ڤێرێ، گەلۆ فەرمانبەرەكێ فەرمانگەهەكا سڤیل یا هەرێما كوردستانێ گونەها وی چیە، بوویە لایەنەك ژ سیاسەتا كۆمبوونێن هەڤلێر و بەغدایێ؟ مووچەیێ وی نەئێتە هنارتن، ئەگەر نە ژبەر هندێ بیت گونەها وی چونكو خودێ یێ كورد دای.
لەوما ژی پێدڤیە حوكمەتا كوردستانێ هەلوەستەكا جیبجیكار هەبیت و بەڕكێ ل بن پێن وان بكێشیت، ڤێ پرسگرێكێ ل هەڤلێرێ چارەسەربكەت و ل پێشڤەنیان بگەریت، ئێدی رەهێن خوە نەكەت د دەستێ رێژما قویتبرا بەغدایێ دا. ب زویترین دەم ب ناڤێن مووچەخوەڕان دا بچیت و كەسێن پێدڤی كو ب مووچەی هەیە پێ بدن و یێن نە پیدڤی ژ لیستا مووچەخوەڕان بیننە دەرئێخستن، زەنگینێن كوردستانێ پێكڤە ل گەل حوكمەتا هەرێما كوردستانێ ب هاریكاریا هەر بزاڤ و پارتیێن كوردستانی ب ئێك دەنگ بریارەكێ دیرۆكی بدەن، مووچەیێ فەرمانبەرێن كوردستانێ بدەن. حەچیێ وەزیر و بالا دەستەكێ كورد ل بەغدایێ هەیە، حوكمەتا هەرێما كوردستانێ ڤەكێشیت، چونكو واتەیەكا وان ل وێرێ نەمایە، تایبەت سەرۆكێ ئیراقێ بەری هەر ئێكێ خۆ ڤەكێشت بێتە هەڤلێرێ و ناڤمالا كوردی ب دروستی رێكبێخن. ئەڤەیە كارتەكا هەری ب هیز یا فشارێ ل دژی قویتبرێن خەلكێ كوردستانێ. بێژن مادەم یا وە ئێكە و نابیت دو، بەغدا بلا بۆ وەبیت و هەڤلێر ژی یا مەیە.
