هـەرێما كـوردسـتانـێ پشكەك ژ شـەڕی نینە
سیدرا ئـاشتی
شەڕێ ئیرانێ و ئسرائیلێ درێژەپێدان هەیە و نوكە ئەڤ شەڕە چو د قووناغەكا نوی دا و نە بتنێ ئەڤ هەردو وەلاتە، بەلكو چ ب راستەوخۆ بیت یان نە راستەوخۆ، چەندین وەلاتێن دی ژی تێدا پشكدارن، ئەڤ پشكداریا هەنێ ژی چ ب چەكی بیت یان ب دانا پێزانینێن هەوالگێری و ژبەركو ژی شەڕێ نوكە ب چەكێ پێشكەفتی دهێتەكرنێ، بوویە مەترسیا ڤی شەڕی دێ یا بەردەوام بیت و رەنگە د داهاتووی دا چەندین وەلاتێن دی ژی بكێشیتە خۆ. ئەڤا گرێدایی هەرێما مە و ژبەركو هەرێما كوردستانێ هەڤسنوورێ وەلاتێ ئیرانێ یە و ژلایەكێ دیڤە دەستهەلاتا حوكمەتا ئیراقێ، ژ لایێ عەرەبێن شیعەڤە دهێتە برێڤەبرن، بوویە هەرێما كوردستانێ دڤێت گەلەك ب هشیاری مامەلێ ل گەل ڤی شەڕی بكت و ب هیچ رەنگەكێ نابیت خوە بكەتە لایەن یان دژ، نە بۆ ئیرانێ و نە ژی بۆ دژی ئیرانێ و خوە ئەگەر ڤی شەڕی درێژە كێشا و بەلانسا شەڕی هەر چاوا بیت و د ناڤخۆیا ئیرانێ ژی دا شەڕ دروست بیت، د هەمان دەم دا نابیت هەرێما كوردستانێ ببیتە پشتەڤان بۆ هیچ لایەنەكی و هەر لڤینەك یان داخۆیانیەك یا شاش، رەنگە دێ ب خرابێ ل سەر هەرێما كوردستانێ و ئارامییا وێ دا شكێت. وەك مە دیتی چاوا بەری نوكە چ ژلایێ گرۆپێن چەكداری یێن ئیراقی بن یان ژ لایێ ئیرانێ ب خوەڤە بن و هێرشێن وان ب مۆشەكان ل سەر ئاخا هەرێمێ.
ژبیرنەكەین وەلاتێ ئیرانێ بۆ هەرێما كوردستانێ گرنگییا خوە ژ چەند لایەنان ڤە هەیە، ژ لایێ سیاسی ڤە وەك من ئاماژە بۆ دای، حوكمەتا ئیراقێ ژلایێ شیعەیان ڤە دهێتە برێڤەبرن و كاریگەریا وێ ل سەر دانا بریاران هەیە و ژبەر هەبوونا گەلەك كێشەیێن هەلاویستی د ناڤبەرا حوكمەتا ئیراقێ و ئیرانێ دا و بوویە دڤێت ئیرانێ نەكەینە دوژمنێ خوە ب هیچ رەنگەكی و ژ لایێ ئابووری ڤە، حوكمەتا هەرێمێ گەلەك مفای ژ ڤێ چەندێ وەردگرت و پێدڤیێن ناڤخۆیی یێن گەلەك كەرەستە و كەلوپەلان دابین دكەت و ئەگەر هات و بتنێ ئیران بۆ نموونە سنوورێن خوە بگریت، رەنگە دێ ئەڤ كاریگەریە ل سەر هەرێما كوردستانێ دیار كەت و ژلایەكێ دیڤە هەرێما كوردستانێ یا كەفتیە بن كاریگەریا نە راستەوخۆ یا چەندین وەلاتان، وەكو توركیا یان ئیرانێ یان ژی ئەمریكا ب خوە و تێكچوونا پەیوەندیێن هەرێمێ ل گەل ڤان وەلاتان یا باش نابیت، د دەمەكی دا هەرێما كوردستانێ ب خوە كێشەیێن ئابووری و سیاسی ل گەل دەولەتا ئیراقێ یێن هەیین و هێشتا و د نوكەدا بۆ هەرێمێ خوە پاراستن و پاراستنا بەرژەوەندیێن خوە ژ هەمی تشتەكی گرنگترە و دیسا نابیت هەرێم رێ بدەتە چ وەلاتان، ئاخا وێ بۆ هێرشكرنێ بكاربینن و ئەڤە ژی دێ سەقامگیری ئارامیا هەرێما كوردستانێ تێكدەت.
